Read Rade Bruă Phung Khua Ƀĭng Kna 21 Bible Online

Bruă Phung Khua Ƀĭng Kna 21 - Rade bible

Bruă Phung Khua Ƀĭng Kna 21

¹Leh hmei đuĕ mơ̆ng digơ̆, hmei đĭ kŭmpăn leh anăn nao phă kơ ƀuôn Kôs, hruê mgi kơ ƀuôn Rôt, leh anăn mơ̆ng anăn kơ ƀuôn Patara.

²Hmei ƀuh tinăn sa boh kŭmpăn nao kơ čar Phênisi, snăn hmei đĭ kŭmpăn anăn leh anăn nao.

³Tơdah hmei ƀuh plao êa Čiprơ, hmei găn nao phă dhŭng, hlŏng truh kơ čar Siri, leh anăn hmei trŭn ti ƀuôn Tir; kyuadah tinăn arăng suai mă mnơ̆ng kŭmpăn mdiăng.

⁴Leh hmei duah phung ƀĭng kna, hmei dôk tinăn kjuh hruê. Hŏng klei Yang Mngăt Jăk bi êdah, diñu hưn kơ Y-Pôl đăm nao ôh kơ ƀuôn Yêrusalem.

⁵Tơdah hruê hmei jưh tinăn jih leh, hmei đuĕ nao. Jih jang phung đăo mbĭt hŏng mô̆ anak diñu atăt hmei truh ti êngao ƀuôn. Hmei čuôn kơŭt ti hang êa ksĭ wah lač.

⁶Leh blŭ klei bi ktlah, hmei đĭ kŭmpăn, leh anăn diñu wĭt kơ sang.

⁷Mơ̆ng ƀuôn Tir hmei đĭ kŭmpăn nao truh ti ƀuôn Tôlômê. Hmei čhưn hŏng phung ayŏng adei đăo leh anăn dôk mbĭt hŏng diñu sa hruê.

⁸Hruê mgi hmei đuĕ nao kơ ƀuôn Sêsarê. Hmei mŭt dôk hlăm sang pô mtô Klei Mrâo Mrang Jăk Y-Philip. Ñu jing sa čô hlăm phung kjuh čô khua sang yang anăn.

⁹Ñu mâo pă čô anak mniê êra hrông khăng hưn êlâo.

¹⁰Êjai hmei dôk tinăn đa đa hruê, mâo sa čô khua pô hưn êlâo bi anăn Y-Agabus trŭn hriê mơ̆ng čar Yuđa.

¹¹Tơdah ñu truh kơ hmei, ñu mă hdrăng kơiêng Y-Pôl, kă jơ̆ng kngan ñu pô leh anăn lač, “Snei Yang Mngăt Jăk lač, ‘Msĕ snei phung Yuđa ti ƀuôn Yêrusalem srăng čăp pô hdrăng kơiêng anei, leh anăn jao gơ̆ hlăm kngan phung tue.’ ”

¹²Tơdah hmei hmư̆ klei anăn, hmei leh anăn phung dôk tinăn kwưh kơ Y-Pôl đăm đĭ nao kơ ƀuôn Yêrusalem ôh.

¹³Ƀiădah Y-Pôl lŏ wĭt lač, “Ya diih ngă, hia leh anăn bi ênguôt ai tiê kâo? Kyuadah kâo kăp tŭ amâo djŏ knŏng brei arăng krư̆ ôh, ƀiădah wăt kăp tŭ klei djiê ti ƀuôn Yêrusalem kyua anăn Khua Yang Yêsu.”

¹⁴Kyuadah ñu amâo tŭ klei hmei kwưh ôh, hmei amâo lŏ mgô̆ ôh leh anăn lač, “Brei truh tui si klei Khua Yang čiăng.”

¹⁵Sui ƀiă tinăn hmei mkra dŏ dô leh anăn đĭ nao kơ ƀuôn Yêrusalem.

¹⁶Đa đa phung ƀĭng kna mơ̆ng ƀuôn Sêsarê nao mbĭt hŏng hmei. Diñu atăt hmei kơ sang Y-Mnasôn mnuih plao êa Čiprơ, sa čô ƀĭng kna mơ̆ng mphŭn, leh anăn hmei dôk hlăm sang gơ̆.

¹⁷Tơdah hmei truh ti ƀuôn Yêrusalem, phung ayŏng adei jum hmei hŏng klei hơ̆k.

¹⁸Hruê mgi Y-Pôl nao mbĭt hŏng hmei ti sang Y-Yakơ; leh anăn jih jang phung khua mduôn dôk tinăn.

¹⁹Leh kkuh čhưn hŏng diñu, Y-Pôl yăl dliê jih klei Aê Diê yua ñu ngă leh ti krah phung tue.

²⁰Tơdah diñu hmư̆ klei anăn, diñu mpŭ mni kơ Aê Diê. Leh anăn diñu lač kơ Y-Pôl, “Ơ ayŏng, ih ƀuh mâo lu êbâo phung Yuđa đăo leh; jih jang digơ̆ hur har gưt klei bhiăn.

²¹Arăng hưn kơ digơ̆ kơ ih mtô kơ jih jang phung Yuđa dôk ti krah čar tue brei hngah Y-Môis, mtă kơ diñu đăm khăt klĭt phung anak diñu ôh, kăn tui klei bhiăn rei.

