Read Rade Klei Bi Êdah 22 Bible Online

Klei Bi Êdah 22 - Rade bible

Klei Bi Êdah 22

¹Leh anăn dĭng buăk jăk ktrâo kơ kâo êa krông klei hdĭp, mngač msĕ si ală kĭng, kbiă đoh mơ̆ng jhưng mtao Aê Diê leh anăn Êđai Biăp,

²găn ti krah êlan ƀuôn anăn; msĕ mơh tĭng dua nah hang êa krông anăn mâo ana kyâo klei hdĭp, mâo pluh dua blư̆ mboh. Grăp mlan ñu mboh sa blư̆; leh anăn hla ana kyâo anăn pioh kơ klei bi hlao phung găp djuê mnuih.

³Leh anăn amâo srăng lŏ mâo ôh mnơ̆ng Aê Diê tăm pah dôk hlăm ƀuôn anăn, ƀiădah jhưng mtao Aê Diê leh anăn Êđai Biăp srăng dôk hlăm ƀuôn anăn. Phung dĭng buăl Ñu srăng mă bruă kơ Ñu;

⁴digơ̆ srăng ƀuh ƀô̆ mta Ñu, leh anăn digơ̆ srăng mâo anăn Ñu ti adhei digơ̆.

⁵Amâo srăng lŏ mâo mlam ôh. Digơ̆ amâo lŏ čiăng kơ klei mngač pui kđen amâodah yang hruê ôh, kyuadah Khua Yang Aê Diê srăng jing klei mngač kơ digơ̆. Leh anăn digơ̆ srăng kiă kriê hlăm jih jang ênuk.

⁶Leh anăn ñu lač kơ kâo, “Klei blŭ anăn arăng dưi knang leh anăn sĭt nik. Khua Yang, Aê Diê kơ mngăt phung khua pô hưn êlâo, tiŏ nao leh dĭng buăl jăk Ñu čiăng bi êdah kơ phung dĭng buăl Ñu klei srăng truh djăl.

⁷Nĕ anei, Kâo srăng hriê djăl.” Jăk mơak yơh hlei pô djă pioh klei blŭ hưn êlâo hlăm hdruôm hră anei.

⁸Kâo gơ̆ Y-Yôhan, jing pô hmư̆ leh anăn ƀuh leh klei anăn. Tơdah leh kâo hmư̆ leh anăn ƀuh, kâo buôn kkuh mpŭ ti jơ̆ng dĭng buăl jăk, pô bi êdah klei anăn kơ kâo.

⁹Ƀiădah ñu lač kơ kâo, “Đăm ngă snăn ôh! Kâo jing pô mă bruă mbĭt hŏng ih leh anăn hŏng phung ayŏng adei ih phung khua pô hưn êlâo, leh anăn mbĭt hŏng phung djă pioh klei blŭ hlăm hdruôm hră anei. Kkuh mpŭ bĕ kơ Aê Diê.”

¹⁰Leh anăn ñu lač kơ kâo, “Đăm kđăm ôh klei blŭ hưn êlâo hlăm hdruôm hră anei, kyuadah mông giăm truh leh.

¹¹Brei pô ngă klei wê, ăt ngă klei wê; leh anăn pô čhŏ, brei ñu ăt jing čhŏ; pô jing kpă, brei ñu ăt ngă klei kpă; leh anăn pô jing doh jăk, brei ñu ăt jing doh jăk.”

¹²“Nĕ anei, Kâo hriê djăl djă ba mnơ̆ng Kâo mưn, čiăng mưn grăp čô tui si bruă ñu ngă leh.

¹³Kâo jing Alpha leh anăn Ômêga, Pô êlâo hĭn leh anăn Pô knhal tuč, klei mphŭn dơ̆ng leh anăn klei knhal tuč.”

¹⁴Jăk mơak yơh phung boh ao jhung diñu, čiăng kơ diñu mâo klei dưi ƀơ̆ng boh ana kyâo klei hdĭp, leh anăn dưi mŭt ti ƀăng jang ƀuôn anăn.

¹⁵Ti êngao ƀuôn anăn mâo phung asâo, phung mjâo, phung knhông, phung bi mdjiê mnuih, phung kkuh mpŭ kơ rup yang, leh anăn grăp čô khăp leh anăn ngă klei luar.

¹⁶“Kâo gơ̆, Yêsu, tiŏ nao leh dĭng buăl jăk Kâo kơ ih djă ba klei hưn anei kơ Phung Sang Aê Diê. Kâo jing kƀiêng leh anăn čô Y-Đawit, mtŭ tŭr mngač aguah.”

¹⁷Yang Mngăt Jăk leh anăn Mô̆ lač, “Hriê bĕ.” Leh anăn brei hlei pô hmư̆ lač, “Hriê bĕ.” Leh anăn hlei pô mhao brei ñu hriê, hlei pô čiăng brei ñu mă tŭ hơăi mang êa hdĭp.

¹⁸Kâo hưn brei grăp čô hmư̆ klei blŭ hưn êlâo hlăm hdruôm hră anei răng: tơdah arăng lŏ thiăm kơ klei anei, Aê Diê srăng lŏ thiăm kơ ñu klei bi knap arăng čih yăl dliê leh hlăm hdruôm hră anei.

¹⁹Leh anăn tơdah arăng bi luč hĕ klei blŭ mơ̆ng hdruôm hră klei hưn êlâo anei, Aê Diê srăng bi luč hĕ klei ñu dưi ƀơ̆ng boh ana kyâo klei hdĭp, leh anăn klei ñu dưi mŭt hlăm ƀuôn doh jăk, arăng čih yăl dliê leh hlăm hdruôm hră anei.

²⁰Pô hưn bi sĭt klei anei lač, “Sĭt nik Kâo hriê djăl.” Amen. Hriê bĕ, Ơ Khua Yang Yêsu!

²¹Brei klei pap Khua Yang Yêsu dôk mbĭt hŏng jih jang phung doh jăk. Amen.