Read Rade Hêbrơ 1 Bible Online

Hêbrơ 1 - Rade bible

Hêbrơ 1

¹Lu blư̆ leh anăn hlăm lu êlan mdê mdê Aê Diê blŭ leh mphŭn dô kơ phung aê drei hŏng phung khua pô hưn êlâo;

²ƀiădah hlăm ênuk knhal tuč anei Ñu blŭ leh kơ drei hŏng Anak Êkei Ñu. Aê Diê brei Gơ̆ jing Pô dưn jih jang mnơ̆ng, hŏng Gơ̆ msĕ mơh Ñu hrih leh lăn adiê.

³Gơ̆ jing klei ktlă klei guh kơang Aê Diê, leh anăn jing rup kdrưh nik hŏng Aê Diê. Gơ̆ krơ̆ng lăn adiê hŏng klei Gơ̆ blŭ myang. Tơdah leh Gơ̆ ngă klei bi doh klei soh mnuih, Gơ̆ dôk gŭ tĭng hnuă kơ Pô Guh Kơang ti dlông.

⁴Aê Diê brei Gơ̆ jing prŏng hĭn kơ phung dĭng buăl jăk, msĕ si anăn Gơ̆ mâo leh jing prŏng hĭn kơ anăn phung dĭng buăl jăk.

⁵Kyuadah Aê Diê amâo tuôm lač ôh kơ sa čô hlăm phung dĭng buăl jăk Ñu snei, “Ih jing Anak Kâo, Kâo kkiêng kơ ih hruê anei” kăn Ñu tuôm lač rei, “Kâo srăng jing Ama ñu, leh anăn ñu srăng jing Anak Kâo”

⁶Leh anăn tơdah Ñu brei Anak kkiêng tal êlâo mŭt hlăm lăn ala, Ñu lač, “Brei jih jang phung dĭng buăl jăk Aê Diê kkuh mpŭ kơ Gơ̆.”

⁷Ñu lač djŏ kơ phung dĭng buăl jăk, “Ñu brei phung dĭng buăl jăk Ñu jing angĭn, leh anăn phung dĭng buăl Ñu jing êlah pui.”

⁸Ƀiădah Ñu lač djŏ kơ Anak Ñu, “Ơ Aê Diê, jhưng mtao Ih dôk nanao hlŏng lar, leh anăn giê mtao Ih kiă kriê ƀuôn ala mtao jing giê mtao kpă ênô.

⁹Ih khăp leh kơ klei kpă ênô, leh anăn bi êmut leh kơ klei soh. Kyuanăn Aê Diê, Aê Diê Ih, trôč leh êa ƀâo mngưi klei hơ̆k mơak kơ Ih kdlưn hĭn kơ phung ƀĭng găp Ih.”

¹⁰Leh anăn, “Ơ Khua Yang, hlăk mphŭn dơ̆ng Ih mdơ̆ng leh atur lăn ala, leh anăn jih adiê jing bruă kngan Ih ngă;

¹¹Jih mnơ̆ng anăn srăng rai tuč, ƀiădah Ih ăt dôk; digơ̆ srăng sô msĕ si čhiăm ao;

¹²Ih srăng klĭt digơ̆ msĕ si sa blah ao jhung, leh anăn digơ̆ srăng bi mlih msĕ si čhum ao. Ƀiădah Ih ăt dôk msĕ, leh anăn thŭn Ih amâo srăng thâo tuč ôh.”

¹³Aê Diê amâo tuôm lač ôh kơ sa čô hlăm phung dĭng buăl jăk Ñu snei,, “Dôk gŭ bĕ ih tĭng hnuă Kâo, tơl Kâo brei phung roh ih jing mdhô̆ trông jơ̆ng.”

¹⁴Snăn, hlei jing phung dĭng buăl jăk? Amâo djŏ hĕ jih jang diñu jing phung yang Aê Diê tiŏ nao mă bruă kơ phung srăng dưn klei bi mtlaih?