Read Rade Y-Yôsuê 15 Bible Online

Y-Yôsuê 15 - Rade bible

Y-Yôsuê 15

¹Kdrêč pioh kơ găp djuê phung ƀuôn sang Yuđa tui si sang diñu djŏ tĭng dhŭng truh kơ kdriêl lăn Êđôm, truh kơ kdrăn tač Sin kbưi hĭn phă dhŭng.

²Kdriêl diñu tĭng dhŭng nao mơ̆ng knhal Êa Ksĭ Djiê, mơ̆ng kdrŭn phă dhŭng.

³Ñu hlue nanao phă dhŭng anôk đĭ ti Akrabim, găn hlue kdrăn tač Sin, leh anăn đĭ hlue phă dhŭng Kadês-Barnê, găn Hêsron, truh ti Adar, wir phă Karka,

⁴găn hlue truh ti Asmôn, lŏ hlue nanao truh kơ êa hnoh Êjip, leh anăn tuč ti êa ksĭ. Anăn srăng jing kdriêl diih tĭng dhŭng.

⁵Kdriêl ngŏ jing Êa Ksĭ Djiê, truh ti mbah êa krông Yurdan. Kdriêl dưr dơ̆ng mơ̆ng kdrŭn êa ksĭ ti mbah êa krông Yurdan;

⁶ñu đĭ truh kơ Bet-Hôgla, găn tĭng dưr Bet-Arba, leh anăn đĭ truh kơ boh tâo Y-Bôhan, anak êkei Y-Ruben;

⁷leh anăn đĭ kơ Dêbir mơ̆ng tlung Akôr, leh anăn hlŏng nao phă dưr, wir phă Gilgal, phă hŏng anôk đĭ Adumim, tĭng dhŭng tlung. Kdriêl găn nao kơ akŏ êa Ên-Sêmes, leh anăn tuč ti akŏ êa Ên-Rôgel;

⁸mơ̆ng anăn kdriêl đĭ giăm tlung anak êkei Y-Hinôm ti dhŭng giăm phung Jêbus (čiăng lač ƀuôn Yêrusalem); leh anăn kdriêl đĭ truh kơ čŏng čư̆ giăm tlung Y-Hinôm tĭng yŭ, ti knhal dưr tlung Rêphaim.

⁹Mơ̆ng čŏng čư̆ kdriêl nao truh kơ akŏ êa Nêptôa, leh anăn mơ̆ng anăn truh ti ƀuôn hlăm čư̆ Êphron; mơ̆ng anăn kdriêl weh dar truh ti Balah (jing Kiriat-Jêrim);

¹⁰leh anăn kdriêl weh dar phă yŭ truh ti čư̆ Sêir, truh tĭng dưr čư̆ Jêrim (amâodah Čhêsalon), trŭn ti Bet-Sêmes, giăm Timna.

¹¹Kdriêl lŏ hlue nao tĭng dưr kbuôn Êkron, weh dar truh kơ Sikêron, găn hlue čư̆ Balah, truh kơ Japhel; leh anăn tuč ti êa ksĭ.

¹²Kdriêl yŭ jing hlue hang Êa Ksĭ Prŏng. Anăn yơh jing kdriêl jŭm dar phung ƀuôn sang Yuđa tui si găp djuê diñu.

¹³Tui si klei Yêhôwa mtă leh kơ Y-Yôsuê, ñu brei kơ Y-Kalep anak êkei Y-Jêphunê sa kdrêč ti krah phung ƀuôn sang Yuđa, Kiriat-Arba, lŏ bi anăn ƀuôn prŏng Hêbron (Y-Arba jing ama Y-Anak).

¹⁴Y-Kalep suôt mơ̆ng anăn tlâo čô anak êkei Y-Anak: Y-Sêsai, Y-Ahiman, leh anăn Y-Talmai, phung anak čô Y-Anak.

¹⁵Mơ̆ng anăn ñu đĭ nao ngă kơ phung dôk hlăm ƀuôn prŏng Dêbir. Anăn ƀuôn prŏng Dêbir mphŭn dô jing Kiriat-Sêpher.

¹⁶Y-Kalep lač, “Hlei pô nao mblah Kiriat-Sêpher leh anăn mă gơ̆, kâo srăng brei anak mniê kâo H'Aksa jing mô̆ kơ ñu.”

¹⁷Y-Ôtniêl, anak êkei Y-Kênas, adei Y-Kalep, mă ƀuôn anăn, leh anăn Y-Kalep brei anak mniê gơ̆ H'Aksa jing mô̆ kơ ñu.

¹⁸Tơdah mniê anăn nao dôk ñu, gơ̆ mtrŭt ñu akâo sa bĭt hma mơ̆ng ama gơ̆. Mniê anăn trŭn mơ̆ng aseh gơ̆ leh anăn Y-Kalep lač kơ gơ̆, “Ya ih čiăng?”

¹⁹Gơ̆ lač kơ ñu, “Brei kơ kâo sa mta mnơ̆ng; kyuadah ih brei leh kâo dôk hlăm čar Dhŭng. Brei kơ kâo akŏ êa msĕ mơh.” Leh anăn Y-Kalep brei kơ gơ̆ jih akŏ êa ti dlông leh anăn ti gŭ.

