Read Rampi Pewaliana 15 Bible Online

Pewaliana 15 - Rampi bible

Pewaliana 15

¹Katoꞌo mehupaꞌmo pohawaꞌne PUEꞋ pe hi Abara i lali haꞌanu peponoꞌokiꞌi, “Abara inioꞌko motehuꞌ, Akumola labamu, haromu hingkiꞌ kodeꞌ mpololeke.”

²Hi Abara mehoniꞌ, “O Pueꞌ Ala, hawaꞌi uwaꞌ dumbuꞌne ipaꞌanikiꞌa, alaꞌ hawaꞌi uwaꞌ anaꞌka hei ane mahiꞌa intu to hingkiꞌ mamporasiꞌa lumangku iomo hawiꞌku hi Eliese, toDamasi tiꞌo.”

³Notiꞌi womo hi Abara, “Hawaꞌakae Ipaꞌani pemuleꞌa, horiana haduo hawiꞌku tiꞌo hingkiꞌ mantorimo rasiꞌ ka aku.”

⁴Angkana mehupaꞌ pohawaꞌne PUEꞋ pe io, waheꞌe, “Toaꞌ tiꞌo hawaꞌi hingkiꞌ mantorimo rasiꞌ ka ingko angkana anaꞌmu hadoduomu, iomo haduo anaꞌntomaꞌani. Iomo to mantorimo lekiꞌna lumamu.”

⁵Katoꞌo PUEꞋ Ala mangkomi hi Abara mesuwu hei mohawaꞌ, “Amo dewae penoaꞌ pe laniꞌ hei ihaꞌmo betueꞌ-betueꞌ, ane ibiaꞌi iꞌihaꞌ, watoꞌomola koworiꞌne pemuleꞌamu.”

⁶Katoꞌo mepoꞌohimo hi Abara pe PUEꞋ Ala, hei alaꞌ tiꞌo PUEꞋ Ala mantorimoꞌi mewali toaꞌ to mononto i pampeꞌeleNa.

⁷Mohawaꞌ womo PUEꞋ pe io, “Akumo PUEꞋ Ala, to mangkomiko molai ka Ur-Kasdi to hingkiꞌ mampaꞌaniko woiꞌ peꞌohaꞌa hieꞌe iꞌompui.”

⁸Notiꞌi hi Abara, “O Pueꞌ Ala, ka imboreꞌi kubahaꞌi, koꞌakune tumpune?”

⁹PohawaꞌNa pe io, “IroakimoꞌA hambaꞌa gapiꞌ lunaro to hangko tolu ntoꞌa, hambaꞌa gimba laki to hongkoꞌ tolu ntoꞌa, hambaꞌa kokou hante hambaꞌa anaꞌna tinti merpati.”

¹⁰Noroamo lekiꞌna tiꞌo nopopenomba pe PUEꞋ Ala, nobongkaꞌ dolaꞌ dua, katoꞌo noporia podolaꞌ-dolaꞌane tiꞌo noꞌandaꞌ momehinoroi, angkana tinti-tinti tiꞌo hawaꞌi nobongkaꞌ.

¹¹Ikopengkotoꞌunalu tinti to mangka bauꞌ mataꞌ itoꞌo, katoꞌo nobue hi Abara.

¹²Ikohingkiꞌ pentoriꞌnalu ando, turu leꞌo mpiiꞌmo hi Abara. Katoꞌo mehupaꞌ komokorindi to mekototehuꞌi.

¹³Pohawaꞌna PUEꞋ pe hi Abara, Notiꞌi “Ibahaꞌmo mpuꞌu pemuleꞌamuhi hingkiꞌ mewalihi toaꞌ to mehupaꞌ i haꞌanu woiꞌ peꞌohaꞌa to hawaꞌi roꞌompui, hei iohi hingkiꞌ nipohawiꞌhi hei nipopoꞌioꞌiohi, 400 ntoꞌa komoruene.

¹⁴Angkana roboꞌ ngkodeꞌ to hingkiꞌ mampohawiꞌhi, hingkiꞌ Kuhuku, hei uko tiꞌo iohi hingkiꞌ molai hei mangkomi lumara to woriꞌ.

¹⁵Angkana hingkiꞌ nolouko pe peꞌuluamu hante moromiꞌ, ingko hingkiꞌ mahiko i tempo popuhiꞌmo wilolumu.

¹⁶Angkana pemuleꞌamu to kaꞌiba hingkiꞌ mahuliꞌhi i hieꞌe, hinewowoꞌena handoaꞌi tempona Aku mobue toAmori mesuwu ka woiꞌ hieꞌe, ane makajamoꞌi kokodakene waliara honiꞌihi wae intu Kuhuku.”

¹⁷Ikopentoriꞌnamo ando hei mokorindimo, katoꞌo noꞌokiꞌ tandi to meꞌoroꞌ hei huluꞌ to mamua to moliu i lumbuna bauꞌ to nibongkaꞌ tiꞌo.

¹⁸I ando tiꞌomola PUEꞋ Ala mampoꞌuwaꞌ podandi pe hi Abara hei mohawaꞌ, “Pe pemuleꞌamu Kupaꞌanihi woiꞌ peꞌohaꞌa hieꞌe, mepongka ka uwai Masiri wute pe uwai to kodeꞌ tiꞌo, uwai Epara.

¹⁹Iomo woiꞌne toaꞌ toKeni, toKena, toKadomo,

²⁰toHet, toPeris, toRepai,

²¹toAmori, toKanaꞌa, toGirigasi hante toYebusi.”