Read Rade Y-Luk 19 Bible Online

Y-Luk 19 - Rade bible

Y-Luk 19

¹Yêsu mŭt hlăm ƀuôn Yêrikô leh anăn găn ƀuôn anăn.

²Mâo tinăn sa čô mnuih anăn ñu Y-Sačê, jing sa čô khua phung rĭng jia leh anăn jing mdrŏng.

³Ñu duah čiăng dlăng hlei Yêsu jing, ƀiădah amâo dưi ôh kyua phung lu, kyuadah awan ñu biêr.

⁴Snăn ñu êran nao êlâo leh anăn đĭ sa ƀĕ ana kyâo Sikamôr čiăng dlăng Yêsu, kyuadah Yêsu srăng găn tinăn.

⁵Tơdah Yêsu truh ti anôk anăn, Yêsu angưi dlăng kơ ñu leh anăn lač, “Ơ Y-Sačê, trŭn bĕ bi djăl, kyuadah hruê anei Kâo srăng dôk hlăm sang ih yơh.”

⁶Snăn Y-Sačê trŭn mtam leh anăn jum Yêsu hŏng klei hơ̆k.

⁷Tơdah phung lu ƀuh klei anăn, jih jang blŭ dŭñ dŭñ, lač, “Ñu nao mŭt jing tue hlăm sang sa čô mnuih soh.”

⁸Y-Sačê dôk dơ̆ng ti anăp Khua Yang leh anăn lač, “Ơ Khua Yang, nĕ anei kâo brei kơ phung ƀun ƀin sa mkrah dŏ dô kâo, leh anăn tơdah kâo tuôm mplư ƀơ̆ng ngăn arăng, kâo lŏ bi wĭt pă blư̆ lu hĭn.”

⁹Yêsu lač kơ ñu, “Hruê anei klei bi mtlaih truh leh kơ sang anei, kyuadah pô anei msĕ mơh jing sa čô anak êkei Y-Abraham.

¹⁰Kyuadah Anak Mnuih hriê čiăng duah leh anăn bi mtlaih pô luč leh.”

¹¹Êjai diñu dôk hmư̆ klei anăn, Yêsu lŏ blŭ sa klei bi hriêng, kyuadah Ñu dôk giăm ƀuôn Yêrusalem, leh anăn kyuadah diñu mĭn ƀuôn ala mtao Aê Diê srăng truh djăl.

¹²Snăn Yêsu lač, “Sa čô mnuih arăng mpŭ đuĕ nao kơ čar kbưi čiăng mă tŭ klei dưi jing mtao leh anăn lŏ wĭt.

¹³Ñu iêô pluh čô hlăm phung dĭng buăl Ñu. Ñu brei kơ digơ̆ pluh asăr prăk leh anăn lač, ‘Brei diih mnia hŏng asăr prăk anei tơl kâo lŏ wĭt.’

¹⁴Ƀiădah phung ƀuôn sang ñu bi êmut kơ ñu leh anăn tiŏ nao phung dĭng ktang ti tluôn ñu brei lač, ‘Hmei amâo čiăng ôh kơ mnuih anei kiă kriê hmei.’

¹⁵Leh ñu mă tŭ klei dưi jing mtao ñu lŏ wĭt, ñu mtă brei arăng iêô phung dĭng buăl hriê kơ ñu, phung ñu brei leh asăr prăk, čiăng kơ ñu dưi thâo ya digơ̆ ƀơ̆ng đĭ leh hŏng klei mnia.

¹⁶Dĭng buăl mrô sa truh ti anăp ñu, lač, ‘Ơ Khua, asăr prăk ih lŏ đĭ jing pluh asăr.’

¹⁷Khua lač kơ gơ̆, ‘Jăk leh, Ơ dĭng buăl jăk; kyuadah ih jing sĭt suôr leh hlăm bruă điêt, ih srăng mâo klei dưi kiă kriê pluh boh ƀuôn.’

¹⁸Dĭng buăl mrô dua hriê leh anăn lač, ‘Ơ Khua, asăr prăk ih lŏ đĭ jing êma asăr.’

¹⁹Ñu lač kơ gơ̆, ‘Ih srăng kiă kriê êma boh ƀuôn.’

²⁰Dĭng buăl mkăn hriê leh anăn lač, ‘Ơ Khua, nĕ anei asăr prăk ih, kâo đŭng pioh hlăm čhiăm,

²¹kyuadah kâo huĭ kơ ih, kyuadah ih jing sa čô khăng. Ih mă mnơ̆ng amâo jing dŏ ih ôh, leh anăn wiă mnơ̆ng ih amâo tuôm rah ôh.’

²²Khua anăn lač kơ gơ̆, ‘Ơ dĭng buăl ƀai! kâo srăng phat kđi ih tui si klei ih pô blŭ! Ih thâo leh kâo jing sa čô khăng, mă mnơ̆ng amâo jing dŏ kâo ôh, leh anăn wiă mnơ̆ng kâo amâo tuôm rah ôh.

²³Snăn si ngă ih amâo dưm prăk kâo hlăm sang pioh prăk lĕ? Leh anăn tơdah kâo lŏ wĭt, kâo dưi lŏ mă gơ̆ hŏng mnga.’

