Read Rade Bruă Phung Khua Ƀĭng Kna 11 Bible Online

Bruă Phung Khua Ƀĭng Kna 11 - Rade bible

Bruă Phung Khua Ƀĭng Kna 11

¹Phung khua ƀĭng kna leh anăn phung ayŏng adei dôk hlăm čar Yuđa hmư̆ kơ phung tue msĕ mơh mă tŭ klei Aê Diê blŭ.

²Snăn tơdah Y-Pêtrôs đĭ nao kơ ƀuôn Yêrusalem, phung đăo hlăm phung khăt klĭt ƀuah kơ ñu,

³lač, “Ih nao leh kơ phung mnuih amâo khăt klĭt leh anăn huă ƀơ̆ng mbĭt hŏng diñu.”

⁴Ƀiădah Y-Pêtrôs dơ̆ng mblang kơ diñu djŏ pruê̆ tui si jih klei truh:

⁵“Êjai kâo dôk wah lač hlăm ƀuôn Jôpa, kâo djiê hwăt leh anăn mâo klei bi ƀuh. Mâo mnơ̆ng msĕ si sa blah čhiăm prŏng kă leh ti pă bĭt kiêng mtrŭn mơ̆ng adiê leh anăn truh ti kâo.

⁶Êjai kâo ksiêm dlăng, kâo ƀuh mâo lu hlô mnơ̆ng rông leh anăn hlô dliê, mnơ̆ng êbat ban, leh anăn čĭm hlăm adiê.

⁷Kâo hmư̆ asăp blŭ lač kơ kâo, ‘Ơ Y-Pêtrôs, kgŭ koh ƀơ̆ng bĕ.’

⁸Ƀiădah kâo lač, ‘Hơăi, Ơ Khua Yang; kyuadah amâo mâo mnơ̆ng čhŏ tui si klei bhiăn amâodah mnơ̆ng amâo doh tuôm mŭt hlăm ƀăng êgei kâo ôh.’

⁹Ƀiădah asăp mơ̆ng adiê anăn lŏ blŭ kơ kâo tal dua, ‘Ya mnơ̆ng Aê Diê bi doh leh, đăm ih yap amâo doh ôh.’

¹⁰Klei anăn truh tlâo blư̆, leh anăn jih jang mnơ̆ng anăn lŏ hrui wĭt phă adiê.

¹¹Êjai anăn mtam tlâo čô êkei arăng tiŏ hriê kơ kâo mơ̆ng ƀuôn Sêsarê truh ti ƀăng bhă sang kâo dôk.

¹²Yang Mngăt Jăk hưn kơ kâo brei kâo nao mbĭt hŏng diñu đăm ngă kĭ kơ̆ ôh. Phung năm čô ayŏng adei anei nao mbĭt hŏng kâo mơh, leh anăn hmei mŭt hlăm sang Y-Kornei.

¹³Ñu yăl dliê kơ hmei klei ñu ƀuh leh sa čô dĭng buăl jăk dôk dơ̆ng hlăm sang ñu leh anăn lač, ‘Tiŏ nao mnuih kơ ƀuôn Jôpa, iêô Y-Simôn lŏ bi anăn Y-Pêtrôs.

¹⁴Ñu srăng mtô kơ ih sa klei srăng bi mtlaih ih leh anăn jih jang mnuih hlăm sang ih.’

¹⁵Tơdah kâo dơ̆ng blŭ, Yang Mngăt Jăk trŭn ti diñu msĕ si ti phung drei tal êlâo.

¹⁶Leh anăn kâo hdơr klei Khua Yang lač leh, ‘Y-Yôhan ngă ƀaptem leh hŏng êa, ƀiădah diih srăng tŭ klei ƀaptem hŏng Yang Mngăt Jăk.’

¹⁷Snăn tơdah Aê Diê brei kơ digơ̆ sa klei brei msĕ si ñu brei leh kơ drei hlăk drei đăo kơ Khua Yang Yêsu Krist, hlei kâo jing tơl kâo dưi bi kdơ̆ng hŏng Aê Diê?”

¹⁸Tơdah phung ƀuah kơ Y-Pêtrôs hmư̆ leh klei anăn, diñu dôk ñăt, leh anăn mpŭ mni kơ Aê Diê, lač, “Snăn Aê Diê brei leh mơh kơ phung tue klei kmhal kơ klei soh čiăng mâo klei hdĭp.”

¹⁹Mâo phung đăo bra đuĕ leh kyua klei arăng ngă jhat dơ̆ng hŏng Y-Êtiên, leh anăn diñu hiu truh ti čar Phênisi, ti plao êa Čiprơ, leh anăn ti ƀuôn Antiôs, mtô klei Aê Diê blŭ knŏng kơ phung Yuđa.

²⁰Ƀiădah mâo đa đa hlăm phung anăn mơ̆ng plao êa Čiprơ leh anăn Čar Siren, tơdah truh ti ƀuôn Antiôs, mtô kơ phung Grĕk mơh klei mrâo mrang jăk Khua Yang Yêsu.

²¹Kngan Khua Yang dôk mbĭt hŏng diñu, leh anăn mâo lu mnuih đăo kơ Khua Yang.

²²Phung Sang Aê Diê ti ƀuôn Yêrusalem hmư̆ hing kơ klei anăn, leh anăn tiŏ nao Y-Barnabas kơ ƀuôn Antiôs.

²³Tơdah ñu truh leh anăn ƀuh klei Aê Diê pap, ñu mơak; leh anăn ñu mđĭ ai jih jang digơ̆ brei dôk kjăp sĭt suôr hŏng Khua Yang.

²⁴Y-Barnabas jing mnuih jăk, bŏ hŏng Yang Mngăt Jăk leh anăn klei đăo. Mâo lu mnuih đăo kơ Khua Yang.

²⁵Leh tinăn Y-Barnabas nao kơ ƀuôn Tars čiăng duah Y-Sôl.

²⁶Leh ñu ƀuh Y-Sôl, ñu atăt ba gơ̆ kơ ƀuôn Antiôs. Liăp sa thŭn diñu bi kƀĭn mbĭt hŏng Phung Sang Aê Diê, leh anăn bi hriăm lu mnuih. Hlăm ƀuôn Antiôs tal êlâo hĭn arăng pia phung Krist kơ phung ƀĭng kna.

²⁷Hlăm ênuk anăn mâo phung khua pô hưn êlâo trŭn mơ̆ng ƀuôn Yêrusalem kơ ƀuôn Antiôs.

²⁸Sa čô hlăm phung diñu, anăn gơ̆ Y-Agabus, kgŭ leh anăn hưn êlâo hŏng Yang Mngăt Jăk srăng mâo klei ư̆ êpa prŏng tar ƀar lăn ala. Klei ư̆ êpa anăn truh sĭt hlăm ênuk mtao Klôd kiă kriê.

²⁹Phung ƀĭng kna mĭn čiăng mơĭt mnơ̆ng đru kơ phung ayŏng adei dôk hlăm čar Yuđa, tui si grăp čô dưi.

³⁰Diñu ngă snăn, mơĭt mnơ̆ng đru kơ phung khua mduôn hŏng kngan Y-Barnabas leh anăn Y-Sôl.