Read Rampi Pewaliana 16 Bible Online

Pewaliana 16 - Rampi bible

Pewaliana 16

¹Hi Sarai, hantambina hi Abara, hawaꞌi moꞌanaꞌ. Uwaꞌ haduo hawiꞌne to ka Masiri, haduo anaꞌntowowalo to nikokeneꞌi hi Hagar.

²Mololitamo hi Sarai pe hi Abara, “Ibahaꞌlu, PUEꞋ Ala hawaꞌi mampaꞌaniꞌa moꞌanaꞌ, aginamo ingko turu moꞌawa hante hawiꞌku tiꞌo. Wureꞌintu io moꞌanaꞌ hei anaꞌ tiꞌo ipaꞌanikiꞌa.” Hi Abara mampoꞌioꞌ pantiꞌina hi Sara.

³Mewaliꞌ hi Sara, hantambina hi Abara tiꞌo, moroa hi Hagar, hawiꞌna, toaꞌ toMasiri tiꞌo, katoꞌo nopepaꞌanikimo pe hi Abara maꞌanina, nowali hantambina. I tempona hi Abara hampuluꞌ ntoꞌamo meꞌohaꞌ i woiꞌ Kanaꞌa.

⁴Ikonopoꞌolorinalu mpuꞌu hi Abara hi Hagar, katoꞌo mohinonaꞌimo towoweꞌe tiꞌo. Ikonobahaꞌnalu hi Hagar, ikopohinonaꞌinamo, io hinaꞌ mampariwoiꞌmo hi Sarai.

⁵Katoꞌo mololitamo hi Sarai pe hi Abara, “Pepononaꞌa to kuhori hieꞌe mewali lentuamu, akumo to mampaꞌaniko hawiꞌku pe ingko, angkana hangkoꞌlu nobahaꞌ, ikopohinonaꞌina, noꞌele ngkodakemoꞌa hei nopariwoiꞌmoꞌa, PUEꞋ romo to hingkiꞌ mewali topobutusi i lumbunta.”

⁶Notiꞌi hi Abara pe hi Sarai, “Hawiꞌmu tiꞌo i wowoiꞌna komakuasaꞌmu, iwalimo pe io hapo to iꞌele moromiꞌ.” Katoꞌo hi Sarai mampopoꞌioꞌio hi Hagar, horiana io mehilai mampolihiꞌi.

⁷Katoꞌo Malaꞌekana PUEꞋ mampohidupaꞌkiꞌi dodungku haꞌanu mata uwai i popada woꞌoni, iomo dodungku mata uwai i lala pe Sur.

⁸Notiꞌi, “Hagar, hawiꞌna hi Sarai, ka imboko humei hei pe imbo koꞌakoama?” Mehoniꞌ, “Aku mehilaiꞌa mampolihi hi Sarai tuaku.”

⁹Katoꞌo notiꞌi Malaꞌekane PUEꞋ tiꞌo pe io, “Mahuliꞌmoko pe tuamu hi Sarai, hinamoiae nopopoꞌioꞌioko.”

¹⁰Notiꞌi womo Malaꞌekane PUEꞋ tiꞌo pe io, “Aku hingkiꞌ mampopewali woriꞌ muleꞌmu, horiana hawaꞌi mokoꞌihaꞌa alaꞌ koworiꞌna.”

¹¹Kololiuhana notiꞌi Malaꞌekane PUEꞋ pe io, “Ingko mehinonaꞌiko hei hingkiꞌ moꞌanaꞌko haduo oꞌanaꞌ tomaꞌani hei hingkiꞌ nikokeneꞌi hi Sumaeli, alaꞌ nohorimo Pueꞌ konipopoꞌio-ioma tiꞌo.

¹²Poꞌengkona anaꞌ tiꞌo hibali kalide to moꞌilo, watoꞌomola intu anaꞌ tiꞌo, io hingkiꞌ mampotimaliki duo-duona toaꞌ hei duo-duona toaꞌ hingkiꞌ mampotimalikiꞌi, hei ikoꞌuwaꞌana io hingkiꞌ moꞌewa lekiꞌna halalina.”

¹³Katoꞌo hi Hagar mangkokeneꞌi PUEꞋ to mohawaꞌmo pe io tiꞌo hante, “El-Roi.” Palaihana, Pueꞌ Ala to mampeꞌeleꞌa.

¹⁴Iomo horiana bubu tiꞌo nokokeneꞌi toaꞌ, bubu Lahai-Roi, koꞌuwaꞌana i lumbuna Kadesi hante Baret.

¹⁵Katoꞌo hi Hagar moꞌanaꞌmo haduo anaꞌ tomaꞌani pe hi Abara hei hi Abara mangkokeneꞌi anaꞌ tiꞌo hi Sumaeli.

¹⁶I tempona hi Sumaeli nipoꞌanaꞌki, tinuwuꞌna hi Abara 86 ntoꞌa.