²⁰Anei jing ngăn dưn kơ phung ƀuôn sang Yuđa tui si găp djuê diñu.

²¹Jih jang ƀuôn prŏng jing dŏ phung ƀuôn sang Yuđa ti knhal dhŭng, phă kdriêl lăn čar Êđôm mâo: Kapsêel, Êder, Jagur,

²²Kina, Dimôna, Adada,

²³Kadês, Hasôr, Itnan,

²⁴Sip, Têlem, Bêalôt,

²⁵Hasôr-Hadata, Kêriôt-Hêsron (lŏ bi anăn ƀuôn Hasôr),

²⁶Amam, Sêma, Môlada,

²⁷Hasar-Gada, Hêsmon, Bet-Pêlet,

²⁸Hasar-Sual, Bêr-Sêba, Bisôtia,

²⁹Balah, Im, Êsem,

³⁰Êltôlat, Čhêsil, Hôrma,

³¹Siklak, Madmana, Sansana,

³²Lêbaôt, Silhim, Ain, leh anăn Rimôn; jih jang ƀuôn anăn mâo dua pluh dua păn mbĭt hŏng ƀuôn điêt diñu.

³³Hlăm lăn dap mâo ƀuôn: Êstaôl, Sôra, Asna,

³⁴Sanôa, Ênganim, Tapua, Ênam,

³⁵Jarmut, Adulam, Sôkô, Asêka,

³⁶Saraim, Aditaim, Gêdêra, Gêdêrôtaim, pluh pă ƀuôn mbĭt hŏng ƀuôn điêt diñu.

³⁷Ƀuôn Sênan, Hadasa, Mikdalgat,

³⁸Dilin, Mispê, Joktêel,

³⁹Lakis, Bôskat, Êglon,

⁴⁰Kabon, Lahmam, Čhitlis,

⁴¹Gêdêrôt, Bet-Dagôn, Nama, leh anăn Makêda; pluh năm boh ƀuôn mbĭt hŏng ƀuôn điêt diñu,

⁴²ƀuôn Lipna, Êther, Asan,

⁴³Ipta, Asna, Nêsip,

⁴⁴Kaila, Aksip, leh anăn Marêsa; dua păn boh ƀuôn mbĭt hŏng ƀuôn điêt diñu.

⁴⁵Ƀuôn Êkron mbĭt hŏng ƀuôn prŏng leh anăn ƀuôn điêt diñu;

⁴⁶dơ̆ng mơ̆ng ƀuôn Êkron truh ti êa ksĭ, jih ƀuôn prŏng giăm ƀuôn Asdôt mbĭt hŏng ƀuôn điêt diñu.

⁴⁷Ƀuôn Asdôt leh anăn ƀuôn prŏng leh anăn điêt ñu; ƀuôn Gasa leh anăn ƀuôn prŏng leh anăn điêt ñu; truh kơ êa hnoh Êjip, leh anăn kơ Êa Ksĭ Prŏng wăt ktuê hang ñu.

⁴⁸Hlăm čar kngư mâo ƀuôn: Samir, Jatir, Sôkô,

⁴⁹Dana, Kiriat-Sana (lŏ bi anăn ƀuôn Dêbir),

⁵⁰Anap, Êstêmô, Anim,

⁵¹Gôsen, Hôlon, leh anăn Gilô; pluh sa boh ƀuôn prŏng mbĭt hŏng ƀuôn điêt diñu.

⁵²Ƀuôn Arap, Duma, Êsan,

⁵³Janim, Bet-Tapua, Aphêka,

⁵⁴Humta, Kiriat-Arba (lŏ bi anăn ƀuôn Hêbron), leh anăn Siôr; dua păn boh ƀuôn mbĭt hŏng ƀuôn điêt diñu.

⁵⁵Ƀuôn Maôn, Karmel, Sip, Juta,

⁵⁶Jesrêel, Jokdam, Sanôa,

⁵⁷Kain, Gibêa, leh anăn Timna; pluh boh ƀuôn mbĭt hŏng ƀuôn điêt diñu.

⁵⁸Ƀuôn Halhul, Bet-Sur, Gêdôr,

⁵⁹Marat, Bet-Anôt, leh anăn Êltêkon; năm boh ƀuôn mbĭt hŏng ƀuôn điêt diñu.

⁶⁰Ƀuôn Kiriat-Baal (lŏ bi anăn Kiriat-Jêrim), Raba; dua boh ƀuôn mbĭt hŏng ƀuôn điêt diñu.

⁶¹Hlăm kdrăn tač mâo ƀuôn: Bet-Arba, Midin, Sêkaka,

⁶²Nipsan, Hra, leh anăn Êngêdi; năm boh ƀuôn mbĭt hŏng ƀuôn điêt diñu.

⁶³Ƀiădah phung ƀuôn sang Yuđa amâo dưi suôt ôh phung Jêbusit dôk hlăm ƀuôn Yêrusalem. Snăn phung Jêbusit ăt dôk mbĭt hŏng phung ƀuôn sang Yuđa ti ƀuôn Yêrusalem hlŏng kơ hruê anei.