Read Rade I Y-Yôhan 2 Bible Online

I Y-Yôhan 2 - Rade bible

I Y-Yôhan 2

¹Ơ phung anak điêt kâo, kâo čih klei anei kơ diih čiăng kơ diih amâo ngă soh ôh; ƀiădah hlei pô ngă soh, drei mâo sa čô Pô mgang kđi dôk mbĭt hŏng Ama, Yêsu Krist Pô kpă.

²Ñu jing Pô bi tui klei soh drei, leh anăn amâo djŏ knŏng kơ klei soh drei ôh, ƀiădah wăt kơ klei soh jih lăn ala.

³Hŏng klei anei drei dưi thâo sĭt kơ drei thâo kral Ñu leh: tơdah drei gưt klei Ñu mtă.

⁴Hlei pô lač, “Kâo thâo kral Ñu leh,” ƀiădah amâo gưt ôh klei Ñu mtă jing sa čô luar yơh, leh anăn klei sĭt nik amâo dôk hlăm pô anăn ôh.

⁵Ƀiădah hlei pô gưt klei Ñu blŭ, klei pô anăn khăp kơ Aê Diê truh leh kơ klei jăk klă. Hŏng klei anei yơh drei dưi thâo sĭt kơ drei dôk hlăm Ñu:

⁶hlei pô lač ñu dôk hlăm Yêsu, brei ñu êbat msĕ si Yêsu pô êbat leh.

⁷Ơ phung kâo khăp, kâo amâo čih kơ diih klei mtă mrâo ôh, ƀiădah klei mtă hđăp diih mâo leh mơ̆ng mphŭn dơ̆ng: klei mtă hđăp anăn jing klei blŭ diih hmư̆ leh.

⁸Ƀiădah ăt kâo čih kơ diih sa klei mtă mrâo, jing sĭt hlăm Ñu leh anăn hlăm diih, kyuadah klei mmăt dơ̆ng êgao tuč leh anăn klei mngač sĭt mtrang leh.

⁹Hlei pô lač ñu dôk hlăm klei mngač ƀiădah bi êmut kơ ayŏng adei ñu ăt dôk hlăm klei mmăt yơh.

¹⁰Hlei pô khăp kơ ayŏng adei ñu dôk hlăm klei mngač, leh anăn hlăm pô anăn amâo mâo klei bi têč hnêč ôh.

¹¹Ƀiădah hlei pô bi êmut kơ ayŏng adei ñu, pô anăn dôk hlăm klei mmăt, êbat hlăm klei mmăt, leh anăn amâo thâo ôh ti anôk ñu nao, kyuadah klei mmăt bi bum leh ală ñu.

¹²Ơ phung anak điêt, kâo čih kơ diih, kyuadah klei soh diih Aê Diê pap brei leh kyua anăn Ñu.

¹³Ơ phung ama, kâo čih kơ diih, kyuadah diih thâo kral leh Pô jing mơ̆ng mphŭn dơ̆ng. Ơ phung êkei hlăk ai, kâo čih kơ diih, kyuadah diih dưi leh hŏng Pô jhat.

¹⁴Ơ phung anak điêt, kâo čih kơ diih, kyuadah diih thâo kral leh Ama. Ơ phung ama, kâo čih kơ diih, kyuadah diih thâo kral leh Pô jing mơ̆ng mphŭn dơ̆ng. Ơ phung êkei hlăk ai, kâo čih kơ diih, kyuadah diih jing ktang leh anăn klei Aê Diê blŭ dôk hlăm diih, leh anăn diih dưi leh hŏng Pô jhat.

¹⁵Đăm khăp kơ lăn ala ôh, kăn khăp kơ mnơ̆ng hlăm lăn ala rei. Tơdah hlei pô khăp kơ lăn ala, klei khăp Ama amâo dôk hlăm ñu ôh.

¹⁶Kyuadah jih jang mnơ̆ng hlăm lăn ala, klei kđeh tluh, klei ală tluh, klei mgao hlăm klei hdĭp, amâo kbiă hriê mơ̆ng Ama ôh, ƀiădah mơ̆ng lăn ala.

¹⁷Lăn ala leh anăn klei ñu tluh srăng êgao tuč, ƀiădah hlei pô ngă klei Aê Diê čiăng srăng dôk hdĭp hlŏng lar.

¹⁸Ơ phung anak điêt, truh leh mông knhal tuč; leh anăn msĕ si diih hmư̆ leh kơ pô roh hŏng Krist srăng hriê, msĕ snăn mơh ară anei mâo lu phung roh hŏng Krist truh leh. Kyua klei anăn drei thâo mông knhal tuč truh leh.

¹⁹Diñu kbiă leh mơ̆ng ti krah phung drei, ƀiădah diñu amâo jing phung drei ôh; kyuadah tơdah diñu jing phung drei, diñu ăt srăng dôk mbĭt hŏng drei. Ƀiădah diñu kbiă leh mơ̆ng drei, čiăng bi êdah klă kơ jih jang diñu amâo jing phung drei ôh.

²⁰Ƀiădah diih mâo leh klei Pô Doh Jăk trôč êa ƀâo mngưi, leh anăn jih jang diih mâo leh klei thâo săng.

²¹Kâo čih kơ diih, amâo djŏ kyuadah diih amâo thâo klei sĭt nik ôh, ƀiădah kyuadah diih thâo klei anăn, leh anăn diih thâo amâo mâo klei luar ôh kbiă mơ̆ng klei sĭt nik.

²²Hlei jing pô luar lĕ? Pô hngah kơ Yêsu jing Yang Krist yơh! Pô anăn yơh jing pô roh hŏng Krist, pô hngah kơ Ama leh anăn kơ Anak.

²³Hlei pô hngah kơ Anak kăn mâo Ama rei. Hlei pô hưn mâo leh Anak mâo Ama msĕ mơh.

²⁴Brei klei diih hmư̆ leh mơ̆ng mphŭn dơ̆ng dôk hlăm diih. Tơdah klei diih hmư̆ leh mơ̆ng mphŭn dơ̆ng dôk hlăm diih, snăn diih srăng dôk hlăm Anak leh anăn hlăm Ama.

²⁵Leh anăn anei klei Ñu ƀuăn leh kơ drei, jing klei hdĭp hlŏng lar.

²⁶Kâo čih klei anei kơ diih kyua mâo phung čiăng mplư diih.

²⁷Bi kơ diih, klei trôč êa ƀâo mngưi diih mă tŭ leh mơ̆ng Ñu dôk hlăm diih, leh anăn amâo yuôm ôh arăng lŏ mtô kơ diih. Msĕ si klei Ñu trôč êa ƀâo mngưi mtô kơ diih jih jang klei, leh anăn jing klei sĭt nik, amâo jing klei luar ôh, tui si Ñu mtô leh kơ diih, dôk bĕ hlăm Ñu.

²⁸Ơ phung anak điêt, ară anei dôk bĕ hlăm Ñu, čiăng kơ tơdah Ñu srăng bi êdah, drei dưi mâo klei knang, amâo hêñ kyua dôk kbưi mơ̆ng Ñu, ti hruê Ñu lŏ hriê.

²⁹Tơdah diih thâo Ñu jing kpă, diih dưi thâo sĭt kơ hlei pô ngă klei kpă mâo leh klei kkiêng mơ̆ng Ñu.