Read Rampi Pewaliana 11 Bible Online

Pewaliana 11 - Rampi bible

Pewaliana 11

¹Uluꞌana, lekiꞌna toaꞌ i duniaꞌ haꞌanu wiharolu hei powiharora hibobali.

²I tempora molilo pe motoꞌando, pahuamohi woiꞌ to marante i Sinea hei lebaꞌmohi inoꞌo.

³Mololitamohi haduo hei haduo, “Humeimoki moteru woiꞌ hei totunu moromiꞌ-romiꞌ mewali watu tela.” Katoꞌo watu tela tiꞌomola to ropopodumbuꞌ hei ropopakeꞌki taru to mewali populuꞌina.

⁴Katoꞌo rotiꞌi womo, “Humeimoki mampotiꞌi haꞌanu bolaꞌ ngkodeꞌ hante haꞌanu tambi to dingkaoꞌ himpololoꞌo wute pe laniꞌ hingkeꞌna robahaꞌki toaꞌ hei anioꞌki mokaꞌa-kaꞌa pe umbo-umbo.”

⁵Katoꞌo mengkohoumo PUEꞋ Ala mampeꞌele bolaꞌ ngkodeꞌ hante tambi to dingkaoꞌ to roꞌaro manusiaꞌ tiꞌohiꞌo.

⁶Hei Io mohawaꞌ, “Iohi hieꞌe haroboꞌ ngkodeꞌ hante haꞌanu wiharoluhi. Hieꞌe hongkoꞌlu mampeluka rowali, hei mepongka hinewowoꞌena hapolu to rokodokoꞌi rowali, tontona hingkiꞌ mewali.

⁷Agina mengkohouKi mampomokawewoꞌ wiharora inoꞌo, horiana hawaꞌmohi momebahaꞌ wiharo.”

⁸Watoꞌomo konopopokaꞌa-kaꞌare PUEꞋ Ala mepongka katoꞌo pe humanele duniaꞌ, hei ropeꞌohaꞌki mampopetotiꞌi bolaꞌ ngkodeꞌ tiꞌo.

⁹Io horiana wute hinewoꞌena bolaꞌ ngkodeꞌ tiꞌo nikokeneꞌi Babeli, alaꞌ itoꞌomo konopokawewoꞌne Pueꞌ PUEꞋ Ala wiharo i humanele duniaꞌ, hei katoꞌomo konopopokaꞌa-kaꞌare Pueꞌ PUEꞋ Ala pe humanele duniaꞌ.

¹⁰Hieꞌemo muleꞌna hi Sem. Ikotuwuꞌnalu hi Sem 100 ntoꞌa, io mampemuleꞌki hi Aripasa, merontoꞌa uko noliuꞌ uwai.

¹¹Hi Sem tuwuꞌ tene 500 ntoꞌa, ikoꞌukona mampemuleꞌki hi Aripasa, hei io mampemuleꞌki anaꞌ-anaꞌna tomaꞌani hante towoweꞌe.

¹²Ikotuwuꞌnalu hi Aripasa 35 ntoꞌa, io mampemuleꞌki hi Sela.

¹³Hi Aripasa tuwuꞌ tene 403 ntoꞌa, ikoꞌukona mampemuleꞌki hi Sela, hei io mampemuleꞌki anaꞌ-anaꞌ tomaꞌani hante towoweꞌe.

¹⁴Ikotuwuꞌnalu hi Sela 30 ntoꞌa, io mampemuleꞌki hi Ebere.

¹⁵Hi Sela tuwuꞌ tene 403 ntoꞌa, ikoꞌukona mampemuleꞌki hi Ebere hei io mampemuleꞌki anaꞌ-anaꞌ tomaꞌani hei towoweꞌe.

¹⁶Ikotuwuꞌnalu hi Ebere 34 ntoꞌa, io mampemuleꞌki hi Peleꞌ.

¹⁷Hi Ebere tuwuꞌ tene 430 ntoꞌa ikoꞌukona mampemuleꞌki hi Peleꞌ, hei io mampemuleꞌki anaꞌ-anaꞌ tomaꞌani hante towoweꞌe.

¹⁸Ikotuwuꞌnalu hi Peleꞌ 30 ntoꞌa, io mampemuleꞌki hi Rehu.

¹⁹Hi Peleꞌ tuwuꞌ tene 209 ntoꞌa, ikoꞌukona mampemuleꞌki hi Rehu, hi Rehu mampemuleꞌki anaꞌ-anaꞌ tomaꞌani hante towoweꞌe.

²⁰Ikotuwuꞌnalu hi Rehu 32 ntoꞌa, io mampemuleꞌki hi Seruꞌ.

²¹Hi Rehu tuwuꞌ tene 207 ntoꞌa, ikoꞌukona mampemuleꞌki hi seruꞌ, hei io mampemuleꞌki anaꞌ-anaꞌ tomaꞌani hante towoweꞌe.

²²Ikotuwuꞌnalu hi Seruꞌ 30 ntoꞌa, io mampemuleꞌki hi Nahor.

²³Hi Seruꞌ tuwuꞌ tene 200 ntoꞌa ikoꞌukona mampemuleꞌki hi Nahor, hei io mampemuleꞌki anaꞌ-anaꞌ tomaꞌani hante towoweꞌe.

²⁴Ikotuwuꞌnalu hi Nahor 29 ntoꞌa, mampemuleꞌkimo haduo tomaꞌani to nikokeneꞌi hi Tera.

²⁵Hi Nahor tuwuꞌ tene 119 ntoꞌa, ikoꞌukona mampemuleꞌki hi Tera, hei io mampemuleꞌki anaꞌ-anaꞌ tomaꞌani hante towoweꞌe.

²⁶Ikotuwuꞌnalu hi Tera 70 ntoꞌa, io mampemuleꞌki hi Abara, hi Nahor hante hi Hara.

²⁷Hieꞌemo pemuleꞌane hi Tera. Hi Tera mampemuleꞌki hi Abara, hi Nahor hante hi Hara, hei hi Hara mampemuleꞌki hi Lot.

²⁸I tempona hi Tera tuwuꞌlu tene, mahimo hi Hara i woiꞌ peꞌohaꞌa konipoꞌanaꞌakina i Ur-Kasdi.

²⁹Hi Abara hante hi Nahor roduo-duora mohantambihi. Konaꞌna hantambina hi Abara iomo hi Sarai, hei konaꞌna hantambina hi Nahor iomo hi Milika anaꞌna hi Haran halalina hi Nahor hei uwaꞌ tene anaꞌne iomo hi Yiska.

³⁰Hi Sarai tiꞌo lalo, hawaꞌi moꞌanaꞌ.

³¹Katoꞌo hi Tera mangkomi hi Abara anaꞌna hante oꞌuweꞌna, hi Lot, hei hi Sarai moniana, hantambina hi Abara, molaihi moꞌawa-awa ka Ur-Kasdi nolou pe woiꞌ Kanaꞌa, katoꞌo wutemohi i Hara, hei lebaꞌmohi inoꞌo.

³²Umuruꞌna hi Tera 205 ntoꞌa, honiꞌi io mahi i Hara.