Read Rade I Y-Pêtrôs 2 Bible Online

I Y-Pêtrôs 2 - Rade bible

I Y-Pêtrôs 2

¹Kyuanăn brei diih lui klei ƀai, jih klei mnêč, klei ai ngăm, klei nač, leh anăn jih klei mčeh luar.

²Msĕ si phung hđeh mrâo kkiêng, brei diih mhao kơ êa ksâo doh kơ ai mĭn, čiăng kơ hŏng mnơ̆ng anăn diih dưi hriê kơ prŏng hlăm klei bi mtlaih,

³tơdah diih djiêl thâo sĭt Khua Yang jing jăk.

⁴Hriê bĕ giăm Ñu, Pô jing Boh Tâo hdĭp, phung mnuih hngah leh ƀiădah jing Pô Aê Diê ruah leh anăn yap yuôm.

⁵Diih msĕ si boh tâo hdĭp, brei Aê Diê mdơ̆ng diih pô hlăm sa boh sang myang, čiăng jing phung khua ngă yang doh jăk, čiăng myơr mnơ̆ng ngă yang myang bi mơak kơ Aê Diê hlăm Yêsu Krist.

⁶Kyuadah Klei Aê Diê Blŭ čih leh: “Nĕ anei, Kâo dưm ti ƀuôn Siôn sa klŏ boh tâo jing boh tâo kiêng, Kâo ruah leh leh anăn yap yuôm, leh anăn hlei pô đăo kơ ñu Aê Diê amâo srăng bi luč klei čang hmăng ñu ôh.”

⁷Kyuanăn kơ diih phung đăo leh, boh tâo anei jing yuôm; ƀiădah kơ phung amâo đăo ôh, “Boh tâo phung ngă sang hngah leh, jing hĕ leh boh tâo phŭn ti kiêng,”

⁸leh anăn “Sa klŏ boh tâo bi têč hnêč phung mnuih, leh anăn boh tâo prŏng bi lĕ buh diñu.” Diñu čah boh tâo anăn kyuadah diñu amâo gưt ôh kơ klei blŭ, tui si Aê Diê čuăn leh kơ diñu ngă.

⁹Ƀiădah diih jing sa phung găp djuê Aê Diê ruah leh, phung khua ngă yang kơ mtao, sa phung găp djuê doh jăk, phung ƀuôn sang Aê Diê pô, čiăng kơ diih dưi hưn bruă yuôm bhăn Pô iêô leh diih kbiă mơ̆ng klei mmăt truh kơ klei mngač yuôm bhăn Ñu.

¹⁰Mphŭn dô diih amâo jing sa phung ƀuôn sang ôh, ƀiădah ară anei diih jing leh phung ƀuôn sang Aê Diê. Mphŭn dô diih amâo tuôm mă tŭ ôh klei Aê Diê pap, ƀiădah ară anei diih mă tŭ leh klei pap anăn.

¹¹Ơ phung kâo khăp, ti lăn ala anei diih jing msĕ si phung tue leh anăn phung dôk ti êngao čar pô, kâo kwưh kơ diih brei diih hngah hĕ kơ klei kđeh tluh dôk bi blah ngă kơ mngăt diih.

¹²Brei diih dôk dơ̆ng ƀơ̆ng huă jăk nanao ti krah phung amâo đăo, čiăng kơ tơdah diñu mčeh kơ diih jing mnuih ngă jhat, diñu dưi ƀuh bruă jăk diih ngă leh anăn mpŭ mni kơ Aê Diê ti hruê Ñu srăng lŏ hriê.

¹³Kyua Khua Yang, brei diih gưt jih phung khua mnuih mkŏ mjing leh, thâodah kơ mtao jing pô prŏng hĭn,

¹⁴amâodah kơ khua prŏng jing dĭng ktang mtao tiŏ hriê čiăng bi kmhal phung ngă klei jhat leh anăn bi mni kơ phung ngă klei jăk.

¹⁵Kyuadah snei jing klei Aê Diê čiăng: hŏng klei ngă klei jăk diih srăng brei klei blŭ hơăi mang phung mluk mgu dôk ñăt.

¹⁶Hdĭp bĕ msĕ si phung mnuih êngiê, ƀiădah đăm yua ôh klei êngiê jing mnơ̆ng mdăp klei jhat; ƀiădah brei diih hdĭp msĕ si phung dĭng buăl Aê Diê.

¹⁷Mpŭ bĕ kơ jih jang mnuih. Khăp bĕ kơ phung ayŏng adei đăo. Huĭ mpŭ bĕ kơ Aê Diê. Mpŭ bĕ kơ mtao.

¹⁸Ơ phung dĭng buăl, đup gưt bĕ kơ phung khua diih hŏng klei mpŭ sĭt, amâo djŏ ôh knŏng kơ phung khua jăk leh anăn êmhač, ƀiădah wăt kơ phung khua mâo knuih khăng msĕ mơh.

¹⁹Jăk jĭn yơh kơ pô thâo klei Aê Diê čiăng, tơdah ñu tŭ klei knap mñai amâo djŏ kyua klei soh ñu ngă ôh.

²⁰Kyuadah ya klei yuôm tơdah diih gĭr tŭ klei arăng čăm kyua diih ngă soh? Ƀiădah tơdah diih ngă klei jăk, leh anăn gĭr tŭ klei knap mñai kyua klei anăn, Aê Diê srăng tŭ diih.

²¹Kyua kơ klei anăn Aê Diê iêô leh diih, kyuadah Krist msĕ mơh tŭ leh klei knap mñai kyua diih, čiăng brei kơ diih klei bi hmô, čiăng kơ diih tui hlue kru Ñu.

²²Ñu amâo tuôm ngă soh ôh, kăn arăng tuôm hmư̆ klei luar mơ̆ng ƀăng êgei Ñu rei.

²³Tơdah arăng dlao wač kơ Ñu, Ñu amâo lŏ dlao wač kơ arăng ôh; tơdah Ñu tŭ klei knap mñai, Ñu amâo arưp aram ôh. Ƀiădah Ñu knang kơ Pô phat kđi hŏng klei kpă.

²⁴Ñu pô klam klei soh drei hlăm asei mlei Ñu pô ti kyâo bi kal, čiăng kơ drei dưi djiê kơ klei soh leh anăn hdĭp kơ klei kpă ênô. Hŏng anôk êka Ñu diih hlao leh.

²⁵Kyuadah diih klah đuĕ leh msĕ si biăp, ƀiădah ară anei diih wĭt leh kơ Mgăt Biăp leh anăn Pô Kiă mngăt diih.