Read Rade II Y-Timôthê 3 Bible Online

II Y-Timôthê 3 - Rade bible

II Y-Timôthê 3

¹Ƀiădah brei ih thâo săng klei anei, hlăm hruê knhal tuč srăng mâo ênuk dleh.

²Kyuadah phung mnuih srăng čuôt klih, khăp kơ prăk, mgao, ngă krưh, blŭ jhat, amâo thâo gưt asăp amĭ ama, amâo thâo hdơr knga, amâo thâo mpŭ kơ Aê Diê ôh,

³amâo uêñ kơ arăng, amâo thâo pap, mčeh luar, êgao hnơ̆ng, măk ƀai, bi êmut kơ klei jăk,

⁴lhiăr, djăl krêñ, mĭn kơ pô thâo lu, khăp kơ klei hlăp amâo djŏ kơ Aê Diê ôh,

⁵ngă klei mpŭ knŏng ti êngao ƀiădah hngah klei myang mơ̆ng klei kkuh mpŭ anăn. Brei ih đuĕ mơ̆ng phung anăn.

⁶Kyuadah hlăm phung diñu mâo đa đa mŭt hlăm sang arăng leh anăn mplư phung mniê awăt, ktrŏ hŏng klei soh dôk ngă tui si djăp mta klei tluh mtrŭt.

⁷Digơ̆ čiăng hriăm nanao, ƀiădah amâo dưi truh kơ klei thâo săng klei sĭt nik ôh.

⁸Msĕ si Y-Janê leh anăn Y-Jambrê bi kdơ̆ng hŏng Y-Môis, msĕ mơh phung mnuih anăn bi kdơ̆ng hŏng klei sĭt nik. Klei mĭn diñu jhat leh, leh anăn klei diñu đăo amâo jing sĭt ôh.

⁹Ƀiădah bruă diñu amâo srăng jing ôh, kyuadah klei mluk diñu srăng bi êdah kơ jih jang, msĕ si truh leh kơ dua čô êkei anăn.

¹⁰Ih tui hlue leh klei kâo mtô, klei kâo dôk dơ̆ng ƀơ̆ng huă, klei kâo tui duah hlăm klei hdĭp anei, klei kâo đăo, klei kâo gĭr, klei kâo khăp, klei kâo dôk kjăp,

¹¹klei arăng ngă jhat kơ kâo, klei knap mñai kâo tŭ, klei truh leh kơ kâo ti ƀuôn Antiôs, ti ƀuôn Ikôni, leh anăn ti ƀuôn Listrơ, ya klei arăng ngă jhat kâo tŭ leh; ƀiădah Khua Yang bi mtlaih kâo leh mơ̆ng jih klei anăn.

¹²Sĭt nik jih jang hlei pô čiăng hdĭp doh jăk hlăm Krist Yêsu srăng tŭ klei arăng ngă jhat.

¹³Ƀiădah phung ƀai leh anăn phung ai ngăm srăng jing jhat hĭn êjai, mplư arăng leh anăn arăng mplư diñu.

¹⁴Ƀiădah bi kơ ih, dôk kjăp bĕ hlăm klei ih hriăm leh anăn đăo sĭt leh. Ih thâo mơ̆ng hlei pô ih hriăm leh klei anăn,

¹⁵leh anăn si ih thâo leh mơ̆ng hlăk hđeh klei čih doh jăk dưi bi hriăm ih kơ klei bi mtlaih hŏng klei đăo hlăm Krist Yêsu.

¹⁶Jih jang klei čih hlăm hdruôm hră Klei Aê Diê Blŭ kbiă hriê mơ̆ng klei Aê Diê ƀhur êwa, jing yuôm pioh mtô, ƀuah, mkra, leh anăn bi hriăm arăng klei kpă ênô,

¹⁷čiăng kơ mnuih Aê Diê dưi jing klă, mâo klei mprăp leh dưi ngă djăp mta bruă jăk.