Read Rampi Pewaliana 1 Bible Online

Pewaliana 1 - Rampi bible

Pewaliana 1

¹Uluꞌana, i tempona Pueꞌ Ala mowali laniꞌ hante woiꞌ,

²woiꞌ hawaꞌi tene molentea hei hoo, komokorindi mohobiꞌi tahiꞌ to koroba, hei Inohaꞌ Mangkolehina Pueꞌ Ala memomaro-maro i womboꞌ uwai.

³Notiꞌi Pueꞌ Ala, “Mewalimo mobaro.” Katoꞌo komobaro tiꞌo mewalimo mpuꞌu.

⁴Pueꞌ Ala motanaꞌ mampeꞌele komobaro tiꞌo, katoꞌo Nokaꞌamo komobaro tiꞌo ka komokorindi.

⁵Pueꞌ Ala mangkokeneꞌi komobaro tiꞌo ando, hei komokorindi tiꞌo wini. Uko wini andomo, iomo ando kaꞌisaꞌ.

⁶Mohawaꞌmo Pueꞌ Ala, “Mewalimo halangkaꞌ to mohida uwai hante uwai.”

⁷Katoꞌo Pueꞌ Ala mokaꞌa uwai to uwaꞌ i luaꞌna hei to uwaꞌ i womboꞌna, hei mewalimo mpuꞌu watoꞌo.

⁸Katoꞌo Pueꞌ Ala mangkokeneꞌi tiꞌo laniꞌ. Uko wini andomo, iomo ando kadua.

⁹Mohawaꞌmo Pueꞌ Ala, “Hinamo lekiꞌna uwai to i luaꞌna laniꞌ mampohamoloꞌ i haꞌanu mpeꞌohaꞌa, horiana mombahamo lerine.” Hei watoꞌomo pewaline.

¹⁰Katoꞌo Pueꞌ Ala mangkokeneꞌi to mobani tiꞌo lerina, hei porampua uwai tiꞌo Nokokeneꞌi tahiꞌ. Pueꞌ Ala motanaꞌ mampeꞌele lekiꞌna tiꞌo.

¹¹Mohawaꞌmo Pueꞌ Ala, “Hinamo woiꞌ mampopelua hinangkana hapo to tuwuꞌ, huꞌa-huꞌa to mowuaꞌ, hinangkana loti, hinangkana wuaꞌ to molamuꞌ, hingkeꞌna uwaꞌ to tuwuꞌ i woiꞌ.” Hei mewalimo watoꞌo.

¹²Woiꞌ tiꞌo mampotuwuꞌ timbeꞌ-timbeꞌ to moleaꞌ, hinangkana huꞌa-huꞌa to molamuꞌ hei hinangkana loti to mowuaꞌ to molamuꞌ. Pueꞌ Ala motanaꞌ mampeꞌele lekiꞌna tiꞌo.

¹³Uko wini andomo, iomo ando katolu.

¹⁴Mohawaꞌmo Pueꞌ Ala, “Mewalimo lekiꞌna to mewanta i laniꞌ to mampotaniꞌ ando hei winina. Hinamo hapo-hapo to mewanta tiꞌo mewali tandaꞌ tempo-tempo pepotinto ando-ando hei toꞌa-toꞌa,

¹⁵hei to mewali wanta i laniꞌ hinamo hapo-hapo tiꞌo mowantai woiꞌ.” Hei watoꞌomo pewaliane.

¹⁶Hatoꞌomo Pueꞌ Ala mowali meroꞌonu to mewanta to kodeꞌ tiꞌo, iomo to kokodeꞌ mokuasaꞌi andona hei to kokiuꞌ mokuasaꞌi wini, hei Nopopewali woꞌo betueꞌ-betueꞌ.

¹⁷Pueꞌ Ala mampoꞌitoꞌo lekiꞌna tiꞌo i laniꞌ hingkeꞌna mowantai duniaꞌ,

¹⁸hei to mokuasaꞌi andona hei winina, hei to mampopokaꞌa komobaro hante komokorindi. Pueꞌ Ala motanaꞌ mampeꞌele lekiꞌna tiꞌo.

