Read Rampi Pewaliana 2 Bible Online

Pewaliana 2 - Rampi bible

Pewaliana 2

¹Watoꞌomola koNopokoꞌukoane koNowalina laniꞌ hante woiꞌ hei hinangkana ohina to Nowali.

²I ando kapitu, Pueꞌ Ala mampeꞌele jamana tiꞌo ukomo lekiꞌna hei Io meꞌohaꞌmo i ando tiꞌo.

³Katoꞌo Pueꞌ Ala mobarakati ando kapitu tiꞌo hei Nopokodeꞌ, alaꞌ i ando tiꞌomola Io meꞌohaꞌ ka lekiꞌna jamaNa.

⁴Hatoꞌomola lolitonane laniꞌ hante woiꞌ i tempona niwali. I tempona PUEꞋ Ala mowali woiꞌ hante laniꞌ,

⁵handoaꞌi uwaꞌ koraꞌ hapolu to tuwuꞌ i woiꞌ, handoaꞌi memutu huꞌa-huꞌa hapolu i popada, alaꞌ PUEꞋ Ala handoaꞌi mampopengkohou ura pe duniaꞌ, hei handoaꞌi uwaꞌ toaꞌ to hingkiꞌ maꞌintuꞌ woiꞌ tiꞌo,

⁶angkana uwaꞌ kini mehendeꞌ pe womboꞌ ka duniaꞌ hei mobongkoꞌi lekiꞌna womboꞌna woiꞌ tiꞌo.

⁷Katoꞌo PUEꞋ Ala moteru manusiaꞌ ka awuna woiꞌ, hei mohumuruꞌi inohaꞌ kotuwuꞌ pe lali onuna, watoꞌomola manusiaꞌ tiꞌo mewali to tuwuꞌ.

⁸Kololiuhana PUEꞋ Ala mowali kineteꞌ i woiꞌ Paradesi, i tinaꞌ motoꞌando, itoꞌomo Nopopeꞌohaꞌi manusiaꞌ to Noteru tiꞌo.

⁹Katoꞌo PUEꞋ Ala mampotuwuꞌ molangkaꞌ-langkaꞌ loti i kineteꞌ tiꞌo, to mekohohokai hei to motomiꞌ niꞌoka wuaꞌne. I lumbu-lumbuna kineteꞌ uwaꞌ loti to mepaꞌani kotuwuꞌa, hei loti to mepaꞌani kopebahaꞌ noniuꞌ hapo to moromiꞌ hante hapo to kodake.

¹⁰Uwaꞌ hangkaru halu to moꞌili ka Eden to mobongkoꞌi kineteꞌ Paradesi tiꞌo, hei halu tiꞌo modolaꞌ mewali iba ngkaru.

¹¹To kaꞌisaꞌ, konaꞌne Pison, iomo to moꞌili motuleliꞌi lekiꞌna woiꞌ Hawila, koꞌuwaꞌana bulawa.

¹²Hei bulawa ka woiꞌ peꞌohaꞌa tiꞌo moromiꞌ, itoꞌo uwaꞌ damaꞌ bedola hante watu-watu paramata krisopras.

¹³Konaꞌna uwai korongkaruna iomo Gihon, iomo to moꞌili motuleliꞌi woiꞌ Kus.

¹⁴Konaꞌna uwai to katolu ngkaruna iomo Tigris, iomo to moꞌili ka tinaꞌ moto andona Asur. Hei uwai to koꞌiba ngkaruna iomo Efrat.

¹⁵PUEꞋ Ala mampopeꞌohaꞌ manusiaꞌ tiꞌo i kineteꞌ Paradesi hingkeꞌna roꞌintuꞌi hei rorewahi kineteꞌ tiꞌo.

¹⁶Katoꞌo PUEꞋ Ala mantiꞌi pe manusiaꞌ, “Lekiꞌna loti i lali kineteꞌ Paradesi hieꞌe wadilu iꞌoka wuaꞌne hante pelei-leimu,

¹⁷angkana wuaꞌ loti to mepaꞌani kononto lali noniuꞌ to moromiꞌ hei to kodake tiꞌo, inioꞌ iꞌokaꞌi wuaꞌne, alaꞌ i ando koꞌiꞌokana, bateꞌna mahiko.”

¹⁸PUEꞋ Ala mohawaꞌ, “Hawaꞌi moromiꞌ, ane manusiaꞌ tiꞌo hadoduonalu. Aku hingkiꞌ mowaliꞌA haduo toaꞌ to mosulungiꞌi, to hintotoꞌ hante io.”

¹⁹Katoꞌo PUEꞋ Ala moroa woiꞌ Nolebu Nopopewali hinangkana pinatuwuꞌ i lopoꞌ hei hinangkana tinti to i raoha. Nokomimo lekiꞌna tiꞌo pe manusiaꞌ, hingkeꞌna manusiaꞌ tiꞌo mampaꞌanihi konaꞌ hori-hori hei iomo to mewali konaꞌre.

²⁰Manusiaꞌ tiꞌo mepaꞌani konaꞌ pe hinangkana pinatuwuꞌ, pe tinti-tinti hei hinangkana pinatuwuꞌ lopoꞌ, angkana io hadoduona hawaꞌi pahua awana to hintotoꞌ hante io.

²¹Katoꞌo PUEꞋ Ala mowali manusiaꞌ tiꞌo loleꞌo bobaha. I koturunalu, Pueꞌ Ala moroa hangkaru wuku uhuꞌna, katoꞌo koNoroahana tiꞌo Notutuꞌi hante ohi.

²²Hei ka uhuꞌna to noroa PUEꞋ Ala ka manusiaꞌ tiꞌo, Nopopewalimo haduo towoweꞌe, katoꞌo Nokomimo pe manusiaꞌ tiꞌo.

²³Katoꞌo notiꞌi manusiaꞌ tiꞌo, “Hieꞌemo io to hibali hante aku, alaꞌ wukuna niroa ka wukungku hei ohina niroa ka ohingku. Io hingkiꞌ nikokeneꞌi towoweꞌe, alaꞌ io niroa ka tomaꞌani.”

²⁴Iomo horiana tomaꞌani hingkiꞌ mampolihi umoꞌna hante inoꞌna hei mohaꞌanu hante hantambina, horiana iohi mewalihi haꞌanu ohi.

²⁵Iohi meroduo-duora mewula mpahihi, tomaꞌani hante towoweꞌe tiꞌo, angkana hawaꞌhi mohili.