Read Rade I Kôrantô 12 Bible Online

I Kôrantô 12 - Rade bible

I Kôrantô 12

¹Ơ phung ayŏng adei, bi kơ klei Yang Mngăt Jăk brei, kâo čiăng kơ diih thâo săng.

²Diih thâo leh êjai diih ka đăo ôh, diih klah đuĕ tui hlue rup yang kmlô, tui si arăng mtrŭt diih leh.

³Kyuanăn kâo čiăng diih thâo săng, amâo mâo sa čô mnuih blŭ hŏng Mngăt Myang Aê Diê tuôm lač, “Brei Yêsu mâo klei tăm pah!” Leh anăn amâo mâo sa čô dưi lač, “Yêsu jing Khua Yang,” knŏng tơdah Yang Mngăt Jăk atăt gai ñu.

⁴Mâo lu klei brei mdê mdê, ƀiădah mâo knŏng sa Yang Mngăt Jăk.

⁵Mâo lu bruă jao mdê mdê, ƀiădah mâo knŏng sa Khua Yang;

⁶mâo lu bruă ngă mdê mdê, ƀiădah mâo knŏng sa Aê Diê brei klei dưi ngă jih hlăm jih jang.

⁷Yang Mngăt Jăk bi êdah kơ grăp čô klei dưi čiăng đru jih jang.

⁸Kơ sa čô anei Yang Mngăt Jăk brei klei dưi blŭ hŏng klei thâo mĭn; kơ sa čô mkăn Yang Mngăt Jăk anăn mơh brei klei dưi blŭ hŏng klei thâo săng;

⁹kơ sa čô mkăn Yang Mngăt Jăk anăn mơh brei klei đăo, kơ sa čô mkăn Yang Mngăt Jăk anăn mơh brei klei dưi bi hlao arăng;

¹⁰kơ sa čô mkăn klei dưi ngă klei yuôm bhăn, kơ sa čô mkăn klei dưi hưn êlâo, kơ sa čô mkăn klei dưi thâo kral yang mdê mdê, kơ sa čô mkăn klei dưi blŭ klei tue mdê mdê, kơ sa čô mkăn klei thâo mblang klei tue.

¹¹Jih jang klei brei anăn kbiă mơ̆ng sa Yang Mngăt Jăk anăn yơh, Pô bi mbha kơ grăp čô tui si Ñu čiăng.

¹²Kyuadah msĕ si asei mlei jing sa ƀiădah mâo lu kdrêč, jih jang kdrêč hlăm asei mlei, wăt tơdah diñu jing lu dưn, mjing knŏng sa asei mlei, msĕ snăn yơh hlăm Krist.

¹³Kyuadah hŏng sa Yang Mngăt Jăk jih jang drei tŭ leh klei ƀaptem bi mguôp hlăm sa asei mlei — phung Yuđa amâodah phung Grĕk, phung hlŭn amâodah phung êngiê — leh anăn Aê Diê brei jih jang drei mnăm sa Yang Mngăt Jăk anăn.

¹⁴Kyuadah asei mlei amâo jing knŏng sa kdrêč, ƀiădah lu kdrêč.

¹⁵Tơdah jơ̆ng lač, “Kyuadah kâo amâo jing sa ƀĕ kngan, kâo amâo djŏ hlăm asei mlei ôh,” klei anăn amâo dưi bi ktlah ñu mơ̆ng asei mlei ôh.

¹⁶Leh anăn tơdah knga lač, “Kyuadah kâo amâo jing ală, kâo amâo djŏ hlăm asei mlei ôh,” klei anăn amâo dưi bi ktlah ñu mơ̆ng asei mlei ôh.

¹⁷Tơdah jih asei mlei jing ală, si asei mlei dưi hmư̆ lĕ? Tơdah jih asei mlei jing knga, ti anôk asei mlei dưi ƀâo lĕ?

¹⁸Ƀiădah tui si jing leh, Aê Diê dăp grăp kdrêč hlăm asei mlei tui si Ñu čiăng.

¹⁹Tơdah jih jang jing knŏng sa kdrêč, si dưi jing asei mlei lĕ?

²⁰Snăn, mâo lu kdrêč, ƀiădah knŏng sa asei mlei.

²¹Ală amâo dưi lač ôh kơ kngan, “Kâo amâo čiăng kơ ih ôh,” boh kŏ kăn dưi lač kơ jơ̆ng rei, “Kâo amâo čiăng kơ ih ôh.”

²²Ƀiădah ti kdrêč asei mlei dlăng msĕ si awăt hĭn, ăt jing yuôm mơh,

²³leh anăn ti kdrêč asei mlei drei mĭn amâo đei yuôm ôh, drei mpŭ lu hĭn, leh anăn ti kdrêč drei mĭn amâo siam ôh, drei mprăp bi siam hĭn.

²⁴Bi kdrêč siam leh, drei amâo ngă snăn ôh. Ƀiădah Aê Diê mkra leh asei mlei, brei klei mpŭ lu hĭn kơ kdrêč amâo siam ôh,

²⁵čiăng kơ đăm mâo klei bi kah mbha ôh hlăm asei mlei, ƀiădah grăp kdrêč bi răng kriê hdơ̆ng găp.

²⁶Tơdah sa kdrêč mâo klei knap mñai, jih jang kdrêč mâo klei knap mbĭt; tơdah sa kdrêč mâo klei mpŭ, jih jang kdrêč hơ̆k mơak mbĭt.

²⁷Diih jing asei mlei Krist, leh anăn grăp čô jing kdrêč hlăm asei mlei Ñu.

²⁸Aê Diê mdưm hlăm Phung Sang Aê Diê tal êlâo hĭn phung khua ƀĭng kna, mrô dua phung khua pô hưn êlâo, mrô tlâo phung nai mtô, phung ngă klei yuôm bhăn, phung mâo klei dưi bi hlao, phung thâo đru, phung thâo kiă kriê, leh anăn phung dưi blŭ klei tue mdê mdê.

²⁹Jih jang jing phung khua ƀĭng kna mơ̆? Jih jang jing phung khua pô hưn êlâo mơ̆? Jih jang jing phung nai mtô mơ̆? Jih jang ngă klei yuôm bhăn mơ̆?

³⁰Jih jang mâo klei dưi bi hlao mơ̆? Jih jang blŭ klei tue mdê mdê mơ̆? Jih jang dưi mblang klei tue mơ̆?

³¹Ƀiădah brei diih čiăng snăk kơ klei brei yuôm hĭn. Ară anei kâo srăng bi êdah sa êlan jăk hĭn kơ diih.