²²Snăn si srăng ngă? Sĭt nik phung lu srăng bi kƀĭn kyua diñu srăng hmư̆ kơ ih truh leh.

²³Snăn ngă bĕ tui si hmei lač kơ ih. Hmei mâo pă čô êkei ngă leh klei ƀuăn.

²⁴Atăt phung êkei anei, bi doh ih pô tui si klei bhiăn mbĭt hŏng digơ̆, leh anăn tla ênoh digơ̆ bi liê, čiăng kơ digơ̆ dưi kuêh ƀŭk digơ̆. Snăn jih jang srăng thâo klei arăng yăl dliê djŏ kơ ih amâo sĭt ôh, ƀiădah ih pô dôk dơ̆ng ƀơ̆ng huă djŏ hŏng klei bhiăn.

²⁵Bi phung tue đăo leh, hmei mơĭt leh hră čih klei hmei čuăn, brei diñu kăm ƀơ̆ng čĭm ngă yang, kăm ƀơ̆ng êrah amâodah hlô mnơ̆ng djiê kmăp, leh anăn kăm tlĕ piu.”

²⁶Snăn Y-Pôl atăt ba phung êkei anăn, leh anăn hruê mgi ñu ngă klei bi doh ñu pô mbĭt hŏng digơ̆, leh anăn mŭt hlăm sang kkuh mpŭ, čiăng hưn kơ hruê ngă klei bi doh srăng ruê̆ jing hruê grăp čô digơ̆ ngă leh klei myơr.

²⁷Tơdah giăm ruê̆ kjuh hruê anăn, phung Yuđa mơ̆ng čar Asi ƀuh leh Y-Pôl hlăm sang kkuh mpŭ, mčhur phung lu ngă klei bi rŭng leh anăn mă Y-Pôl,

²⁸Diñu ur kraih, “Ơ phung ayŏng adei Israel, hriê đru! Nĕ anei êkei hiu mtô tar ƀar bi kdơ̆ng hŏng phung ƀuôn sang, hŏng klei bhiăn, leh anăn hŏng anôk anei. Êbeh kơ anăn ñu atăt phung Grĕk mŭt hlăm sang kkuh mpŭ, leh anăn bi čhŏ anôk doh jăk anei.”

²⁹Kyuadah êlâo diñu ƀuh Y-Trôphim mơ̆ng ƀuôn Êphêsô mbĭt hŏng ñu hlăm ƀuôn, leh anăn diñu mĭn Y-Pôl atăt ba leh gơ̆ hlăm sang kkuh mpŭ.

³⁰Jih jang phung ƀuôn sang mâo klei rŭng răng, leh anăn phung ƀuôn sang hriê mbĭt. Diñu mă Y-Pôl leh anăn đoh gơ̆ kbiă mơ̆ng sang kkuh mpŭ, leh anăn arăng kđăl ƀăng jang mtam.

³¹Êjai diñu duah bi mdjiê gơ̆, arăng hưn truh kơ khua kahan prŏng kơ jih ƀuôn Yêrusalem mâo klei rŭng răng.

³²Ñu mă phung kahan mtam, wăt phung khua kahan kơ sa êtuh čô, leh anăn êran nao kơ phung lu. Tơdah phung anăn ƀuh khua kahan prŏng leh anăn phung kahan, diñu mdei čăm Y-Pôl.

³³Khua kahan prŏng nao giăm, mă Y-Pôl leh anăn mtă kơ arăng kă gơ̆ hŏng dua aruăt klei săng đai. Ñu êmuh hlei gơ̆ jing leh anăn ya klei gơ̆ ngă leh.

³⁴Đa đa phung lu ur snei, đa đa ur snăn; leh anăn kyuadah klei hao hao ñu amâo dưi thâo sĭt hlăm klei anăn ôh. Ñu mtă arăng atăt ba gơ̆ hlăm kđông.

³⁵Tơdah Y-Pôl truh ti êñan, phung kahan pŭ gơ̆ kyuadah phung lu ngă ktang snăk.

³⁶Phung lu tui hlue ur lač, “Bi mdjiê hĕ ñu!”

³⁷Êjai dơ̆ng mŭt hlăm kđông, Y-Pôl lač kơ khua kahan prŏng kơ phung kahan Rôm, “Dưi mơ̆ kâo blŭ ƀiă kơ ih?” Khua kahan prŏng lač, “Ih thâo blŭ klei Grĕk hĕ?

³⁸Snăn ih amâo jing ôh hĕ sa čô Êjip, pô mrâo anei mčhur klei krŭ kdơ̆ng leh anăn atăt ba hlăm kdrăn tač pă êbâo čô êkei knĕ?”

³⁹Y-Pôl lŏ wĭt lač, “Kâo jing sa čô Yuđa mơ̆ng ƀuôn Tars hlăm čar Silisi, sa čô mơ̆ng sa boh ƀuôn prŏng. Kâo kwưh kơ ih, brei kâo blŭ kơ phung ƀuôn sang.”

⁴⁰Leh khua kahan prŏng brei gơ̆ blŭ, Y-Pôl dôk dơ̆ng ti êñan, yơr kngan kơ phung ƀuôn sang; leh anăn tơdah mâo klei ñăt kriêp, Y-Pôl blŭ kơ diñu hlăm klei Hêbrơ, lač: