Read Rade Galati 5 Bible Online

Galati 5 - Rade bible

Galati 5

¹Krist bi mtlaih drei leh, čiăng kơ drei mâo klei êngiê. Snăn dôk kjăp bĕ, đăm lŏ mjing ih pô hlŭn klei bhiăn ôh.

²Kâo gơ̆ Y-Pôl lač kơ diih, tơdah diih tŭ klei khăt klĭt, Krist amâo srăng lŏ jing yuôm kơ diih ôh.

³Kâo lŏ mñă kơ grăp čô hlei pô tŭ klei khăt klĭt, ñu đuôm hŏng klei gưt jih jang klei bhiăn.

⁴Tơdah diih čiăng mâo klei yap kpă hŏng klei bhiăn, diih bi ktlah leh mơ̆ng Krist yơh, diih luč leh klei pap.

⁵Kyuadah hlăm Yang Mngăt Jăk hŏng klei đăo drei dôk guôn klei čang hmăng kơ klei yap kpă.

⁶Kyuadah hlăm Krist Yêsu klei khăt klĭt amâodah klei amâo khăt klĭt amâo mâo ênoh yuôm ôh, ƀiădah klei đăo mă bruă hlăm klei khăp mâo ênoh yuôm.

⁷Diih dôk êran jăk leh; hlei pô ghă diih gưt klei sĭt nik?

⁸Klei mtrŭt anăn amâo kbiă hriê mơ̆ng Pô iêô diih ôh.

⁹Kpei ƀiă dưi bi buk jih kpŭng.

¹⁰Hlăm Khua Yang kâo mâo klei knang kơ diih amâo srăng tŭ klei mĭn mdê hŏng kâo ôh; ƀiădah hlei pô dôk bi rŭng klei mĭn diih srăng tŭ klei bi kmhal.

¹¹Ơ phung ayŏng adei, tơdah kâo ăt mtô klei khăt klĭt, si ngă arăng ăt ngă jhat kơ kâo lĕ? Tơdah snăn klei bi têč hnêč kyua kyâo bi kal arăng mă mđuĕ leh.

¹²Kâo čiăng kơ phung bi rŭng diih jăk hĭn khăt mă diñu pô.

¹³Ơ phung ayŏng adei, arăng iêô leh diih kơ klei êngiê, ƀiădah đăm yua ôh klei êngiê diih jing êlan brei klei ngă tui si kđeh, ƀiădah hlăm klei khăp brei diih jing dĭng buăl hdơ̆ng diih.

¹⁴Kyuadah jih jang klei bhiăn mâo klei bi sĭt klah čŭn snei: “Khăp bĕ kơ pô riêng gah ih msĕ si kơ ih pô.”

¹⁵Ƀiădah tơdah diih bi kĕ bi lun hdơ̆ng diih, răng bĕ huĭdah diih bi rai hdơ̆ng diih.

¹⁶Ƀiădah kâo lač: Brei Yang Mngăt Jăk kiă kriê klei hdĭp diih leh anăn diih amâo srăng bi mơak kơ klei kđeh čiăng ôh.

¹⁷Kyuadah klei kđeh čiăng bi kdơ̆ng hŏng Yang Mngăt Jăk, leh anăn klei Yang Mngăt Jăk čiăng bi kdơ̆ng hŏng klei kđeh čiăng. Kyuadah dua anăn bi kdơ̆ng hdơ̆ng diñu, čiăng ghă diih ngă tui si diih čiăng.

¹⁸Ƀiădah tơdah Yang Mngăt Jăk atăt gai diih, diih amâo dôk ti gŭ klei bhiăn ôh.

¹⁹Bruă mơ̆ng kđeh bi êdah klă leh: klei knhông, klei čhŏ mrŏ, klei knhŭk knhul,

²⁰klei kkuh rup yang, klei jing mjâo, klei bi roh, klei bi msao, klei nač, klei čôñ ăl, klei čuôt klih, klei bi tăng, klei mĭn bi kah phung,

²¹klei tluh, klei kpiê ruă, klei ră huă mnăm, leh anăn jih jang klei msĕ snăn. Kâo brei diih răng msĕ si kâo hưn leh kơ diih êlâo, hlei pô ngă soh msĕ snăn amâo srăng dưn ƀuôn ala mtao Aê Diê ôh.

²²Ƀiădah boh mơ̆ng Yang Mngăt Jăk jing klei khăp, klei hơ̆k mơak, klei êđăp ênang, klei thâo gĭr, klei jăk, klei êmhač, klei sĭt suôr,

²³klei êdu êun, klei djŏ hnơ̆ng; amâo tuôm mâo klei bhiăn dưi ghă klei anăn ôh.

²⁴Hlei pô jing dŏ Krist Yêsu pơ̆ng leh kđeh mbĭt hŏng klei ñu tluh leh anăn klei ñu čiăng ti kyâo bi kal.

²⁵Tơdah drei dôk hdĭp kyua Yang Mngăt Jăk, brei drei dôk dơ̆ng ƀơ̆ng huă tui si Yang Mngăt Jăk mơh.

²⁶Đăm duah klei hing ang amâo sĭt bi nač hdơ̆ng găp leh anăn đăm čôñ ăl hdơ̆ng găp ôh.