Read Rampi Pewaliana 18 Bible Online

Pewaliana 18 - Rampi bible

Pewaliana 18

¹Katoꞌo PUEꞋ mampopemombaha wotana pe hi Burahima dodungku i nunuꞌ i Mamre, i kolentuꞌana io mahura i wambaꞌ bambaruꞌna i tempona ando molaho mpololeke.

²Ikonoꞌaronalu lione, io pangkiꞌ tolu duo toaꞌ metotiꞌi dodungku bambaruꞌna, io liu mehilai ka wambaꞌ bambaruꞌna ako mampohidupaꞌkihi, katoꞌo io melingkotuꞌ wute pe woiꞌ,

³hei mololita, “Ane ipoꞌioꞌkei, maweokei i bambaruꞌna hawiꞌmu hieꞌe.

⁴Namoiae akoꞌa moroa uwai hangkiuꞌ, nipopowaheꞌ kapuꞌmi hingkeꞌna ipeꞌohaꞌmokei i luaꞌna loti hieꞌe mampomoholi wongkoꞌmi.

⁵Aginamoiae kuporoakikei to niꞌoka, hingkeꞌna marohokei huliꞌ, alaꞌ maweomokei i bambaruꞌna hawiꞌmu hieꞌe, honiꞌkei mampololiu patengkaꞌami.” Mehoniꞌhi, “Ijamamo hibali to itiꞌi.”

⁶Katoꞌo hi Burahima tolou pe bambaruꞌ ako mampohawaꞌki hi Sara, notiꞌi, “Iroamo haꞌanu kanduꞌ tinampu to moromiꞌna! Ihohiꞌi ilaboꞌ hei iwali depa to maleꞌenu!”

⁷Katoꞌo mehilaimo hi Burahima pe gimpuna, noroamo hambaꞌa anaꞌna gapiꞌ to molompoꞌ hei nopepaꞌaniki pe haduo hawiꞌna, hingkeꞌna nopatimomoꞌi.

⁸Katoꞌo noroamo uwai omiꞌ gapiꞌ to wolaꞌ hante uwai omiꞌ to boku hei ohina bauꞌ to lehaꞌmo, hei nopatimomokihi i hinarona tolorinahi tiꞌo hei io metotiꞌi dodungku iohi i luaꞌna loti tiꞌo, kolentuꞌara mangka.

⁹Katoꞌo meꞌitanohi pe io, “I imboreꞌi hi Sara, hantambimu?” Mehoniꞌ, “Inoꞌo, i lali bambaruꞌ.”

¹⁰Notiꞌi to Haduone, “Pehantoꞌana hingkiꞌ humei womoꞌA pe ingko, i tempo tiꞌo hi Sara hingkiꞌ mampoꞌanaꞌki oꞌanaꞌ tomaꞌani.” WiharoNa nohorilu hi Sara ka lali bambaruꞌ.

¹¹I tempo tiꞌo, hi Burahima hante hi Sara motodimohi, hei hi Sara hamboaꞌmo nohua wula.

¹²Katoꞌo nokokereꞌilu hi Sara, notiꞌi i lalina, “Aku motodimoꞌa, hei maꞌaningku motodimo woꞌo hei hamboaꞌmoka nolando moloꞌori.”

¹³Katoꞌo notiꞌi PUEꞋ pe hi Burahima, “Mahamporeꞌi hi Sara hinaꞌ kokareꞌ hei mantiꞌi totuꞌunareꞌi hingkiꞌ moꞌanaꞌa i komotodiangkumo?

¹⁴PUEꞋ pobiaꞌ mowali hapo tota nobiaꞌ nowali toaꞌ. I tempo to Kupokonontomo, i toꞌa to dongkaꞌ, Aku hingkiꞌ mahuliꞌA mampomehuakiko. I tempo tiꞌomola hi Sara uwaꞌmo haduo anaꞌne tomaꞌani.”

¹⁵Katoꞌo hi Sara mesapu alaꞌ motehuꞌi notiꞌi, “Hawaꞌakae kokareꞌ,” angkana PUEꞋ mantiꞌi, “Umbiꞌ kokareꞌko!”

¹⁶Katoꞌo molaimohi toaꞌ tiꞌo hei meꞌoꞌele pe Sodomo. Hi Burahima matengkaꞌ moꞌawa-awa hante iohi ako mowonahi.

¹⁷Notiꞌi PUEꞋ i lali pampekirina, “Hawaꞌi hingkiꞌ kuwowuni pe hi Burahima hapo to hingkiꞌ Kuwali hieꞌe.

