Read Rade I Kôrantô 11 Bible Online

I Kôrantô 11 - Rade bible

I Kôrantô 11

¹Brei diih jing phung tui kâo, msĕ si kâo jing pô tui Krist.

²Kâo bi mni kơ diih kyuadah diih hdơr kơ kâo hlăm jih jang klei, leh anăn tui gưt klei kâo mtô leh kơ diih.

³Ƀiădah kâo čiăng brei diih thâo săng kơ Krist jing Khua kơ grăp čô êkei, leh anăn ung jing khua kơ mô̆ ñu, leh anăn Aê Diê jing khua kơ Krist.

⁴Hlei êkei wah lač amâodah hưn êlâo mâo boh kŏ guôm, amâo mpŭ kơ Krist ôh.

⁵Ƀiădah hlei mniê wah lač amâodah hưn êlâo mâo boh kŏ amâo guôm ôh, amâo mpŭ kơ ung ñu ôh — klei anăn jing msĕ si ñu kuêh leh ƀŭk ñu.

⁶Kyuadah tơdah sa čô mniê amâo guôm boh kŏ ñu ôh, snăn brei ñu kăp hĕ ƀŭk ñu. Ƀiădah tơdah jing klei hêñ kơ sa čô mniê mâo ƀŭk kăp amâodah kuêh leh, brei ñu guôm boh kŏ ñu.

⁷Sa čô êkei amâo bhiăn ôh guôm boh kŏ ñu, kyuadah ñu jing rup leh anăn klei guh kơang kơ Aê Diê; ƀiădah mniê jing klei guh kơang kơ êkei.

⁸Kyuadah Aê Diê amâo mjing êkei mơ̆ng mniê ôh, ƀiădah Aê Diê mjing mniê mơ̆ng êkei.

⁹Kăn djŏ rei Aê Diê hrih êkei kyua mniê, ƀiădah Aê Diê hrih mniê kyua êkei.

¹⁰Snăn kyua phung dĭng buăl jăk, brei mniê mâo čhiăm guôm boh kŏ ñu jing mnơ̆ng bi knăl ñu dôk ti gŭ klei dưi ung ñu.

¹¹Ƀiădah hlăm Khua Yang, mniê yuôm mâo êkei, leh anăn êkei yuôm mâo mniê.

¹²Kyuadah msĕ si Aê Diê hrih mniê mơ̆ng êkei, msĕ snăn mơh ară anei mniê kkiêng kơ êkei. Leh anăn jih jang mnơ̆ng kbiă hriê mơ̆ng Aê Diê.

¹³Brei diih pô ksiêm, jing djŏ mơ̆ mniê wah lač kơ Aê Diê amâo guôm ôh boh kŏ?

¹⁴Amâo djŏ hĕ klei mnuih jing bi hriăm diih jing klei hêñ kơ sa čô êkei lui ƀŭk dlông?

¹⁵Ƀiădah tơdah sa čô mniê lui ƀŭk ñu dlông, jing klei guh kơang; kyuadah Aê Diê brei ƀŭk ñu jing mnơ̆ng guôm boh kŏ ñu.

¹⁶Tơdah sa čô čiăng bi tăng, hmei wăt jih jang Phung Sang Aê Diê amâo tŭ ôh ngă klei mkăn.

¹⁷Hlăm klei mtô ti gŭ anei, kâo amâo bi mni kơ diih ôh, kyuadah diih bi kƀĭn amâo djŏ čiăng jing jăk hĭn, ƀiădah jing jhat hĭn.

¹⁸Êlâo hĭn kâo hmư̆ leh tơdah diih bi kƀĭn jih Phung Sang Aê Diê, mâo klei bi kah phung ti krah diih. Kâo đăo klei anăn sa mkrah,

¹⁹kyuadah sĭt yơh mâo phung mdê mdê ti krah diih, čiăng kơ arăng dưi thâo kral hlei hlăm phung diih jing sĭt.

²⁰Tơdah diih bi kƀĭn, diih amâo ƀơ̆ng mnăm klei sĭt suôr Khua Yang ôh.

²¹Kyua êjai huă ƀơ̆ng, grăp čô ruăt ƀơ̆ng mnơ̆ng ñu pô, kyuanăn mâo pô êpa, leh anăn mâo pô kpiê ruă.

²²Si ngă? Diih amâo mâo sang pioh kơ anôk huă ƀơ̆ng amâodah mnăm mơ̆? Amâodah diih bi êmut kơ Phung Sang Aê Diê mơ̆ leh anăn bi hêñ phung amâo mâo mnơ̆ng ôh? Ya kâo srăng lač kơ diih? Kâo srăng bi mni kơ diih hlăm klei anei mơ̆? Hơăi, kâo amâo srăng bi mni kơ diih ôh.

²³Kyuadah kâo mă tŭ leh mơ̆ng Khua Yang klei kâo mtô leh mơh kơ diih: êjai mlam arăng lhiăr kơ Ñu, Khua Yang Yêsu mă kpŭng.

²⁴Leh wah lač klei bi mni, Ñu kjoh kpŭng anăn leh anăn lač, “Anei jing asei mlei Kâo kjoh leh kơ diih. Ngă bĕ klei anei čiăng bi hdơr kơ Kâo.”

²⁵Msĕ snăn mơh, leh diñu huă ƀơ̆ng Ñu mă atŏ leh anăn lač, “Atŏ anei jing klei bi mguôp mrâo hlăm êrah Kâo. Grăp blư̆ diih mnăm atŏ anei, ngă bĕ čiăng bi hdơr kơ Kâo.”

²⁶Kyuadah grăp blư̆ diih ƀơ̆ng kpŭng anei leh anăn mnăm atŏ anei, diih hưn klei Khua Yang djiê tơl Ñu lŏ hriê.

²⁷Kyuanăn hlei pô srăng ƀơ̆ng kpŭng amâodah mnăm atŏ Khua Yang hŏng klei amâo năng ôh, srăng jing soh hŏng asei mlei leh anăn êrah Khua Yang.

²⁸Brei grăp čô ksiêm ñu pô, snăn ñu dưi ƀơ̆ng kpŭng leh anăn mnăm atŏ anăn.

²⁹Kyuadah hlei pô ƀơ̆ng leh anăn mnăm amâo thâo săng ôh kơ asei mlei Khua Yang, ñu ƀơ̆ng leh anăn mnăm klei phat kđi kơ ñu pô.

³⁰Kyua klei anăn mâo lu hlăm phung diih awăt leh anăn ruă duam leh anăn đa đa djiê leh.

³¹Tơdah drei ksiêm drei pô, drei amâo srăng tŭ klei phat kđi ôh.

³²Ƀiădah tơdah Khua Yang phat kđi drei, Ñu mkra drei, čiăng kơ drei amâo srăng tŭ ôh klei bi kmhal mbĭt hŏng lăn ala.

³³Snăn, Ơ phung ayŏng adei, tơdah diih bi kƀĭn kơ klei ƀơ̆ng mnăm sĭt suôr, bi guôn bĕ hdơ̆ng diih.

³⁴Tơdah sa čô êpa, brei ñu ƀơ̆ng huă ti sang ñu pô, huĭdah diih bi kƀĭn mă tŭ klei phat kđi. Bi jih jang klei mkăn, kâo srăng mkra tơdah kâo truh.