Read Rampi Pewaliana 22 Bible Online

Pewaliana 22 - Rampi bible

Pewaliana 22

¹Hawaꞌi morue katoꞌo, Pueꞌ Ala mohohongkeꞌi pepoꞌohina hi Burahima Notiꞌi, “Burahima”. Mehoniꞌ hi Burahima, “Hapo Pueꞌ.”

²Notiꞌi womo Pueꞌ Ala, “Noloumoko pe woiꞌ Moria hante hi Isaki anaꞌmu to hadoduona, to ipotundeꞌ mpololeke. Inoꞌo uwaꞌ haꞌanu biri to hingkiꞌ Kutidoꞌkiko. Hangangaa irereꞌ anaꞌma honiꞌi idompuhi mewaliꞌ popenombamu pe Aku.”

³Kopoꞌonina mehoꞌolu-olu, meꞌaromo hi Burahima honiꞌi molapiꞌi kalidena. Uko tiꞌo mobeho loti to hingkiꞌ nopetunui popenombana hei nopatekeꞌ i kalidena. Timomomo lekiꞌ-lekiꞌna honiꞌi noloumo hante hi Isaki hante meroduo hawiꞌna. Nolouhi pe biri to nopetiꞌiki Pueꞌ Ala.

⁴Ikotolu andora matengkaꞌ noꞌokiꞌmo biri tiꞌo ka moꞌela.

⁵Katoꞌo notiꞌi pe hawiꞌna to roduo, “Iseꞌemokei mampekau moꞌawa hante kalidenta, alaꞌ ingka ntoliꞌanaꞌ hingkiꞌ noloukaꞌo menomba pe PUEꞋ Ala, uko tiꞌo mahuliꞌluka humei.”

⁶Katoꞌo hi Burahima moroa loti to hingkiꞌ nopodompui popenombana, noponokowaꞌiki hi Isaki, hei io mangkomi ladiꞌ hante api, katoꞌo matengkaꞌmohi nolou.

⁷Notiꞌi hi Isaki pe umoꞌna “Umoꞌ!” Mehoniꞌ hi Burahima, “Haporeꞌi anaꞌku?” Meꞌitano hi Isaki, “Hinewowoꞌena uwaꞌmo loti hante api, angkana imbomoꞌi anaꞌ gimba to hingkiꞌ topopenomba?”

⁸Mehoniꞌ hi Burahima “Pueꞌ Ala to hingkiꞌ mampoꞌuwaꞌ anaꞌ gimba tiꞌo,” Honiꞌi, ropololiu patengkaꞌare.

⁹Kowuteralu i peꞌohaꞌa to nopotintoki Pueꞌ Ala pe hi Burahima, nohuntu-huntumo watuo, honiꞌi noꞌodoꞌ loti i womboꞌna. Uko tiꞌo nohiluꞌmo hi Burahima korawena hante kapuꞌna anaꞌna honiꞌi nohumboꞌaki i womboꞌ loti to roꞌodoꞌ.

¹⁰Uko tiꞌo moroa ladiꞌ to hingkiꞌ nopoporereꞌ anaꞌna.

¹¹Angkana malaꞌekana PUEꞋ mewowoi ka laniꞌ notiꞌi, “Burahima, Burahima!” Mehoniꞌ hi Burahima, “Iheꞌeluꞌa Pueꞌ.”

¹²Liu notiꞌi malaꞌekane PUEꞋ, “Inioꞌ irokoꞌi ba ipahampo-hampoꞌi anaꞌma tiꞌo. Hinewoꞌena Kubahaꞌmo pengkoruꞌma pe Aku, alaꞌ hawaꞌi ipekabohiꞌ anaꞌma to hadoduona, ipepaꞌaniki pe Aku.”

¹³Uko tiꞌo mehahiliꞌ hi Burahima, noꞌoki hambaꞌa gimba laki to hikaiꞌkiꞌ tanduꞌne i wulaꞌi, noroamo gimba tiꞌo norereꞌ honiꞌi nodompuhi nopopenomba pe PUEꞋ Ala, gimba tiꞌo to mampohawa anaꞌna.

¹⁴Iomo horiana pebolaꞌa tiꞌo hinaꞌ nokokeneꞌi hi Burahima, “PUEꞋ mampoꞌuwaꞌ hapo to toparaluꞌi.” Wute hinewowoꞌena poko rotiꞌi “I womboꞌ birina PUEꞋ, PUEꞋ mampoꞌuwaꞌ hapo to niparaluꞌi.”

¹⁵Korompihana malaꞌekana PUEꞋ meꞌoꞌando ka laniꞌ pe hi Burahima,

¹⁶Notiꞌi, “Aku mosumpaꞌa i lali konaꞌKu hadoduongKu, waheꞌemola pohawaꞌne PUEꞋ, alaꞌ mampetuntuiko pohawaꞌKu hante hawaꞌi ipekabohiꞌ anaꞌma to hadoduona tiꞌo,

¹⁷hingkiꞌ Kubarakatiko hingkeꞌna nomoromiꞌ kotuwuꞌmu hei pemuleꞌamu Kupopembiaꞌ hibali koworiꞌna betueꞌ i laniꞌ hante hibali woꞌoni to i bota ntahiꞌ hei pemuleꞌamu tiꞌo hingkiꞌ monanihi poniꞌra.

¹⁸Ka pemuleꞌamu, Aku hingkiꞌ mobarakati lekiꞌ-lekiꞌna roboꞌ i duniaꞌ, alaꞌ ingko mampetuntuiko pohawaꞌKu.”

¹⁹Uko tiꞌo hi Burahima hante hi Isaki mahuliꞌmohi pe hawiꞌra to roduo. Honiꞌi mahuliꞌmohi moꞌawa-awa pe bolaꞌ Baraseba meꞌohaꞌhi itoꞌo.

²⁰Kolentuꞌana hi Burahima inoꞌo, io pahori karebana hi Nahor kokaꞌna hante hi Milika hantambina to moꞌanaꞌ walu duo tomaꞌani, iomo:

²¹hi Us tokokaꞌ, hi Bus hineeꞌna, hi Kemuel to hingkiꞌ mampemuleꞌki toAram,

²²hante hi Keset, hi Haso, hi Pilda, hi Yildaf hante hi Betuel

²³to mewali umoꞌna hi Rubeka. Walu duo hieꞌe nopoꞌanaꞌki hi Milika pe hi Nahor, halalina hi Burahima.

²⁴Hatoꞌo woꞌo hi Reuma to noropaꞌ hi Nahor, mampoꞌanaꞌki hi Tebah, hi Gaham, hi Taha hante hi Maꞌaka.