¹⁸Alaꞌ hi Burahima hingkiꞌ mewali roboꞌ ngkodeꞌ to makuasaꞌ, hei alaꞌ io, hinangkana roboꞌ i duniaꞌ hingkiꞌ pahua pebarakati.

¹⁹Io Kuꞌuwiꞌmo, hingkeꞌna nopepoturuꞌki pe muleꞌna motuntuni lala to Kutidoꞌkiꞌi, hante mowali to manihoiꞌ hei hawaꞌi mampohambombeiꞌa, ane iohi motuntuni tiꞌo Aku mampobuhoꞌi hapo to Kudandiki pe Io.”

²⁰Uko tiꞌo mololitamo PUEꞋ pe hi Burahima, “Woriꞌmo pangkonunuꞌne toaꞌ noniuꞌ Sodomo hante Gomora alaꞌ monono rahi dosare.

²¹Moromiꞌ rahimo, Aku mengkohou ako mampeꞌele, ba tuꞌu-tuꞌu mpuꞌu iohi mowalia ngkodake hibali pangkonunuꞌana toaꞌ to wutemo pe Aku ba hawaꞌi, hingkeꞌna Kubahaꞌi.”

²²Katoꞌo molaimo tolori to meroduo matengkaꞌ pe Sodomo, angkana PUEꞋ tontona mampoꞌowoni hi Burahima.

²³Hi Burahima mekododungku pe PUEꞋ hei notiꞌi, “Haporeꞌi hinaꞌ hingkiꞌ molobuꞌiKo toaꞌ to mononto moꞌawa-awa hante toaꞌ to masalaꞌ?

²⁴Hohumbo ane uwaꞌi 50 duo to mononto i lali kota tiꞌo? Hingkiꞌ Ipoꞌuko kota tiꞌo, hawaꞌKoreꞌi marima Pueꞌ mopahi salaꞌra, alaꞌ to 50 duo to mononto tiꞌo?

²⁵Inioꞌ mpuꞌu Ipopewali hatoꞌo Pueꞌ, hingkiꞌ molobuꞌi to masalaꞌ mampohangkembaꞌa tota masalaꞌ. Woi-woina moꞌela ka PUEꞋ, uwaꞌki woꞌo PUEꞋ mobutusi hante hawaꞌi hintotoꞌ?”

²⁶Notiꞌi PUEꞋ, “Ane Kuhuaꞌi 50 duo to mononto i lali kota Sodomo, Aku hingkiꞌ moꞌampuni lekiꞌna to uwaꞌ i kota tiꞌo alaꞌ iohi.”

²⁷Hi Burahima mantiꞌi, “Kehapoꞌi aku awuluꞌa, angkana Iꞌampuniꞌa ane aku mengkoworaniꞌa mantiꞌi pe PUEꞋ.

²⁸Hohumbomo ane 45 duo romo, to monontono, tontona hingkiꞌ Ilobuꞌi kota tiꞌo?” Notiꞌi PUEꞋ, “Aku hawaꞌi molobuꞌihi ane uwaꞌhi tene Kuhua 45 duo to mononto.”

²⁹Hi Burahima mampololiu womo pololitana pe PUEꞋ, “Hohumbomo ane uwaꞌ tene 40 duo to mononto inoꞌo?” Notiꞌi PUEꞋ, “Aku hawaꞌA hingkiꞌ mowali watoꞌo alaꞌ to 40 tiꞌo.”

³⁰Notiꞌi hi Burahima, “PUEꞋ, inioꞌKo bukota, ane mololitaꞌa hampiha womo. Hohumbomo ane Ihuaꞌi 30 duo tene to mononto inoꞌo?” Notiꞌi PUEꞋ, “Aku hawaꞌA hingkiꞌ mowali watoꞌo, ane Kuhuaꞌi tene 30 duo inoꞌo.”

³¹Hi Burahima mantiꞌi, “Totuꞌuna aku mengkowurani womoꞌa mololita pe PUEꞋ. Hohumbomo ane 20 duohi to mononto Ihua inoꞌo?” Notiꞌi PUEꞋ, “Aku hawaꞌa hingkiꞌ molobuꞌihi alaꞌ to 20 tiꞌo.”

³²Hi Burahima mantiꞌi, “InioꞌKo bukota PUEꞌ ane aku mololitaꞌa, hampiha romo. Hohumbomo ane 10 duohi to mononto to Ihua inoꞌo?” Notiꞌi PUEꞋ, “Aku hawaꞌA hingkiꞌ molobuꞌihi alaꞌ to 10 duo tiꞌo.”

³³Koꞌukonalu mololita pe hi Burahima, katoꞌo PUEꞋ molaimo, hei hi Burahima mahuliꞌmo pe peꞌohaꞌana.