Read Rade Phung Khua Phat Kđi 1 Bible Online

Phung Khua Phat Kđi 1 - Rade bible

Phung Khua Phat Kđi 1

¹Leh Y-Yôsuê djiê, phung ƀuôn sang Israel êmuh kơ Yêhôwa, “Hlei hlăm phung hmei srăng đĭ nao êlâo bi kdơ̆ng hŏng phung Kanaan, čiăng bi blah hŏng diñu?”

²Yêhôwa lač, “Brei phung Yuđa đĭ nao; nĕ anei Kâo jao leh čar hlăm kngan diñu.”

³Leh anăn phung Yuđa lač kơ phung Simêôn, phung ayŏng adei diñu, “Đĭ hriê mbĭt hŏng hmei hlăm čar bi mbha leh kơ hmei, čiăng kơ drei dưi bi blah hŏng phung Kanaan; leh anăn hmei msĕ mơh srăng nao mbĭt hŏng diih hlăm čar bi mbha leh kơ diih.” Snăn phung Simêôn nao mbĭt hŏng diñu.

⁴Snăn phung Yuđa đĭ nao, Yêhôwa jao phung Kanaan leh anăn phung Pêrisit hlăm kngan diñu; leh anăn diñu dưi hŏng pluh êbâo čô phung anăn ti ƀuôn Bêsek.

⁵Diñu bi tuôm hŏng Y-Adôni-Bêsek hlăm ƀuôn Bêsek leh anăn bi blah hŏng gơ̆, leh anăn dưi hŏng phung Kanaan leh anăn phung Pêrisit.

⁶Y-Adôni-Bêsek đuĕ, ƀiădah diñu tiŏ gơ̆ leh anăn hmao mă gơ̆, leh anăn khăt kđiêng ana kngan leh anăn kđiêng ana jơ̆ng gơ̆.

⁷Y-Adôni-Bêsek lač, “Kjuh pluh čô mtao kâo khăt leh kđiêng ana kngan leh anăn kđiêng ana jơ̆ng duñ djah mnơ̆ng ƀơ̆ng huă ti gŭ jhưng huă kâo. Msĕ si klei kâo ngă leh, snăn mơh Aê Diê lŏ bi wĭt kơ kâo.” Arăng ba ñu ti ƀuôn Yêrusalem, leh anăn ñu djiê ti anăn.

⁸Leh klei anăn, phung êkei Yuđa bi blah hŏng ƀuôn Yêrusalem leh anăn mă gơ̆, diñu bi rai gơ̆ hŏng mta đao gưm, leh anăn čuh hĕ ƀuôn anăn.

⁹Êdei tinăn phung êkei Yuđa trŭn bi blah hŏng phung Kanaan dôk hlăm čar kngư, hlăm čar Dhŭng, leh anăn hlăm čar lăn dap.

¹⁰Phung Yuđa nao ngă kơ phung Kanaan dôk ti ƀuôn Hêbron (mphŭn dô anăn ƀuôn Hêbron jing Kiriat-Arba), leh anăn diñu dưi hŏng Y-Sêsai, Y-Ahiman, leh anăn Y-Talmai.

¹¹Mơ̆ng anăn, diñu nao bi blah hŏng phung dôk hlăm ƀuôn Dêbir (mphŭn dô anăn ƀuôn Dêbir jing Kiriat-Sêpher).

¹²Y-Kalep lač, “Hlei pô bi blah hŏng ƀuôn Kiriat-Sêpher leh anăn mă gơ̆, kâo srăng brei H'Aksa anak mniê kâo jing mô̆ ñu.”

¹³Y-Ôtniêl anak êkei Y-Kênas, adei Y-Kalep, mă ƀuôn anăn; leh anăn Y-Kalep brei H'Aksa, anak mniê ñu jing mô̆ gơ̆.

¹⁴Tơdah mniê anăn nao dôk hŏng gơ̆, ñu mtrŭt gơ̆ akâo kơ ama ñu sa boh hma. Ñu trŭn mơ̆ng aseh dliê ñu, leh anăn Y-Kalep lač kơ ñu, “Ya klei ih čiăng?”

¹⁵Ñu lač kơ gơ̆, “Brei kơ kâo sa mta mnơ̆ng; kyuadah ih brei leh kâo dôk hlăm čar Dhŭng, brei kơ kâo wăt akŏ êa mơh.” Leh anăn Y-Kalep brei kơ ñu akŏ êa ti dlông leh anăn akŏ êa ti gŭ.

¹⁶Phung anak čô Kênit, kmha êkei Y-Môis, đĭ nao mbĭt hŏng phung ƀuôn sang Yuđa mơ̆ng ƀuôn mâo ana boh đung, mŭt hlăm kdrăn tač čar Yuđa, anôk anăn hlăm čar Dhŭng giăm ƀuôn Arat. Diñu nao leh anăn dôk mbĭt hŏng phung ƀuôn sang.

¹⁷Phung Yuđa nao mbĭt hŏng phung Simêôn, phung ayŏng adei diñu, diñu dưi hŏng phung Kanaan dôk hlăm ƀuôn Sêphat, leh anăn bi rai jih ƀuôn anăn. Snăn, arăng pia ƀuôn anăn Hôrma.