²⁴Leh anăn ñu lač kơ phung dôk giăm, ‘Sua mă asăr prăk mơ̆ng ñu, leh anăn brei kơ pô mâo leh pluh asăr prăk.’

²⁵Digơ̆ lač kơ ñu, ‘Ơ khua, gơ̆ mâo leh pluh asăr prăk!’

²⁶Kâo hưn kơ diih, Aê Diê srăng lŏ thiăm kơ hlei pô mâo leh; ƀiădah hlei pô amâo mâo mnơ̆ng ôh, Aê Diê srăng sua mă wăt mnơ̆ng ñu mâo leh.

²⁷Ƀiădah bi kơ phung roh kâo, phung amâo čiăng ôh kơ kâo kiă kriê diñu, atăt ba diñu tinei leh anăn bi mdjiê hĕ diñu ti anăp kâo.”

²⁸Leh Ñu blŭ klei anăn, Yêsu êbat đĭ nao kơ ƀuôn Yêrusalem êlâo kơ diñu.

²⁹Tơdah Ñu giăm truh kơ ƀuôn Betphajê leh anăn ƀuôn Ƀêthani ti čư̆ arăng bi anăn čư̆ Ôliwơ, Ñu tiŏ nao dua čô phung ƀĭng kna Ñu,

³⁰lač, “Nao kơ ƀuôn ti anăp diih. Tơdah diih mŭt tinăn, diih srăng ƀuh sa drei êđai aseh dliê arăng kă leh. Aseh dliê anăn ka arăng tuôm đĭ ôh. Kleh đoh ba gơ̆ tinei.

³¹Tơdah arăng êmuh kơ diih, ‘Si ngă diih kleh aseh dliê anăn lĕ?’ brei diih lač snei, ‘Khua Yang čiăng kơ gơ̆.’ ”

³²Snăn phung anăn đuĕ nao leh anăn ƀuh djŏ si klei Yêsu lač leh kơ diñu.

³³Êjai diñu kleh êđai aseh dliê anăn, pô gơ̆ lač kơ diñu, “Si ngă diih kleh êđai aseh dliê anăn lĕ?”

³⁴Diñu lač, “Khua Yang čiăng kơ gơ̆.”

³⁵Leh anăn diñu đoh ba gơ̆ kơ Yêsu. Diñu siap čhiăm ao diñu ti rŏng êđai aseh dliê leh anăn brei Yêsu đĭ.

³⁶Êjai Yêsu đĭ aseh dliê nao, diñu siap čhiăm ao diñu ti êlan.

³⁷Tơdah Yêsu giăm truh kơ ƀuôn Yêrusalem ti anôk trŭn čư̆ Ôliwơ, jih jang phung ƀĭng kna dơ̆ng hơ̆k mơak leh anăn mpŭ mni kơ Aê Diê hŏng asăp kraih kyua jih jang bruă myang diñu ƀuh leh.

³⁸Diñu lač, “Aê Diê hơêč hmưi kơ Mtao hriê hlăm anăn Khua Yang! Brei mâo klei êđăp ênang hlăm adiê leh anăn klei guh kơang kơ Pô Ti Dlông Hĭn!”

³⁹Mâo đa đa phung Pharisi ti krah phung lu lač kơ Yêsu, “Ơ Nai, ghă bĕ phung ƀĭng kna Ih.”

⁴⁰Yêsu lŏ wĭt lač, “Kâo lač kơ diih, tơdah phung anei dôk ñăt, boh tâo yơh srăng ur.”

⁴¹Tơdah Yêsu giăm truh leh anăn ƀuh ƀuôn Yêrusalem, Ñu hia kyua ƀuôn anăn, lač,

⁴²“Čiăng snăk tơdah hruê anei ih dưi thâo klei dưi brei klei êđăp ênang kơ ih! Ƀiădah ară anei klei anăn mdăp leh kơ ală ih.

⁴³Kyuadah hruê srăng truh kơ ih tơdah phung roh ih srăng mđĭ lăn jŭm dar ih leh anăn wang ih, leh anăn krư̆ ih jŭm gah găn,

⁴⁴diñu bi klưh ih ti lăn, wăt phung anak ih ti krah ih, leh anăn diñu amâo srăng lui ôh hlăm ih sa boh tâo ti dlông sa boh tâo mkăn, kyuadah ih amâo thâo ôh hruê Aê Diê čhưn leh hŏng ih.”

⁴⁵Yêsu mŭt hlăm Sang Kkuh Mpŭ leh anăn dơ̆ng suôt phung čhĭ mnia tinăn,

⁴⁶Ñu lač kơ phung anăn, “Mâo klei čih leh snei, ‘Sang Kâo srăng jing sang pioh wah lač;’ ƀiădah diih mjing gơ̆ ƀăng kơ phung knĕ.”

⁴⁷Ñu mtô grăp hruê hlăm Sang Kkuh Mpŭ. Phung knơ̆ng khua ngă yang, phung khua čih hră, leh anăn phung arăng mpŭ čiăng bi mdjiê Ñu.

⁴⁸Ƀiădah diñu amâo ƀuh ôh ya klei diñu dưi ngă, kyuadah jih jang mnuih ƀuôn sang khăp hmư̆ jih klei Yêsu blŭ.