Read Rade Y-Yôhan 18 Bible Online

Y-Yôhan 18 - Rade bible

Y-Yôhan 18

¹Leh Yêsu wah lač, Ñu nao mbĭt hŏng phung ƀĭng kna Ñu găn tlung êa hnoh Kidrôn, tinăn mâo war mnga. Ñu mŭt tinăn mbĭt hŏng phung ƀĭng kna Ñu.

²Y-Yuđas, pô lhiăr kơ Yêsu, thâo bĭt anôk anăn mơh; kyuadah Yêsu khăng bi tuôm jêñ jêñ tinăn mbĭt hŏng phung ƀĭng kna Ñu.

³Snăn Y-Yuđas atăt sa phung kahan Rôm mbĭt hŏng đa đa phung kahan kiă mơ̆ng phung knơ̆ng khua ngă yang leh anăn phung Pharisi, nao tinăn djă pui kđen, pui kƀong, leh anăn mnơ̆ng bi blah.

⁴Yêsu thâo leh êlâo jih jang klei srăng truh kơ Gơ̆, snăn Gơ̆ nao bi tuôm hŏng phung anăn leh anăn êmuh, “Hlei diih duah?”

⁵Diñu lŏ wĭt lač kơ Gơ̆, “Yêsu ƀuôn Nasaret.” Yêsu lač kơ diñu, “Kâo gơ̆ yơh.” Y-Yuđas, pô lhiăr kơ Gơ̆, dôk mbĭt hŏng diñu.

⁶Tơdah Yêsu lač kơ diñu, “Kâo gơ̆ yơh,” diñu kdŭn tluôn leh anăn lĕ buh ti lăn.

⁷Yêsu lŏ êmuh kơ diñu, “Hlei diih duah?” Diñu lač, “Yêsu ƀuôn Nasaret.”

⁸Yêsu lŏ wĭt lač, “Kâo lač leh kơ diih Kâo gơ̆ yơh. Snăn tơdah diih duah Kâo, brei phung anei đuĕ wĭt.”

⁹Klei anăn čiăng bi sĭt klei Gơ̆ blŭ leh, “Kâo amâo luč ôh sa čô đơ phung Ih brei leh kơ Kâo.”

¹⁰Hlăk anăn Y-Simôn Pêtrôs mâo sa ƀĕ đao gưm, suê̆ koh dĭng buăl khua ngă yang prŏng djŏ ti knga hnuă tơl tloh; anăn dĭng buăl anăn Y-Malkus.

¹¹Yêsu lač kơ Y-Pêtrôs, “Lŏ hrô đao gưm ih hlăm hrŭm gơ̆. Kâo amâo srăng mnăm hĕ atŏ Ama Kâo brei leh kơ Kâo?”

¹²Snăn phung kahan Rôm, khua kahan, leh anăn phung kahan kiă Yuđa mă Yêsu leh anăn čăp Gơ̆.

¹³Êlâo hĭn diñu atăt ba Yêsu kơ Y-Anas; kyuadah Y-Anas jing kmha Y-Kaip. Y-Kaip jing khua ngă yang prŏng thŭn anăn.

¹⁴Y-Kaip anăn mơh kčĕ leh kơ phung Yuđa: jing jăk hĭn tơdah sa čô mnuih djiê hrô kơ phung ƀuôn sang.

¹⁵Y-Simôn Pêtrôs leh anăn sa čô ƀĭng kna mkăn tui hlue Yêsu. Kyuadah khua ngă yang prŏng thâo kral ƀĭng kna anăn, ñu mŭt hlăm wăl sang khua ngă yang prŏng mbĭt hŏng Yêsu.

¹⁶Ƀiădah Y-Pêtrôs ăt dôk dơ̆ng ti êngao ƀăng bhă. Snăn ƀĭng kna mkăn anăn, pô khua ngă yang prŏng thâo kral, kbiă nao blŭ hŏng dĭng buăl mniê kiă ƀăng bhă, leh anăn atăt Y-Pêtrôs mŭt.

¹⁷Dĭng buăl mniê pô kiă ƀăng bhă anăn lač kơ Y-Pêtrôs, “Amâo djŏ hĕ ih msĕ mơh jing sa čô ƀĭng kna êkei anăn?” Ñu lač, “Hơăi, amâo djŏ ôh.”

¹⁸Phung dĭng buăl leh anăn phung khua kahan răm leh pui hdăng, leh anăn dôk dơ̆ng mdang pui, kyuadah adiê êăt. Wăt Y-Pêtrôs mơh dôk mbĭt hŏng diñu, dôk dơ̆ng leh anăn mdang pui.

¹⁹Hlăk anăn khua ngă yang prŏng êmuh Yêsu klei djŏ kơ phung ƀĭng kna Ñu leh anăn kơ klei Ñu mtô.

²⁰Yêsu lŏ wĭt lač kơ khua ngă yang prŏng, “Kâo blŭ mngač leh ti anăp jih jang mnuih, Kâo mtô nanao hlăm sang bi kƀĭn leh anăn hlăm sang kkuh mpŭ, anôk jih jang phung Yuđa khăng bi kƀĭn. Kâo amâo tuôm blŭ sa klei hŏng klei hgăm ôh.

²¹Si ngă ih êmuh kơ Kâo lĕ? Êmuh bĕ kơ phung hmư̆ Kâo leh, ya klei Kâo lač leh kơ digơ̆. Phung anăn thâo klei Kâo blŭ leh.”

²²Tơdah Yêsu lač leh klei anăn, sa čô hlăm phung kahan kiă dôk tinăn pah miêng Yêsu leh anăn lač, “Snăn hĕ ih lŏ wĭt lač kơ khua ngă yang prŏng?”

²³Yêsu lŏ wĭt lač kơ ñu, “Tơdah Kâo blŭ soh leh, bi êdah klei soh anăn; ƀiădah tơdah Kâo blŭ djŏ, si ngă ih čăm Kâo lĕ?”

²⁴Leh anăn Y-Anas tiŏ nao Yêsu arăng kă leh ba kơ khua ngă yang prŏng Y-Kaip.

²⁵Hlăk anăn Y-Simôn Pêtrôs dôk dơ̆ng leh anăn mdang pui. Đa đa mnuih êmuh ñu, “Amâo djŏ hĕ ih msĕ mơh jing sa čô hlăm phung ƀĭng kna ñu?” Y-Pêtrôs hngah klei anăn leh anăn lač, “Hơăi, amâo djŏ ôh.”

²⁶Sa čô dĭng buăl khua ngă yang prŏng, sa čô găp djuê pô Y-Pêtrôs koh knga êmuh, “Amâo djŏ ih hĕ kâo ƀuh hlăm war mnga mbĭt hŏng ñu?”

²⁷Y-Pêtrôs lŏ hngah mơh; leh anăn mnŭ knô kdjô̆ mtam.

²⁸Mơ̆ng sang Y-Kaip diñu atăt ba Yêsu kơ sang phat kđi. Kyua aguah ưm, diñu pô amâo mŭt ôh hlăm sang khua čar, huĭ bi čhŏ diñu pô, čiăng dưi ƀơ̆ng Knăm Klei Găn.

²⁹Snăn Aê Pilat kbiă nao kơ diñu leh anăn lač, “Ya klei diih kčŭt kơ êkei anei?”

³⁰Diñu lŏ wĭt lač kơ Aê Pilat, “Tơdah êkei anei amâo jing ôh sa čô ngă jhat, hmei amâo jao ñu kơ ih ôh.”

³¹Aê Pilat lač kơ diñu, “Brei diih pô mă ñu leh anăn phat kđi ñu tui si klei bhiăn diih pô.” Phung Yuđa lač kơ Aê Pilat, “Hmei amâo mâo klei bhiăn dưi bi mdjiê mnuih ôh.”

³²Klei anăn čiăng bi sĭt klei Yêsu blŭ leh čiăng bi êdah si êlan Gơ̆ srăng djiê.

³³Aê Pilat lŏ mŭt hlăm sang phat kđi, iêô Yêsu, leh anăn lač kơ Gơ̆, “Ih jing Mtao phung Yuđa mơ̆?”

³⁴Yêsu lŏ wĭt lač, “Ih blŭ klei anăn mơ̆ng ih pô mơ̆, amâodah phung mkăn hưn kơ ih klei Kâo jing?”

³⁵Aê Pilat lŏ wĭt lač, “Kâo jing sa čô Yuđa mơ̆? Phung găp djuê ih pô leh anăn phung knơ̆ng khua ngă yang jao leh ih kơ kâo. Ya klei ih ngă leh?”

³⁶Yêsu lŏ wĭt lač, “Ƀuôn ala mtao Kâo amâo djŏ ti lăn ala anei ôh. Tơdah ƀuôn ala mtao Kâo jing ti lăn ala anei, phung dĭng buăl Kâo srăng bi blah, čiăng kơ arăng amâo dưi jao Kâo kơ phung Yuđa ôh. Hơăi, ƀuôn ala mtao Kâo amâo djŏ ti lăn ala anei ôh.”

³⁷Aê Pilat lač kơ Yêsu, “Snăn ih jing mtao hĕ?” Yêsu lŏ wĭt lač, “Ih lač djŏ leh Kâo jing sa čô mtao. Kyua klei anăn arăng kkiêng leh kơ Kâo, leh anăn kyua klei anăn Kâo hriê leh hlăm lăn ala, čiăng hưn klei sĭt nik. Grăp čô hlei pô kbiă mơ̆ng klei sĭt nik hmư̆ asăp Kâo.”

³⁸Aê Pilat lač kơ Yêsu, “Ya jing klei sĭt nik?” Leh Aê Pilat lač klei anăn, ñu lŏ kbiă nao kơ phung Yuđa leh anăn lač kơ diñu, “Kâo amâo ƀuh ôh klei soh hlăm gơ̆.

³⁹Ƀiădah diih mâo klei mưng, kâo khăng pŏk kơ diih sa čô mnă êjai hruê Knăm Klei Găn. Diih čiăng mơ̆ kâo phưi kơ diih Mtao phung Yuđa?”

⁴⁰Diñu lŏ ur lač, “Amâo djŏ mnuih anei ôh, ƀiădah phưi Y-Barabas!” Y-Barabas jing sa čô mnuih knĕ.