¹⁸Phung Yuđa mă msĕ mơh ƀuôn Gasa mbĭt hŏng lăn ñu, ƀuôn Askêlon mbĭt hŏng lăn ñu, leh anăn ƀuôn Êkron mbĭt hŏng lăn ñu.

¹⁹Yêhôwa dôk mbĭt hŏng phung Yuđa, leh anăn diñu mă bha čar kngư, ƀiădah diñu amâo dưi suôt ôh phung dôk hlăm anôk lăn dap, kyuadah phung anăn mâo êdeh aseh msei.

²⁰Arăng brei ƀuôn Hêbron kơ Y-Kalep tui si Y-Môis lač leh; leh anăn ñu suôt mơ̆ng anăn tlâo čô anak êkei Y-Anak.

²¹Ƀiădah phung ƀuôn sang Benjamin amâo suôt ôh phung Jêbusit dôk hlăm ƀuôn Yêrusalem; snăn, phung Jêbusit dôk mbĭt hŏng phung ƀuôn sang Benjamin hlăm ƀuôn Yêrusalem hlŏng kơ hruê anei.

²²Sang Yôsep msĕ mơh nao bi blah hŏng ƀuôn Bêthel; leh anăn Yêhôwa dôk mbĭt hŏng diñu.

²³Sang Yôsep tiŏ nao arăng ksiêm ƀuôn Bêthel (mphŭn dô anăn ƀuôn anăn jing Lus).

²⁴Phung knuă ƀuh sa čô mnuih kbiă mơ̆ng ƀuôn, leh anăn diñu lač kơ gơ̆, “Hmei kwưh kơ ih, ktrâo brei kơ hmei êlan mŭt hlăm ƀuôn, leh anăn hmei srăng ngă jăk hŏng ih.”

²⁵Gơ̆ ktrâo kơ phung diñu êlan mŭt ƀuôn; leh anăn diñu bi rai ƀuôn anăn hŏng mta đao gưm, ƀiădah diñu brei mnuih anăn leh anăn jih găp djuê gơ̆ đuĕ nao.

²⁶Êkei anăn nao kơ čar Hitit leh anăn mdơ̆ng sa boh ƀuôn, leh anăn bi anăn ƀuôn Lus; anăn ƀuôn anăn ăt msĕ snăn hlŏng kơ hruê anei.

²⁷Phung Manasê amâo suôt ôh phung dôk hlăm ƀuôn Bet-Sêan leh anăn dŭm ƀuôn điêt gơ̆, amâodah ƀuôn Tanak leh anăn dŭm ƀuôn điêt gơ̆, amâodah phung dôk hlăm ƀuôn Dor leh anăn dŭm ƀuôn điêt gơ̆, amâodah phung dôk hlăm ƀuôn Iblêam leh anăn dŭm ƀuôn điêt gơ̆, amâodah phung dôk hlăm ƀuôn Mêgidô leh anăn dŭm ƀuôn điêt gơ̆; ƀiădah phung Kanaan ăt dôk hlăm čar anăn.

²⁸Tơdah phung Israel jing ktang hĭn, diñu mjing phung Kanaan hlŭn, ƀiădah amâo suôt digơ̆ jih ôh.

²⁹Phung Êphraim amâo suôt ôh phung Kanaan dôk hlăm ƀuôn Gêser; snăn phung Kanaan dôk hlăm ƀuôn Gêser mbĭt hŏng diñu.

³⁰Phung Sabulôn amâo suôt ôh phung dôk hlăm ƀuôn Kitron, amâodah phung dôk hlăm ƀuôn Nahalol; ƀiădah phung Kanaan dôk mbĭt hŏng diñu leh anăn jing hlŭn.

³¹Phung Aser amâo suôt ôh phung dôk hlăm ƀuôn Akô, amâodah phung dôk hlăm ƀuôn Sidôn, amâodah ƀuôn Ahlap, amâodah ƀuôn Aksip, amâodah ƀuôn Hêlba, amâodah ƀuôn Aphik, amâodah ƀuôn Rêhop,

³²ƀiădah phung Aser dôk mbĭt hŏng phung Kanaan, phung ƀuôn sang čar anăn, kyuadah diñu amâo suôt ôh phung anăn.

³³Phung Naptali amâo suôt ôh phung dôk hlăm ƀuôn Bet-Sêmes, amâodah phung dôk hlăm ƀuôn Bet-Anat, ƀiădah dôk mbĭt hŏng phung Kanaan, phung ƀuôn sang čar anăn; ƀiădah phung dôk hlăm ƀuôn Bet-Sêmes leh anăn ƀuôn Bet-Anat jing hlŭn kơ diñu.

³⁴Phung Amôrit puh phung Dan phă čar kngư, diñu amâo brei ôh digơ̆ trŭn phă lăn dap.

³⁵Phung Amôrit ăt dôk hlăm ƀuôn Hêres, ƀuôn Aijalon, leh anăn ƀuôn Salbim; ƀiădah kngan sang Yôsep bi ktrŏ diñu, leh anăn diñu jing hlŭn.

³⁶Kdriêl phung Amôrit dơ̆ng mơ̆ng anôk đĭ Akrabim, mơ̆ng ƀuôn Sêla leh anăn phă dlông.