Read Rade Y-Yôhan 8 Bible Online

Y-Yôhan 8 - Rade bible

Y-Yôhan 8

²Aguah ưm Ñu lŏ nao kơ sang kkuh mpŭ. Jih jang phung ƀuôn sang nao kơ Ñu, leh anăn Ñu dôk gŭ mtô kơ digơ̆.

³Phung khua čih hră leh anăn phung Pharisi atăt ba sa čô mniê arăng mâo mă êjai gơ̆ tlĕ piu, dưm gơ̆ ti krah phung lu,

⁴leh anăn lač kơ Yêsu, “Ơ Nai, arăng mă mniê anei êjai ñu tlĕ piu.

⁵Hlăm klei bhiăn Y-Môis mtă brei drei bhĭr boh tâo bi mdjiê pô ngă msĕ snăn. Bi Ih, si Ih lač kơ klei anăn?”

⁶Diñu lač klei anei čiăng lông dlăng Yêsu, čiăng bi mâo klei dưi kčŭt kơ Yêsu. Yêsu kkui leh anăn čih hŏng kđiêng Ñu ti lăn.

⁷Tơdah phung anăn lŏ êmuh Ñu nanao, Yêsu kgŭ dơ̆ng leh anăn lač kơ phung anăn, “Hlei hlăm phung diih amâo mâo klei soh ôh, brei ñu bhĭr boh tâo êlâo hĭn kơ mniê anei.”

⁸Yêsu lŏ kkui leh anăn čih hŏng kđiêng Ñu ti lăn.

⁹Ƀiădah tơdah hmư̆ klei anăn, diñu đuĕ sa čô sa čô, dơ̆ng mơ̆ng pô mduôn hĭn; leh anăn Yêsu dôk hjăn mbĭt hŏng mniê anăn dôk dơ̆ng ti anăp Ñu.

¹⁰Yêsu angưi dlăng leh anăn lač kơ mniê anăn, “Ơ mniê, ti phung kčŭt kơ ih lĕ? Amâo mâo pô bi kmhal ih ôh hĕ?”

¹¹Mniê anăn lač, “Amâo mâo ôh, khua ah.” Yêsu lač, “Kâo kăn bi kmhal ih rei. Nao bĕ, leh anăn đăm lŏ ngă soh ôh.”]

¹²Yêsu lŏ blŭ kơ phung diñu, lač, “Kâo jing klei mngač kơ lăn ala. Hlei pô tui hlue Kâo amâo srăng êbat hlăm klei mmăt ôh, ƀiădah srăng mâo klei mngač kơ klei hdĭp.”

¹³Phung Pharisi lač kơ Ñu, “Ih hưn kơ Ih pô. Klei Ih hưn amâo jing sĭt ôh.”

¹⁴Yêsu lŏ wĭt lač, “Wăt tơdah Kâo hưn kơ Kâo pô, klei Kâo hưn jing sĭt, kyuadah Kâo thâo mơ̆ng Kâo hriê leh anăn ti anôk Kâo đuĕ nao; ƀiădah diih amâo thâo ôh mơ̆ng Kâo hriê amâodah ti anôk Kâo nao.

¹⁵Diih phat kđi tui si kđeh; bi Kâo amâo phat kđi arăng ôh.

¹⁶Ƀiădah wăt tơdah Kâo phat kđi, klei Kâo phat kđi jing sĭt, kyuadah Kâo amâo phat kđi hjăn Kâo pô ôh, ƀiădah Kâo mbĭt hŏng Ama Pô tiŏ hriê Kâo leh.

¹⁷Hlăm klei bhiăn diih mâo klei čih leh, klei dua čô mnuih hưn jing sĭt.

¹⁸Kâo hưn bi sĭt kơ Kâo pô, leh anăn Ama Pô tiŏ hriê Kâo hưn bi sĭt kơ Kâo msĕ mơh.”

¹⁹Snăn diñu lač kơ Yêsu, “Ti Ama Ih?” Yêsu lŏ wĭt lač, “Diih amâo thâo kral Kâo ôh, kăn diih thâo kral Ama Kâo rei. Tơdah diih thâo kral Kâo leh, diih srăng thâo kral Ama Kâo msĕ mơh.”

²⁰Yêsu blŭ klei anei hlăm adŭ pioh ngăn êjai Ñu mtô hlăm sang kkuh mpŭ. Ƀiădah amâo mâo pô mă čăp Ñu ôh, kyuadah mông Ñu ka truh ôh.

