Read Rampi Pewaliana 23 Bible Online

Pewaliana 23 - Rampi bible

Pewaliana 23

¹Ganaꞌmo tinuwuꞌne hi Sara 127 ntoꞌa,

²honiꞌi mahi i bolaꞌ Kiriat-Arba to nitiꞌi woꞌo Hebron i woiꞌ Kanaꞌa. Handondoiha laline hi Burahima mampeꞌoloni komahina hantambina.

³Uko tiꞌo nopolihi hangkaꞌ hantambine to kolentuꞌana nipowata, nolou pe toHet tumpu woiꞌ tiꞌo,

⁴notiꞌi, “Aku hieꞌe topehupaꞌluꞌa meꞌohaꞌ i lumbu-lumbumi. Ane hohumboꞌi kuperapiꞌ hingkeꞌna ipaꞌaniꞌakei mehili halimboꞌ woiꞌ kupotawui hantambingku.”

⁵Mehoniꞌhi rotiꞌi,

⁶“Uweꞌ, kiꞌadaꞌiko alaꞌ ingkolu haduo tadulako to maroho i iliꞌki, mewaliꞌ, motanaꞌ lalingki ane moꞌuwiꞌko halimboꞌ to moromiꞌ i woiꞌki to ipetawui hantambimu. Ingka motanaꞌka mampatimomo petowuana hantambimu.”

⁷Uko tiꞌo melingkotuꞌ hi Burahima i hinarora toHet, tumpu woiꞌ honiꞌi notiꞌi,

⁸“Ane ipoꞌioꞌlukei perapiꞌka, hantambingku hingkiꞌ kutawu iseꞌe. Kuperapiꞌ sulungi iperapiꞌkiꞌa pe hi Epron, anaꞌna hi Sohar.

⁹Hingkeꞌna nopaꞌanikiꞌa kuhili haꞌanu woloꞌ watu i Mapela to uwaꞌ i bota kineteꞌna. Hilina woiꞌ tiꞌo hingkiꞌ kubaiari hampihalao i hinaromi hingkeꞌna mewali woiꞌku to kipotawui.”

¹⁰Tempo tiꞌo, hi Epron to kolentuꞌana mahura moꞌawa hante toHet dodungku i wambaꞌ bente kota, mohoniꞌ hi Burahima i hinarora notiꞌi,

¹¹“Uweꞌ hampoliꞌmo ihili woiꞌ tiꞌo alaꞌ kineteꞌku hei woloꞌ watu to uwaꞌ itoꞌo kupepaꞌaniki pe ingko hingkeꞌna ipotawuiꞌi hantambimu. Tinongku iseꞌe to mewali sabiꞌ”

¹²Katoꞌo hi Burahima melingkotuꞌ i hinarona toHethi,

¹³honiꞌi notiꞌi pe hi Epron, “Kuperapiꞌ hingkeꞌna ipehoromuakei lolitangka hieꞌe. Hingkiꞌ kubaiari hiline kineteꞌmu, kuperapiꞌ hangangaa itorimo hiline, hingkeꞌna hantambingku kutawu itoꞌo.”

¹⁴Mehoniꞌ hi Epron,

¹⁵“Uweꞌ, halimboꞌ woiꞌ tiꞌo iba natulu doiꞌ peraꞌ hiline. Hapo dumbuꞌne doiꞌ tiꞌo i ingkiꞌ roduo? Itawumo itoꞌo hantambima.”

¹⁶Hi Burahima mampoꞌioꞌ hilina, noꞌihaꞌmo koworiꞌne doiꞌna hintotoꞌ hante pantiꞌina hi Epron, iomo iba natu doiꞌ peraꞌ, doiꞌ tiꞌo niꞌihaꞌ i timbanga to nopakeꞌ topobaluꞌ-baluꞌ, honiꞌi nobaiarimo pe hi Epron i hinarona lekiꞌ-lekiꞌna toHet to uwaꞌ itoꞌo.

¹⁷Watoꞌomola woiꞌne hi Epron i Mapela to tinaꞌ i motoꞌando i Mambre mewalimo dolaꞌna hi Burahima woiꞌ tiꞌo tekahi kineteꞌ, woloꞌ watu hante lekiꞌ-lekiꞌna loti to uwaꞌ itoꞌo, nipaꞌaniki hi Burahima.

¹⁸Lekiꞌ-lekiꞌna toHet to dodungku i wambaꞌ bente kota, mosobiꞌi konohilinamo hi Burahima woiꞌ tiꞌo.

¹⁹Katoꞌo notawumo hi Burahima hi Sara hantambine i lali woloꞌ watu Mapela i woiꞌ Kanaꞌa.

²⁰Hatoꞌo lolitonane kineteꞌ hei woloꞌ watu Mapela. Uluꞌna woiꞌ tiꞌo, woiꞌna toHethi, angkana mewalimo dolaꞌna hi Burahima, mewali woiꞌ petowuara.