Read Rampi Pewaliana 13 Bible Online

Pewaliana 13 - Rampi bible

Pewaliana 13

¹Katoꞌo molaimo hi Abara ka woiꞌ Masiri, pe woiꞌ Negeꞌ hante hantambina hei lekiꞌna lumana, hei hi Lot woꞌo moꞌawa-awa hante io.

²Hi Abara toaꞌ tosugiꞌ, woriꞌ pinatuwuꞌ rewuane, doiꞌ peraꞌ hante bulawana.

³Io matengkaꞌ ka peꞌoꞌohaꞌa pe peꞌoꞌohaꞌa to ntaniꞌna, ka woiꞌ Negeꞌ wute dodungku i Beteli, i konopotiꞌiana bambaruꞌna hampiha i lumbuna Beteli hante Ai,

⁴pe koꞌuwaꞌana potutua popenomba to nowali uluꞌna, itoꞌomola hi Abara mowowoi konaꞌna PUEꞋ Ala.

⁵Hi Lot woꞌo uwaꞌ gimbane hei gapiꞌna hante bambaruꞌna. Io metuntu moꞌawa hi Abara.

⁶Angkana woiꞌ peꞌohaꞌa tiꞌo hawaꞌi maganaꞌ ropeꞌohaꞌi moꞌawa-awa, alaꞌ woriꞌi lumare, horiana hawaꞌhi hohumbo meꞌohaꞌ moꞌawa-awa.

⁷Iomo horiana poko moheꞌero topolambaꞌne hi Abara hante topolambaꞌne hi Lot. I tempo tiꞌo toKanaꞌa hante toParisi mampeꞌohaꞌihi woiꞌ tiꞌo.

⁸Katoꞌo notiꞌi hi Abara pe hi Lot, “Inioꞌna intu mewali poheꞌeroanta, ba topolambaꞌku hante topolambaꞌmu, alaꞌ ingkiꞌ hieꞌe topohalaliki.

⁹Hareꞌi woꞌo korobalu woiꞌ hieꞌe? Moromiꞌ ane mokaꞌaki. Ane pe koiriko, aku pe koanaꞌa, ane ingko pe koana, aku pe koiriꞌa.”

¹⁰Katoꞌo hi Lot meꞌoꞌele hei noꞌekiꞌ, i humalekiꞌna ngamba Yarade woriꞌ uwaine, hibali kineteꞌna PUEꞋ Ala, hibali woiꞌ i Masiri, wute i Soara. Tiꞌo mewali ikohandoaꞌana PUEꞋ Ala molobuꞌi Sodomo hante Gomora.

¹¹Katoꞌo hi Lot moꞌuwiꞌ lekiꞌna ngamba Yarade tiꞌo, katoꞌo molaimo io pe tinaꞌ motoꞌando hei mokaꞌamohi.

¹²Hi Abara lebaꞌ i woiꞌ Kanaꞌa, angkana hi Lot lebaꞌmo i bolaꞌ-bolaꞌ ngkodeꞌ i ngamba Yarade hei mobambaruꞌ dodungku Sodomo.

¹³Ikoꞌuwaꞌra toaꞌ to Sodomohi hingkaꞌ madosahi hei kodake pe PUEꞋ Ala.

¹⁴Kopokaꞌanalu hi Lot ka hi Abara, notiꞌi PUEꞋ Ala pe hi Abara, “Elemoꞌi mantuleliꞌmu,

¹⁵Alaꞌ lekiꞌna woiꞌ to iꞌokiꞌ tiꞌo hingkiꞌ Kupaꞌanikiko hante pe pemuleꞌamu wute nantolou-louna ipeꞌohaꞌi.

¹⁶Alaꞌ Aku, muleꞌmu hingkiꞌ woriꞌ hibali awuna woiꞌ, ane uwaꞌi toaꞌ to pobiaꞌ moꞌihaꞌ awuna woiꞌ, pemuleꞌamu woꞌo hingkiꞌ nobiaꞌ noꞌihaꞌ.

¹⁷Matimomoko, itengkaꞌimo woiꞌ peꞌohaꞌa hieꞌe motuntuni kokurauꞌna hei kokorobana, alaꞌ pe ingkomola hingkiꞌ Kupepaꞌaniki woiꞌ peꞌohaꞌa hieꞌe.”

¹⁸Uko tiꞌo hi Abara moboliꞌmo bambaruꞌna hei lebaꞌ dodungku nunuꞌ-nunuꞌ i Mamre, dodungku Hebron, katoꞌo nopopetotiꞌimo peꞌohaꞌa menomba pe Pueꞌ Ala itoꞌo