Read Rade Êphêsô 1 Bible Online

Êphêsô 1 - Rade bible

Êphêsô 1

¹Kâo gơ̆ Y-Pôl, sa čô khua ƀĭng kna Krist Yêsu, tui si klei Aê Diê čiăng, Čih mơĭt kơ phung doh jăk dôk ti Êphêsô, phung sĭt suôr hlăm Krist Yêsu.

²Brei diih mâo klei pap leh anăn klei êđăp ênang mơ̆ng Aê Diê Ama drei leh anăn Khua Yang Yêsu Krist.

³Bi mni kơ Aê Diê, Ama Khua Yang drei Yêsu Krist, Pô brei leh kơ drei hlăm Krist djăp mta klei jăk jĭn myang ti jih anôk hlăm adiê.

⁴Ñu ruah leh drei hlăm Krist êlâo kơ klei hrih lăn ala, čiăng kơ drei jing doh jăk leh anăn amâo mâo klei ƀuah ôh ti anăp Ñu.

⁵Kyua klei Ñu khăp, Ñu čuăn leh kơ drei mơ̆ng êlâo, brei jing phung anak Ñu hlăm Yêsu Krist, tui si klei mơak leh anăn čiăng jăk,

⁶Ñu čiăng kơ drei bi mni kơ klei pap guh kơang Ñu, Ñu brei leh kơ drei êbeh dlai hlăm Anak Ñu khăp êdimima.

⁷Hlăm Pô anăn drei mâo klei bi tui hŏng êrah Gơ̆, klei pap brei kơ klei soh drei, tui si klei mdrŏng klei Ñu pap,

⁸Ñu tuh leh êbeh dlai kơ drei hlăm jih klei thâo mĭn leh anăn klei thâo săng.

⁹Aê Diê brei drei thâo leh klei yuôm hgăm hlăm klei Ñu čiăng, tui si klei Ñu mơak čuăn leh êlâo hlăm Krist,

¹⁰čiăng bi truh hlăm ênuk Ñu bi kčah leh bi mguôp mbĭt jih jang mnơ̆ng kơ sa čô khua, jing Krist, mnơ̆ng hlăm adiê wăt mnơ̆ng hlăm lăn ala.

¹¹Hlăm Krist, drei jing pô dưn ngăn tui si klei čuăn mơ̆ng Pô ngă jih jang mnơ̆ng tui si hdră Ñu čiăng,

¹²phung hmei čang hmăng leh êlâo hlăm Krist, Aê Diê čuăn ruah leh brei dôk hdĭp pioh bi mni kơ klei guh kơang Ñu.

¹³Hlăm Krist diih msĕ mơh, tơdah hmư̆ leh klei blŭ klei sĭt nik, jing klei mrâo mrang jăk kơ klei bi mtlaih diih, đăo leh kơ Ñu, leh anăn Aê Diê kđăm leh diih hŏng Yang Mngăt Jăk Ñu ƀuăn leh.

¹⁴Yang Mngăt Jăk anăn jing mnơ̆ng ƀuăn rơ̆ng kơ klei drei dưn ngăn, tơl drei mă tŭ ngăn dưn anăn, pioh bi mni kơ klei guh kơang Ñu.

¹⁵Kyuanăn leh kâo hmư̆ kơ klei diih đăo kơ Khua Yang Yêsu Krist, leh anăn kơ klei diih khăp kơ jih jang phung doh jăk,

¹⁶kâo amâo mdei ôh bi mni kơ Aê Diê kyua diih, hdơr kơ diih êjai kâo wah lač.

¹⁷Kâo akâo kơ Aê Diê Khua Yang drei Yêsu Krist, Ama klei guh kơang, srăng brei kơ diih Mngăt Myang klei thâo mĭn leh anăn klei bi êdah, čiăng thâo kral Ñu,

¹⁸čiăng kơ ală ai tiê diih jing mngač, snăn kơh diih dưi thâo ya jing klei čang hmăng diih mâo kyua klei Ñu iêô diih leh, ya jing klei mdrŏng klei dưn ngăn guh kơang Ñu hlăm phung doh jăk,

¹⁹leh anăn ya klei dưi prŏng amâo dưi mkă ôh hlăm drei phung đăo, tui si bruă klei myang prŏng Ñu.

²⁰Aê Diê mă bruă leh hlăm Krist tơdah Ñu bi hdĭp Gơ̆ leh mơ̆ng phung djiê leh anăn brei Gơ̆ dôk gŭ tĭng hnuă Ñu ti jih anôk hlăm adiê,

²¹ti dlông hĭn kơ jih jang phung khua kiă kriê, phung mâo klei dưi, phung mâo klei myang, phung khua prŏng, leh anăn ti dlông hĭn jih jang anăn arăng dưi hưn, amâo djŏ knŏng ênuk anei ôh, ƀiădah msĕ mơh wăt hlăm ênuk srăng truh.

²²Ñu dưm leh jih jang mnơ̆ng ti gŭ jơ̆ng Krist leh anăn brei Gơ̆ jing akŏ kơ jih jang mnơ̆ng kơ Phung Sang Aê Diê.

²³Phung Sang Aê Diê anăn jing asei mlei Krist, čiăng lač klei bŏ ênŭm Gơ̆, Pô bi bŏ ênŭm jih hlăm jih jang.