²¹Yêsu lŏ lač kơ diñu, “Kâo srăng đuĕ nao, leh anăn diih srăng duah Kâo, ƀiădah diih srăng djiê hlăm klei soh diih. Ti anôk Kâo nao, diih amâo dưi nao ôh.”

²²Snăn phung Yuđa lač, “Ñu srăng bi mdjiê ñu pô mơ̆, kyuadah ñu lač, ‘Ti anôk Kâo nao, diih amâo dưi nao ôh’?”

²³Yêsu lač kơ diñu, “Diih kbiă hriê mơ̆ng gŭ, Kâo trŭn hriê mơ̆ng dlông. Diih kbiă hriê mơ̆ng lăn ala anei, bi Kâo amâo kbiă hriê mơ̆ng lăn ala anei ôh.

²⁴Kâo hưn leh kơ diih srăng djiê hlăm klei soh diih; kyuadah diih srăng djiê hlăm klei soh diih tơdah diih amâo đăo ôh klei Kâo jing Pô Kâo Jing.”

²⁵Diñu êmuh Yêsu, “Hlei Ih jing?” Yêsu lač kơ digơ̆, “Pô Kâo lač leh kơ diih mơ̆ng mphŭn.

²⁶Kâo mâo lu klei čiăng lač djŏ kơ diih, leh anăn lu klei čiăng phat kđi; ƀiădah Pô tiŏ hriê Kâo leh jing sĭt, leh anăn Kâo hưn kơ lăn ala ya klei Kâo hmư̆ leh mơ̆ng Ñu.”

²⁷Diñu amâo thâo săng ôh kơ Yêsu blŭ leh kơ diñu klei djŏ kơ Ama.

²⁸Snăn Yêsu lač, “Tơdah leh diih yơr Anak Mnuih ti dlông, hlăk anăn diih srăng thâo kơ Kâo jing Pô Kâo Jing, leh anăn kơ Kâo amâo ngă sa mta bruă hŏng klei dưi Kâo pô ôh, ƀiădah Kâo hưn snăn tui si klei Ama mtô leh kơ Kâo.

²⁹Leh anăn Pô tiŏ hriê Kâo leh dôk mbĭt hŏng Kâo; Ñu amâo tuôm lui Kâo dôk hjăn ôh, kyuadah Kâo ngă klei bi mơak kơ Ñu nanao.”

³⁰Kyua Yêsu blŭ snăn, mâo lu mnuih đăo kơ Ñu.

³¹Leh anăn Yêsu lač kơ phung Yuđa đăo leh kơ Ñu, “Tơdah diih dôk kjăp hlăm klei Kâo blŭ, diih jing ƀĭng kna Kâo sĭt,

³²leh anăn diih srăng thâo klei sĭt nik, leh anăn klei sĭt nik srăng bi êngiê diih.”

³³Digơ̆ lŏ wĭt lač kơ Yêsu, “Hmei jing phung anak čô Y-Abraham, leh anăn hmei amâo tuôm jing hlŭn arăng ôh. Si klei ih lač, ‘Arăng srăng bi êngiê diih’?”

³⁴Yêsu lŏ wĭt lač kơ diñu, “Kâo lač kơ diih klei sĭt nik, grăp čô hlei pô ngă soh jing hlŭn kơ klei soh.

³⁵Hlŭn amâo dôk nanao hlăm sang ôh, ƀiădah anak pô dôk nanao.

³⁶Snăn tơdah Anak bi êngiê diih, diih srăng êngiê sĭt nik.

³⁷Kâo thâo leh diih jing phung anak čô Y-Abraham; ƀiădah diih duah bi mdjiê Kâo, kyuadah diih amâo mă tŭ ôh klei Kâo blŭ.

³⁸Kâo blŭ klei Kâo ƀuh leh mbĭt hŏng Ama Kâo, leh anăn diih ngă klei diih hmư̆ mơ̆ng ama diih.”

³⁹Diñu lŏ wĭt lač kơ Yêsu, “Y-Abraham jing ama hmei.” Yêsu lač kơ diñu, “Tơdah diih jing anak Y-Abraham, diih srăng ngă klei Y-Abraham ngă leh.

⁴⁰Ƀiădah ară anei diih duah bi mdjiê Kâo, sa čô mnuih hưn leh klei sĭt nik kơ diih, klei Kâo hmư̆ leh mơ̆ng Aê Diê. Y-Abraham amâo ngă klei anăn ôh.

⁴¹Diih dôk ngă klei ama diih ngă.” Diñu lač kơ Yêsu, “Hmei amâo jing anak ƀă pum ôh. Hmei mâo leh sa čô Ama, jing Aê Diê.”

