Read Rampi Pewaliana 12 Bible Online

Pewaliana 12 - Rampi bible

Pewaliana 12

¹Pohawaꞌna PUEꞋ Ala pe hi Abara, “Molaimoko ka woiꞌ peꞌohaꞌamu hante ka halali-halalimu hei ka tambina umoꞌmu hieꞌe pe woiꞌ peꞌohaꞌa to hingkiꞌ Kupetidoꞌki pe ingko.

²Muleꞌmu hingkiꞌ Kupoworiꞌ, hante kubarakatiko hei konaꞌmu kodeꞌ hei mewaliko pebarakati.

³Aku hingkiꞌ mobarakatihi toaꞌ to mobarakatiko, hei motundaꞌhi toaꞌ to motundaꞌko, hei alaꞌ ingko, lekiꞌna toaꞌ hingkiꞌ pahua pebarakati.”

⁴Katoꞌo noloumo hi Abara hibali to nohawaꞌkiꞌi PUEꞋ Ala pe io, hei hi Lot woꞌo metuntu moꞌawa-awa hante io. Tinuwuꞌna hi Abara 75 ntoꞌa, i tempona molai ka Haran.

⁵Hi Abara mangkomi hi Sarai hantambina, hante hi Lot, anaꞌna halalina, hante hinangkana lumana, hante lekiꞌna topajamana to rohua i Haran, molaihi lekiꞌra pe woiꞌ Kanaꞌa. I tempora wute i Kanaꞌa,

⁶hi Abara matengkaꞌ moliu i woiꞌ tiꞌo wute i haꞌanu peꞌohaꞌa dodungku i Sike, iomo nunuꞌ i More. I tempo tiꞌo toKanaꞌa lebaꞌ i woiꞌ peꞌohaꞌa tiꞌo.

⁷I tempo tiꞌo PUEꞋ Ala mampopemombaha wotaNa pe hi Abara hei mohawaꞌ, “Aku hingkiꞌ mampaꞌaniko woiꞌ peꞌohaꞌa hieꞌe pe muleꞌmu.” Katoꞌo nopotiꞌi itoꞌo potutua popenomba pe PUEꞋ Ala to mampopemombahamo wotaNa pe io.

⁸Uko tiꞌo io melimba katoꞌo pe birina tinaꞌ i motoꞌando Beteli. Io mampotiꞌi bambaruꞌna i lumbuna Beteli hante Ai. Beteli i tinaꞌ kotompuha hei Ai i tinaꞌ motoꞌando, katoꞌo io mampotiꞌi itoꞌo potutua popenomba pe PUEꞋ Ala hei ropololiu womo patengkaꞌre nolou pe woiꞌ to mebiri-biri, tinaꞌ i motoꞌando i bolaꞌ Beteli uwaꞌ i kotompuha, hante i Ai to tinaꞌ i motoꞌando. Itoꞌo mohuntu-huntu watu potunua popenomba, hei menomba pe PUEꞋ Ala.

⁹Uko tiꞌo, hi Abara molai hei komoꞌela-elaha io matengkaꞌ pe woiꞌ Negeꞌ.

¹⁰I tempo kobiloraha mehupaꞌ i woiꞌ Kanaꞌa, noloumo hi Abara pe Masiri ako meꞌohaꞌ itoꞌo hibali toaꞌ to hawaꞌi nibahaꞌ, alaꞌ makaja kobiloraha i woiꞌ peꞌohaꞌa tiꞌo.

¹¹I tempona io hingkiꞌ mekahi pe Masiri, mololitamo hi Abara pe hi Sarai, hantambina, “Umbiꞌ kubahaꞌmo ingko haduo towoweꞌe to manobaꞌ.

¹²Ane toMasiri pangkiꞌko, iohi hingkiꞌ mantiꞌi, tiꞌo hantambina. Mewaliꞌ iohi hingkiꞌ morokoꞌa hei ropotedehiko tuwuꞌ.

¹³Itiꞌimolu, ingko hineeꞌkuko, hingkeꞌna moromiꞌhi pe aku alaꞌ ingko, hei ropotedehiꞌa tuwuꞌ alaꞌ ingko.”

¹⁴Pekahinalu hi Abara pe Masiri, toMasiri tiꞌohiꞌo pangkiꞌ komanobaꞌna mpololeke towoweꞌe tiꞌo,

¹⁵hei koroꞌokiꞌnalu ponggawa-ponggawana Pirao hi Saraio roperenaki i hinarona Pirao, hei towoweꞌe tiꞌo rokomi pe kodatuana.

¹⁶Pirao modupaꞌ hi Abara hante mororomiꞌ, alaꞌ io mangkohoka towoweꞌe tiꞌo, hei hi Abara pahua bekeꞌ, gimba, gapiꞌ, kalide laki, hawiꞌ tomaꞌani hei towoweꞌe, kalide lunaro hante unta.

¹⁷Angkana PUEꞋ Ala mampoꞌuwaꞌ hakiꞌ to mekototehuꞌi to makaja pe Pirao, hatoꞌo woꞌo pe lekiꞌna to uwaꞌ i kodatuana, alaꞌ hi Sarai, hantambina hi Abara tiꞌo.

¹⁸Katoꞌo Pirao mowowoi hi Abara hei notiꞌi, “Haporeꞌi to iwalio hieꞌe pe aku? Haporeꞌi hinaꞌ hawaꞌi ipetiꞌiki, koꞌiona hantambima?

¹⁹Mahamporeꞌi hinaꞌ ipetiꞌiki io hineeꞌmu, horiana kuroa mewali hantambingku? Hinewoꞌena, hieꞌemo hantambima, roamoꞌi hei molaimoko”

²⁰Uko tiꞌo, Pirao mohawaꞌ pe haꞌumbo duo toꞌa nolou mowona hi Abara moꞌawa-awa hante hantambina hei lumana.