Read Rade Bruă Phung Khua Ƀĭng Kna 6 Bible Online

Bruă Phung Khua Ƀĭng Kna 6 - Rade bible

Bruă Phung Khua Ƀĭng Kna 6

¹Hlăk anăn tơdah phung ƀĭng kna lŏ thiăm lu hĭn êjai, phung Hêlênist blŭ dŭñ dŭñ kơ phung Hêbrơ, kyuadah diñu amâo hdơr ôh kơ phung mniê djiê ung Hêlênist tơdah diñu bi mbha mnơ̆ng grăp hruê.

²Phung pluh dua čô iêô jih jang phung ƀĭng kna bi kƀĭn leh anăn lač, “Amâo djŏ ôh lui hĕ klei mtô klei Aê Diê blŭ čiăng bi mbha mnơ̆ng ƀơ̆ng huă.

³Kyua anăn Ơ phung ayŏng adei, ruah bĕ mơ̆ng krah diih kjuh čô êkei mâo hing ang jăk, bŏ hŏng Yang Mngăt Jăk leh anăn hŏng klei thâo mĭn, phung hmei dưi jao bruă anei.

⁴Bi hmei srăng jao hmei pô kơ klei wah lač leh anăn mtô klei Aê Diê blŭ.”

⁵Klei diñu kčĕ bi mơak kơ jih jang phung lu. Phung lu ruah Y-Êtiên sa čô êkei bŏ hŏng klei đăo leh anăn Yang Mngăt Jăk, Y-Philip, Y-Prôkôrus, Y-Nikanôr, Y-Timôn, Y-Parmênas, leh anăn Y-Nikôlas sa čô êkei ƀuôn Antiôs mŭt klei đăo Yuđa.

⁶Diñu bi êdah phung anăn kơ phung khua ƀĭng kna, leh anăn phung khua ƀĭng kna wah lač ênă kngan ti digơ̆.

⁷Klei Aê Diê blŭ kčaĭ truh tar ƀar hĭn êjai, leh anăn phung ƀĭng kna jing lar lu hĭn hlăm ƀuôn Yêrusalem, leh anăn lu phung khua ngă yang mă tŭ klei đăo.

⁸Y-Êtiên, bŏ hŏng klei pap leh anăn klei myang, ngă klei yuôm bhăn myang leh anăn klei bi knăl yuôm bhăn ti krah phung ƀuôn sang.

⁹Ƀiădah mâo đa đa phung hlăm sang bi kƀĭn arăng pia Phung Êngiê, leh anăn phung ƀuôn Siren, phung ƀuôn Aleksandri, leh anăn phung Yuđa mơ̆ng čar Silisi leh anăn čar Asi, kgŭ dơ̆ng leh anăn bi tăng hŏng Y-Êtiên.

¹⁰Ƀiădah diñu amâo dưi bi mgăl ôh hŏng klei thâo mĭn Y-Êtiên, Yang Mngăt Jăk, Pô brei gơ̆ blŭ.

¹¹Hŏng klei hgăm diñu mtrŭt mnuih brei lač snei, “Hmei hmư̆ leh pô anei blŭ mgao hŏng Y-Môis leh anăn hŏng Aê Diê.”

¹²Diñu mčhur phung ƀuôn sang, phung khua mduôn, leh anăn phung khua čih hră. Diñu hriê mă čăp Y-Êtiên leh anăn atăt ba gơ̆ ti anăp phung khua phat kđi.

¹³Diñu brei phung kčŭt mčeh, lač, “Êkei anei amâo mdei ôh blŭ bi kdơ̆ng hŏng anôk doh jăk anei leh anăn hŏng klei bhiăn.

¹⁴Kyuadah hmei hmư̆ gơ̆ lač kơ Yêsu Ƀuôn Nasaret srăng bi rai anôk anei leh anăn srăng bi mlih klei bhiăn hdĭp Y-Môis brei leh kơ drei.”

¹⁵Leh anăn jih jang mnuih dôk gŭ hlăm klei phat kđi anăn dôk dlăng amâo kƀreh ală kơ Y-Êtiên, ƀuh ƀô̆ mta gơ̆ msĕ si ƀô̆ mta sa čô dĭng buăl jăk.