⁴²Yêsu lač kơ diñu, “Tơdah Aê Diê jing Ama diih, diih srăng khăp kơ Kâo, kyuadah kâo kbiă hriê leh mơ̆ng Aê Diê. Kâo amâo hriê tui si Kâo pô ôh, ƀiădah Aê Diê tiŏ hriê Kâo.

⁴³Si ngă diih amâo thâo săng ôh klei Kâo lač? Kyuadah diih amâo dưi ôh hmư̆ klei Kâo blŭ.

⁴⁴Diih kbiă hriê mơ̆ng ama diih yang jhat, leh anăn diih čiăng ngă tui si klei ama diih čiăng. Ñu jing pô bi mdjiê mnuih mơ̆ng mphŭn, leh anăn ñu amâo mâo sa kdrêč hlăm klei sĭt nik ôh, kyuadah amâo mâo ôh klei sĭt nik hlăm ñu. Tơdah ñu luar, ñu blŭ tui si knuih ñu pô, kyuadah ñu jing pô luar leh anăn ama klei luar.

⁴⁵Ƀiădah kyuadah Kâo blŭ klei sĭt nik, diih amâo đăo kơ Kâo ôh.

⁴⁶Hlei pô hlăm phung diih dưi lač kơ Kâo soh? Tơdah Kâo hưn klei sĭt nik, si ngă diih amâo đăo kơ Kâo lĕ?

⁴⁷Hlei pô kbiă hriê mơ̆ng Aê Diê dôk hmư̆ klei Aê Diê blŭ. Diih amâo dôk hmư̆ ôh klei blŭ anăn, kyuadah diih amâo kbiă hriê mơ̆ng Aê Diê ôh.”

⁴⁸Phung Yuđa êmuh Yêsu, “Jing djŏ mơ̆ tơdah hmei lač Ih jing sa čô Samari leh anăn pô mâo yang jhat?”

⁴⁹Yêsu lŏ wĭt lač, “Kâo amâo mâo yang jhat ôh; ƀiădah Kâo mpŭ kơ Ama Kâo, leh anăn diih amâo mpŭ kơ Kâo ôh.

⁵⁰Kâo amâo duah klei guh kơang kơ Kâo pô ôh. Mâo sa čô duah klei anăn, leh anăn phat kđi.

⁵¹Kâo lač kơ diih klei sĭt nik, tơdah sa čô djă pioh klei Kâo blŭ amâo srăng tuôm hŏng klei djiê ôh.”

⁵²Phung Yuđa lač kơ Ñu, “Ară anei hmei thâo kơ Ih mâo leh sa čô yang jhat. Y-Abraham djiê leh, msĕ si phung khua pô hưn êlâo djiê leh mơh, ƀiădah Ih lač, ‘Tơdah sa čô djă pioh klei Kâo blŭ amâo srăng tuôm hŏng klei djiê ôh.’

⁵³Ih jing prŏng hĭn kơ ama hmei Y-Abraham, pô djiê leh mơ̆? Leh anăn phung khua pô hưn êlâo djiê leh mơh. Hlei Ih mĭn Ih jing?”

⁵⁴Yêsu lŏ wĭt lač, “Tơdah Kâo bi guh kơang kơ Kâo pô, klei guh kơang Kâo pô jing hơăi mang. Ama Kâo yơh jing Pô bi guh kơang Kâo. Kơ Pô anăn diih lač leh jing Aê Diê diih.

⁵⁵Ƀiădah diih amâo tuôm thâo kral Ñu ôh. Kâo thâo kral Ñu. Tơdah Kâo lač, Kâo amâo thâo kral Ñu ôh, Kâo srăng jing sa čô luar msĕ si diih; ƀiădah Kâo thâo kral Ñu yơh, leh anăn Kâo djă pioh klei Ñu blŭ.

⁵⁶Ama diih Y-Abraham hơ̆k snăk tơdah ñu ƀuh hruê Kâo. Ñu ƀuh leh, leh anăn ñu mơak.”

⁵⁷Snăn phung Yuđa lač kơ Yêsu, “Ih ka mâo êma pluh thŭn ôh, si ngă Ih ƀuh leh Y-Abraham hĕ?”

⁵⁸Yêsu lač kơ diñu, “Kâo lač kơ diih klei sĭt nik, êlâo kơ mâo Y-Abraham, Kâo Jing.”

⁵⁹Snăn diñu mă boh tâo čiăng bhĭr Yêsu; ƀiădah Yêsu đuĕ dăp, leh anăn kbiă mơ̆ng sang kkuh mpŭ.