Read Rade Bruă Phung Khua Ƀĭng Kna 14 Bible Online

Bruă Phung Khua Ƀĭng Kna 14 - Rade bible

Bruă Phung Khua Ƀĭng Kna 14

¹Ti ƀuôn Ikôni Y-Pôl leh anăn Y-Barnabas mŭt mbĭt hlăm sang bi kƀĭn, leh anăn diñu mtô tơl mâo lu phung Yuđa wăt phung Grĕk đăo.

²Ƀiădah phung Yuđa amâo đăo ôh mčhur phung tue brei digơ̆ ăl kơ phung ayŏng adei.

³Snăn Y-Pôl leh anăn Y-Barnabas dôk tinăn sui blŭ klei Khua Yang hŏng klei jhŏng, leh anăn Khua Yang hưn bi sĭt kơ klei mtô kơ klei Ñu pap, êjai yua kngan diñu ngă klei bi knăl yuôm bhăn leh anăn bruă yuôm bhăn myang.

⁴Ƀiădah phung ƀuôn sang bi mbha phung; đa đa dôk tĭng kơ phung Yuđa, đa đa dôk tĭng kơ phung khua ƀĭng kna.

⁵Tơdah phung tue leh anăn phung Yuđa mbĭt hŏng phung khua digơ̆ duah ngă jhat leh anăn bhĭr boh tâo kơ phung khua ƀĭng kna,

⁶Y-Pôl leh anăn Y-Barnabas thâo leh klei anăn êlâo, đuĕ nao kơ ƀuôn Listrơ leh anăn ƀuôn Derbơ hlăm čar Likaôni, leh anăn krĭng jŭm dar.

⁷Tinăn diñu mtô klei mrâo mrang jăk.

⁸Ti ƀuôn Listrơ mâo sa čô êkei dôk gŭ êwiên jơ̆ng mơ̆ng hruê amĭ kkiêng, leh anăn ñu amâo tuôm êbat ôh.

⁹Ñu dôk hmư̆ Y-Pôl mtô. Y-Pôl dlăng kơ ñu amâo kƀreh ală, leh anăn thâo ñu mâo klei đăo dưi bi hlao ñu.

¹⁰Y-Pôl lač hŏng asăp kraih, “Kgŭ dôk dơ̆ng bĕ.” Ñu kplŏng leh anăn čhuang êbat.

¹¹Tơdah phung lu ƀuh klei Y-Pôl ngă leh, diñu ur lač hlăm klei Likaôni, “Phung yang truă rup mnuih trŭn hriê leh kơ drei!”

¹²Diñu bi anăn Yupitê kơ Y-Barnabas, leh anăn kyuadah Y-Pôl jing pô blŭ, diñu bi anăn kơ Y-Pôl Merkurơ.

¹³Khua ngă yang kơ yang Yupitê mâo sang yang ti anăp ƀuôn, đoh ba êmô leh anăn djă ba kwang mnga ti ƀăng jang čiăng myơr mnơ̆ng ngă yang mbĭt hŏng phung ƀuôn sang.

¹⁴Ƀiădah tơdah phung khua ƀĭng kna Y-Barnabas leh anăn Y-Pôl hmư̆ klei anăn, digơ̆ hiêk čhiăm ao digơ̆ leh anăn êran nao ur ti krah phung lu snei,

¹⁵“Hơi, si ngă diih ngă snăn? Hmei jing phung mnuih msĕ si diih mơh, leh anăn hmei hưn kơ diih klei mrâo mrang jăk, čiăng kơ diih lui klei ngă yang hơăi mang anei, leh anăn wĭt kơ Aê Diê hdĭp, Pô hrih leh adiê, lăn ala, êa ksĭ, leh anăn jih jang mnơ̆ng hlăm diñu.

¹⁶Hlăm ênuk êgao leh, Ñu tŭ jih jang găp djuê mnuih tui hlue êlan diñu pô;

¹⁷ƀiădah Aê Diê ăt mâo klei hưn kơ Ñu pô, kyuadah Ñu ngă jăk leh anăn brei hjan mơ̆ng adiê kơ diih, leh anăn brei yan mâo lu boh, bi hrăp ai tiê diih hŏng mnơ̆ng ƀơ̆ng huă leh anăn klei mơak.”

¹⁸Hŏng klei blŭ anăn ăt dleh dlan mơh diñu dưi ghă phung ƀuôn sang myơr mnơ̆ng ngă yang kơ diñu.

¹⁹Hlăk anăn mâo phung Yuđa hriê mơ̆ng ƀuôn Antiôs leh anăn ƀuôn Ikôni. Diñu mă ai tiê phung ƀuôn sang, leh anăn diñu bhĭr boh tâo kơ Y-Pôl leh anăn đoh ba gơ̆ ti êngao ƀuôn, mĭndah Y-Pôl djiê leh.

²⁰Ƀiădah tơdah phung ƀĭng kna bi kƀĭn jŭm gơ̆, gơ̆ kgŭ dơ̆ng leh anăn mŭt hlăm ƀuôn. Hruê mgi Y-Pôl đuĕ nao kơ ƀuôn Derbơ mbĭt hŏng Y-Barnabas.

²¹Tơdah leh diñu mtô klei mrâo mrang jăk hlăm ƀuôn anăn leh anăn mâo lu mnuih jing ƀĭng kna, diñu lŏ nao kơ ƀuôn Listrơ, ƀuôn Ikôni, leh anăn ƀuôn Antiôs,

²²lŏ bi ktang phung ƀĭng kna, mđĭ ai digơ̆ brei dôk kjăp hlăm klei đăo, leh anăn hưn kơ digơ̆ hŏng klei tŭ lu klei knap mñai kơh srăng mŭt hlăm ƀuôn ala mtao Aê Diê.

²³Tơdah diñu mjing leh phung khua mduôn kơ grăp Phung Sang Aê Diê hŏng klei wah lač leh anăn klei kăm ƀơ̆ng huă, diñu jao digơ̆ kơ Khua Yang, Pô digơ̆ đăo leh.

²⁴Leh diñu găn čar Pisidi, diñu truh kơ čar Pamphili.

²⁵Leh diñu mtô klei Aê Diê blŭ hlăm ƀuôn Pergi, diñu trŭn nao kơ ƀuôn Atali.

²⁶Dơ̆ng mơ̆ng anăn diñu đĭ kŭmpăn nao kơ ƀuôn Antiôs, ti ƀuôn anăn phung sang Aê Diê jao diñu leh hlăk êlâo kơ klei Aê Diê pap, čiăng mă bruă diñu ngă leh.

²⁷Leh diñu truh, diñu bi kƀĭn Phung Sang Aê Diê leh anăn yăl dliê jih klei Aê Diê ngă mbĭt hŏng diñu, leh anăn si Aê Diê pŏk leh ƀăng bhă klei đăo kơ phung tue.

²⁸Leh anăn diñu dôk ti anăn sui mbĭt hŏng phung ƀĭng kna.