Read Rade Hêbrơ 3 Bible Online

Hêbrơ 3 - Rade bible

Hêbrơ 3

¹Snăn Ơ phung ayŏng adei doh jăk, phung mâo leh klei iêô kơ adiê, brei diih mĭn kơ Yêsu, Pô jing khua ƀĭng kna leh anăn khua ngă yang prŏng kơ klei đăo drei hưn.

²Ñu dôk sĭt suôr leh hŏng Pô mdưm Ñu, msĕ si Y-Môis dôk sĭt suôr hlăm jih sang Aê Diê.

³Ƀiădah Aê Diê yap Yêsu năng mâo klei guh kơang kdlưn hĭn kơ Y-Môis msĕ si pô ngă sang mâo klei mpŭ kdlưn hĭn kơ sang ñu ngă.

⁴(Kyuadah grăp boh sang mâo pô ngă ñu, ƀiădah Pô ngă jih jang mnơ̆ng jing Aê Diê.)

⁵Y-Môis dôk sĭt suôr hlăm jih sang Aê Diê msĕ si sa čô dĭng buăl, čiăng hưn bi sĭt kơ jih klei arăng srăng blŭ êdei.

⁶Ƀiădah Krist dôk sĭt suôr msĕ si sa čô anak êkei kiă sang Aê Diê. Drei jing sang Ñu tơdah drei djă pioh kjăp klei knang leh anăn klei jhŏng hlăm klei drei čang hmăng.

⁷Kyuanăn tui si Yang Mngăt Jăk lač, “Hruê anei tơdah diih hmư̆ asăp Ñu,

⁸đăm bi khăng ai tiê diih ôh msĕ si hlăk hruê arăng bi kdơ̆ng, hlăk hruê mâo klei lông dlăng hlăm kdrăn tač;

⁹tinăn phung aê diih lông dlăng Kâo, wăt tơdah ƀuh bruă Kâo êjai pă pluh thŭn.

¹⁰Kyuanăn Kâo ngêñ leh kơ phung ênuk anăn, leh anăn lač, ‘Ai tiê diñu klah đuĕ nanao; diñu amâo thâo bĭt êlan Kâo ôh.’

¹¹Tui si klei Kâo kat asei leh hlăm klei Kâo ngêñ, ‘Diñu amâo srăng mŭt mdei ôh hlăm čar Kâo brei leh kơ diñu.’ ”

¹²Ơ phung ayŏng adei, răng bĕ, huĭdah sa čô hlăm phung diih mâo ai tiê jhat amâo đăo ôh, atăt diih lui wir Aê Diê hdĭp.

¹³Ƀiădah mtrŭt hdơ̆ng diih grăp hruê êjai arăng pia “Hruê anei”, amâo čiăng kơ sa čô hlăm phung diih mâo ai tiê khăng kyua klei soh mplư.

¹⁴Kyuadah drei mâo kdrêč mbĭt hŏng Krist knŏng tơdah drei dôk kjăp hlăm klei drei knang êlâo tơl knhal tuč,

¹⁵tui si Klei Aê Diê Blŭ lač, “Hruê anei, tơdah diih hmư̆ asăp Ñu, đăm bi khăng ai tiê diih ôh msĕ si ti hruê arăng bi kdơ̆ng.”

¹⁶Hlei jing phung hmư̆ ƀiădah ăt bi kdơ̆ng? Amâo djŏ hĕ jih jang phung Y-Môis atăt kbiă leh mơ̆ng čar Êjip?

¹⁷Leh anăn kơ hlei phung Aê Diê ngêñ êjai pă pluh thŭn? Amâo djŏ hĕ phung ngă soh leh, asei mlei digơ̆ djiê hlăm kdrăn tač?

¹⁸Leh anăn kơ hlei phung Ñu kat asei amâo brei mŭt mdei mbĭt hŏng Ñu ôh? Amâo djŏ hĕ kơ phung amâo gưt asăp ôh?

¹⁹Snăn drei ƀuh digơ̆ amâo dưi mŭt hlăm klei mdei kyua klei amâo đăo.