Read Rade I Y-Pêtrôs 1 Bible Online

I Y-Pêtrôs 1 - Rade bible

I Y-Pêtrôs 1

¹Kâo gơ̆, Y-Pêtrôs, sa čô khua ƀĭng kna Yêsu Krist, čih mơĭt kơ phung bra đuĕ dôk hlăm čar Pônt, Galati, Kapadôs, Asi, leh anăn Bithini,

²phung Aê Diê Ama ruah leh anăn čuăn leh, phung Yang Mngăt Jăk pioh brei leh kơ klei gưt asăp Yêsu Krist leh anăn kơ klei hƀrah hŏng êrah Ñu: Akâo kơ Aê Diê brei klei pap leh anăn klei êđăp ênang êbeh dlai kơ diih.

³Mpŭ mni kơ Aê Diê, Ama Khua Yang drei Yêsu Krist! Hŏng klei Ñu pap prŏng snăk Ñu bi kkiêng drei mrâo leh, brei drei mâo klei čang hmăng hdĭp kyua klei Yêsu Krist kbiă lŏ hdĭp mơ̆ng phung djiê.

⁴Leh anăn Ñu brei mơh kơ drei ngăn dưn amâo thâo rai, amâo thâo čhŏ, amâo thâo dliu ôh, pioh leh hlăm adiê kơ diih,

⁵phung Aê Diê kiă kriê hŏng klei myang Ñu kyua klei đăo, čiăng mâo klei bi mtlaih giăm bi êdah hlăm ênuk knhal tuč.

⁶Hlăm klei anăn diih hơ̆k mơak, wăt tơdah ară anei năng ai diih srăng tŭ bhiâo klei lông dlăng lu mta dưn,

⁷čiăng kơ klei diih đăo sĭt nik jing yuôm hĭn kơ mah thâo rai tuč arăng lông dlăng hlăm pui, dưi mâo klei bi mni, klei guh kơang, leh anăn klei mpŭ ti hruê Yêsu Krist srăng bi êdah.

⁸Wăt tơdah diih amâo tuôm ƀuh Ñu ôh, diih khăp leh kơ Ñu. Wăt tơdah diih amâo tuôm ƀuh Ñu ôh ară anei, diih đăo leh kơ Ñu leh anăn hơ̆k mơak hŏng klei mơak guh kơang amâo thâo mblang.

⁹Kyuadah diih mă tŭ leh klei bi mtlaih kơ mngăt diih, anăn yơh jing klei kñăm čiăng kơ klei diih đăo kơ Ñu.

¹⁰Phung khua pô hưn êlâo hưn êlâo leh kơ klei pap pioh leh kơ diih, leh anăn diñu duah ksiêm bi nik kơ klei bi mtlaih anăn.

¹¹Diñu duah čiăng thâo ênuk leh anăn si klei Yang Mngăt Jăk Krist hlăm diñu bi êdah, diñu hưn êlâo klei knap mñai Krist leh anăn klei guh kơang srăng tui hlue.

¹²Aê Diê bi êdah leh kơ diñu bruă diñu ngă amâo djŏ kơ diñu pô ôh, ƀiădah kơ diih ară anei yơh. Klei anăn phung mtô klei mrâo mrang jăk hŏng Yang Mngăt Jăk Aê Diê tiŏ hriê leh mơ̆ng adiê hưn kơ diih. Wăt phung dĭng buăl jăk Aê Diê čiăng ksiêm dlăng klei anăn mơh.

¹³Kyuanăn bi kjăp bĕ klei mĭn diih, dôk djŏ hnơ̆ng, čang hmăng sĭt kơ klei pap srăng truh kơ diih ti hruê Yêsu Krist srăng bi êdah.

¹⁴Msĕ si phung anak thâo gưt asăp, đăm tui ôh klei tluh diih mâo mphŭn dô hlăk diih ka thâo săng ôh.

¹⁵Ƀiădah msĕ si Pô iêô diih jing doh jăk, brei diih pô jing doh jăk msĕ mơh hlăm jih klei diih dôk dơ̆ng ƀơ̆ng huă.

¹⁶Kyuadah Klei Aê Diê Blŭ čih leh, “Brei diih jing doh jăk, kyuadah Kâo pô jing doh jăk.”

¹⁷Leh anăn tơdah diih iêô Ama êjai wah lač kơ Aê Diê, Pô phat kđi grăp čô tui si bruă ñu amâo dlăng mnuih ti êngao ôh, brei diih hdĭp hŏng klei huĭ mpŭ êjai ênuk bhiâo diih dôk ti lăn ala.

¹⁸Diih thâo leh amâo djŏ hŏng mnơ̆ng thâo rai luč msĕ si prăk amâodah mah ôh Aê Diê bi tui leh diih mơ̆ng klei bhiăn hơăi mang kbiă hriê mơ̆ng phung aê aduôn diih đưm,

¹⁹ƀiădah hŏng êrah yuôm Krist, msĕ si êrah sa drei êđai biăp amâo mâo anôk jhat, amâo mâo anôk djiu ruă ôh.

²⁰Aê Diê čuăn pioh ñu leh mơ̆ng mphŭn klei hrih lăn ala, ƀiădah bi êdah leh hlăm ênuk knhal tuč kyua diih.

²¹Hlăm Krist anăn diih mâo leh klei knang kơ Aê Diê, Pô bi kbiă lŏ hdĭp Ñu mơ̆ng phung djiê leh anăn brei kơ Ñu klei guh kơang, čiăng kơ diih đăo leh anăn čang hmăng kơ Aê Diê.

²²Diih bi doh leh mngăt diih hŏng klei gưt asăp kơ klei sĭt nik, čiăng mâo klei khăp sĭt suôr kơ phung ayŏng amai adei. Snăn brei diih bi khăp hdơ̆ng diih hŏng jih ai tiê.

²³Diih mâo leh klei lŏ bi kkiêng mrâo, amâo djŏ hŏng mjeh thâo rai tuč ôh, ƀiădah hŏng mjeh amâo thâo rai tuč, hŏng klei Aê Diê blŭ hdĭp leh anăn ăt dôk nanao.

²⁴Kyuadah “Jih jang kđeh jing msĕ si rơ̆k, leh anăn jih klei guh kơang ñu msĕ si mnga rơ̆k. Rơ̆k krô, leh anăn mnga ñu luh,

²⁵ƀiădah klei Khua Yang blŭ dôk nanao hlŏng lar.” Klei blŭ anăn jing klei mrâo mrang jăk diih hmư̆ leh.