Read Rade Klei Bi Êdah 12 Bible Online

Klei Bi Êdah 12 - Rade bible

Klei Bi Êdah 12

¹Mâo sa klei bi knăl prŏng bi êdah hlăm adiê, sa čô mniê hơô yang hruê, leh anăn mlan ti gŭ jơ̆ng ñu, leh anăn mâo ti boh kŏ ñu sa boh đuôn mtao ngă hŏng pluh dua asăr mtŭ.

²Ñu ba tian leh, leh anăn ur kyua ñu mâo klei ruă kkiêng êjai dôk đih pui.

³Mâo sa klei bi knăl mkăn bi êdah hlăm adiê; nĕ anei mâo sa drei anak rai prŏng hrah, mâo kjuh boh kŏ leh anăn pluh ƀĕ ki, leh anăn ti boh kŏ ñu mâo kjuh đuôn mtao.

⁴Ku ñu đoh ba sa kdrêč hlăm tlâo mtŭ mơ̆ng adiê, leh anăn dlăm digơ̆ ti lăn ala. Anak rai anăn dôk ti anăp mniê dơ̆ng kkiêng, čiăng hiêk ƀơ̆ng anak gơ̆ tơdah gơ̆ kkiêng leh.

⁵Gơ̆ kkiêng kơ sa čô anak êkei, pô srăng kiă kriê jih jang găp djuê mnuih hŏng sa ƀĕ giê msei. Ƀiădah arăng pŭ ba anak gơ̆ kơ Aê Diê leh anăn kơ jhưng mtao Ñu.

⁶Leh anăn mniê anăn đuĕ hlăm kdrăn tač; tinăn ñu mâo anôk Aê Diê mkra leh, čiăng kơ ñu dưi mâo mnơ̆ng ƀơ̆ng huă êjai sa êbâo dua êtuh năm pluh hruê.

⁷Leh anăn mâo klei bi blah hlăm adiê, Mikel leh anăn phung dĭng buăl jăk ñu bi blah hŏng anak rai; anak rai leh anăn dĭng buăl ñu lŏ bi blah wĭt.

⁸Ƀiădah diñu amâo dưi hlăm klei bi blah, leh anăn amâo lŏ mâo ôh anôk kơ diñu hlăm adiê.

⁹Leh anăn arăng dlăm anak rai prŏng ti gŭ, ala hđăp anăn, arăng pia Yang Jhat leh anăn Satan, pô mplư jih lăn ala. Arăng dlăm phung dĭng buăl ñu mbĭt hŏng ñu.

¹⁰Leh anăn kâo hmư̆ hlăm adiê asăp kraih lač, “Ară anei klei bi mtlaih, klei myang, ƀuôn ala mtao Aê Diê drei, leh anăn klei dưi Krist Ñu truh leh, kyuadah arăng dlăm leh ti gŭ pô kčŭt kơ phung ayŏng adei drei pô kčŭt kơ diñu hruê mlam ti anăp Aê Diê drei.

¹¹Diñu dưi hŏng pô kčŭt anăn kyua êrah Êđai Biăp leh anăn kyua klei blŭ diñu hưn, kyuadah diñu săn asei mlei wăt tơl djiê dưn mơh.

¹²Kyua anăn hơ̆k mơak bĕ diih, Ơ phung adiê leh anăn diih phung dôk hlăm phung adiê! Ƀiădah knap mñai yơh kơ diih, Ơ lăn ala leh anăn êa ksĭ, kyuadah yang jhat trŭn leh kơ diih hŏng klei ngêñ snăk, kyuadah ñu thâo mông ñu ăt dôk knŏng ƀiă.”

¹³Tơdah anak rai ƀuh arăng dlăm leh ñu ti lăn ala, ñu tiŏ mniê kkiêng leh kơ anak êkei anăn.

¹⁴Ƀiădah arăng brei kơ mniê anăn dua pŏk siap tlang prŏng, čiăng kơ ñu dưi phiơr đuĕ mơ̆ng ala nao kơ kdrăn tač, ti anôk arăng srăng čiêm ñu êjai sa ênuk, đa đa ênuk leh anăn sa mkrah ênuk.

¹⁵Ala pruih êa msĕ sa hnoh êa krông mơ̆ng ƀăng êgei ñu ti tluôn mniê anăn, čiăng bi mơngăt gơ̆ hŏng êa.

¹⁶Ƀiădah lăn dŏng mniê anăn, lăn ha ƀăng êgei leh anăn lun êa krông anak rai pruih mơ̆ng ƀăng êgei ñu.

¹⁷Anak rai ăl kơ mniê anăn, leh anăn đuĕ nao bi blah hŏng phung anak mniê anăn adôk, phung gưt kơ klei Aê Diê mtă leh anăn hưn klei Yêsu.

¹⁸Anak rai dôk dơ̆ng ti čuah hang êa ksĭ.