Read Rampi Pewaliana 17 Bible Online

Pewaliana 17 - Rampi bible

Pewaliana 17

¹I tempona hi Abara motinuwuꞌ 99 ntoꞌa, PUEꞋ mampetidoꞌki wotaNa pe hi Abara hei mantiꞌi pe io, “Akumo Pueꞌ Ala to Makuasaꞌ, tuwuꞌmoko hawaꞌi uwaꞌ dakena i hinarongKu.

²Aku hingkiꞌ mampoꞌuwaꞌa podandia ka Aku hante ingko, hei Aku hingkiꞌ mampopewali woriꞌ muleꞌmu.”

³Katoꞌo melingkotuꞌmo hi Abara hante rouꞌna toꞌu i woiꞌ, hei Pueꞌ Ala mantiꞌi pe io,

⁴“Hieꞌemo dandingKa pe ingko, ingko hingkiꞌ mewaliko umoꞌna woriꞌ kodatua.

⁵Alaꞌ tiꞌo, konaꞌmu handoꞌiomo hi Abara, angkana hi Burahima, alaꞌ ingko Kuparilangkaꞌmoko mewali umoꞌna woriꞌ kodatua.

⁶Alaꞌ Aku, muleꞌmu hingkiꞌ mewali woriꞌ, hingkiꞌ Kupopewaliko mewali kodatua ngkodeꞌ hei ka ingko pepongkane datu-datu.

⁷Aku hingkiꞌ mampoꞌuwaꞌA podandi hante ingko wute i muleꞌmu nantolou-louna mewali podandia tota uwaꞌ koꞌukoana, hingkeꞌna Aku mewali Pueꞌ Alamu hei Pueꞌ Alana muleꞌmu.

⁸Aku hingkiꞌ mampaꞌanikei woiꞌ peꞌohaꞌa to ipeꞌohaꞌikei hibali toaꞌ to wolaꞌ iseꞌe pe ingko hante pe muleꞌmu, iomo lekiꞌna woiꞌ Kanaꞌa hingkiꞌ kupepaꞌaniki iꞌompui wute nantolou-louna, hei Aku hingkiꞌ mewaliꞌA Pueꞌ Alara.”

⁹Pueꞌ Ala mohawaꞌ womo pe hi Burahima, “Ka tinaꞌ ingko, hangangaa motikoko woꞌo dandingKu, hatoꞌo woꞌo muleꞌmu nantolou-louna.

¹⁰Iomo, ingko hei duo-duona tomaꞌani ka ingkei hangangaa nibulabaꞌ.

¹¹Hangangaa nibulabaꞌ mewali tandaꞌ podandingKu hante ingko.

¹²Oꞌanaꞌ to moꞌumuruꞌ walu ando hangangaa nibulabaꞌ, iomo duo-duona tomaꞌni ka ingkei moromiꞌ anaꞌna hawiꞌmu to nipoꞌanaꞌki i tambimu ba hawiꞌmu to nihili.

¹³Toaꞌ to nipoꞌanaꞌki i tambimu hei toaꞌ to ihili hante doiꞌ hangangaa nibulabaꞌ, horiana mewali haꞌanu komambahana podandiangKu tota uwaꞌ koꞌukoana.

¹⁴Hihimolu tomaꞌani tota uwaꞌ tanda podandi tiꞌo, io hingkiꞌ nipomoꞌela ka lumbu-lumbuna tino, alaꞌ hawaꞌi motuntuni hadolaꞌ ka podandi hante Aku.”

¹⁵Kololiuhana Pueꞌ Ala mohawaꞌ pe hi Burahima, “Noniuꞌ hantambimu hi Sarai, Inioꞌmo iwowoi hi Sarai, angkana Kuwolihimo konaꞌne iomo hi Sara.

¹⁶Aku hingkiꞌ mobarakatiꞌi, hei Aku mampaꞌaniꞌi haduo oꞌanaꞌ tomaꞌani, hei Aku hingkiꞌ mobarakatiꞌi, horiana io mewali inoꞌ roboꞌ-roboꞌ ngkodeꞌ. Datu-datu hei roboꞌ-roboꞌ ngkodeꞌ hingkiꞌ nipoꞌanaꞌki ka io.”

¹⁷Katoꞌo hi Burahima melingkotuꞌmo hante rouꞌna toꞌu pe woiꞌ hei nokokereꞌilu hei notiꞌi i lalina, “Uwaꞌreꞌi ka haduo to motinuwuꞌmo 100 ntoꞌa hieꞌe hingkiꞌ moꞌanaꞌ tene? Hei hingkiꞌ moꞌanaꞌreꞌi tene hantambingka hi Sara to motinuwuꞌmo hio mpuluꞌ ntoꞌa?”

¹⁸Katoꞌo noperapiꞌ hi Burahima pe Pueꞌ Ala notiꞌi, “Hinamo hi Sumaeli to mantorimo podandiMu to Ipepaꞌaniki pe aku.”

¹⁹Angkana Pueꞌ Ala mantiꞌi, “Hawaꞌi, hantambimumola hi Sara to hingkiꞌ mampoꞌanaꞌki oꞌanaꞌ tomaꞌani pe ingko, hei ingko hingkiꞌ mangkokoneꞌi hi Isaki, hei Aku hingkiꞌ mampoꞌuwaꞌa podandiangKu hante io mewali podandia tota uwaꞌ koꞌukoana pe muleꞌna.

²⁰Noniuꞌ hi Sumaeli, Kuhorimo perapiꞌma, io hingkiꞌ Kubarakati, hei Kupaꞌani mamuleꞌ, io hingkiꞌ mampemuleꞌki hampuluꞌ meroduo datu, hei Aku hingkiꞌ mampopewaliꞌi mewali roboꞌ to kodeꞌ.

²¹Angkana podandiangKu hingkiꞌ kupoꞌuwaꞌ hante hi Isaki, to hingkiꞌ nopoꞌanaꞌki hi Sara pe ingko i toꞌa to hupaꞌ i tempo to hibali hieꞌe.”

²²Ikoꞌukonalu mohawaꞌ pe hi Burahima, Pueꞌ Ala mampolihimo hi Burahima.

²³Uko tiꞌo hi Burahima mowowoi hi Sumaeli anaꞌna, hei lekiꞌna toaꞌ to nipoꞌanaꞌki i tambina, moromiꞌ toaꞌ to nohili hante doiꞌ, iomo lekiꞌna tomaꞌani, katoꞌo io motuntuni hawaꞌ pebulabaꞌ i ando tiꞌolumo, hibali to nohowoꞌikimo Pueꞌ Ala pe io.

²⁴I tempona nibulabaꞌ hi Burahima moꞌumuruꞌmo 99 ntoꞌa.

²⁵Hei hi Sumaeli anaꞌna, moꞌumuruꞌmo hampuluꞌ tolu ntoꞌa i tempona nibulabaꞌ.

²⁶I ando tiꞌo woꞌo hi Burahima hante hi Sumaeli anaꞌna, hiꞌoꞌalu nibulabaꞌ.

²⁷Hei lekiꞌna toaꞌ to i lali tambina hi Burahima, moromiꞌ to nipoꞌanaꞌki i tambina, ba to nohili hante doiꞌ ka toaꞌ ntaniꞌ, nibulabaꞌ moꞌawa-awa hante io.