¹⁹Uko wini andomo, iomo ando kaꞌiba.

²⁰Mohawaꞌmo Pueꞌ Ala, “Hinamo i lali uwai kolompelamituꞌa hinangkana to tuwuꞌ, hei hinamo tinti kolompelokaha i raoha.”

²¹Hatoꞌomo Pueꞌ Ala mowali pinatuwuꞌ-pinatuwuꞌ to kodeꞌ i tahiꞌ hei hinangkana to mengkaduiꞌ, to melamituꞌ i lali uwai, hei hinangkana tinti to mokepaꞌ. Pueꞌ Ala motanaꞌ mampeꞌele lekiꞌna tiꞌo.

²²Katoꞌo Pueꞌ Ala mobarakati lekiꞌna tiꞌo hei mantiꞌi, “Membiaꞌmokei hante tetambaimokei hei mobuhoꞌi uwai i lali tahiꞌ, hei hinamo tinti-tinti i duniaꞌ terononihi koworiꞌne.”

²³Uko wini andomo, iomo ando kalimo.

²⁴Mohawaꞌmo Pueꞌ Ala, “Hinamo duniaꞌ buhaꞌ hante hinangkana pinatuwuꞌ to tuwuꞌ, pinatuwuꞌ to manondoꞌ hei pinatuwuꞌ to mendae, hei hinangkana pinatuwuꞌ to moꞌilo.” Hei mewalimo watoꞌo.

²⁵Pueꞌ Alaꞌ mowali hinangkana pinatuwuꞌ to moꞌilo hei hinangkana pinatuwuꞌ to manondoꞌ hei hinangkana pinatuwuꞌ to mendae i womboꞌ duniaꞌ. Pueꞌ Ala motanaꞌ mampeꞌele lekiꞌna tiꞌo.

²⁶Mohawaꞌmo Pueꞌ Ala, “Moromiꞌmo moteruki manusiaꞌ motuntuni lenteTa hei pambiaranTa, hingkeꞌna iohi mokuasaꞌi bouꞌ-bouꞌ i lali tahiꞌ hei tinti-tinti to i raoha hante pinatuwuꞌ to manondoꞌ hei humalekiꞌna duniaꞌ hei hinangkana pinatuwuꞌ i humalekiꞌna duniaꞌ to mendae i woiꞌ.”

²⁷Pueꞌ Ala mowali manusiaꞌ tiꞌo motuntuni lenteNa hadoduona. Nowalihi tomaꞌani hante towoweꞌe.

²⁸Pueꞌ Ala mobarakatihi hei mohawaꞌ pe iohi, “Memuleꞌmokei hante mantambaimo koworiꞌmi, ibuhoꞌimokei duniaꞌ hante ikuasaꞌimokei tiꞌo, mokuasaꞌimokei bouꞌ-bouꞌ i tahiꞌ hei tinti i raoha hei hinangkana pinatuwuꞌ to mendae i woiꞌ.”

²⁹Mohawaꞌmo Pueꞌ Ala, “Ele, Aku mampaꞌanimokei hinangkana huꞌa-huꞌa to mowuaꞌ, i humanele woiꞌ hei lekiꞌna loti to mowuaꞌ, iomo to hingkiꞌ mewali pangkami.

³⁰Angkana pe hinangkana pinatuwuꞌ i duniaꞌ hei hinangkana tinti i raoha hei hinangkana to mendae i duniaꞌ to meꞌinohaꞌ, Kupaꞌani hinangkana huꞌa-huꞌa to tuwuꞌ momataꞌ mewali pangkara.” Hei mewalimo watoꞌo.

³¹Katoꞌo Pueꞌ Ala mapeꞌele hinangkana to Nowalimo tiꞌo, Pueꞌ Ala motanaꞌ mpololeke mampeꞌele lekiꞌna tiꞌo. Uko wini andomo, iomo ando kaꞌoni.