Read Rampi Pewaliana 24 Bible Online

Pewaliana 24 - Rampi bible

Pewaliana 24

¹Hi Burahima motodimo mpololeke, hei nobarakati PUEꞋ i langkaꞌ-langkaꞌna.

²I tempo tiꞌo, mololitamo hi Burahima pe hawiꞌna tokokaꞌ to morewahi lekiꞌ-lekiꞌna lumana notiꞌi, “Ilulemo korawema i kohelaꞌna paꞌangku,

³hei mosumpamoko i lali konaꞌna PUEꞋ tumpuna woiꞌ hei laniꞌ hei hinangkana ohina, hingkeꞌna hako mampaliꞌ hantambina anaꞌku hi Isaki i seꞌe i woiꞌ Kanaꞌa.

⁴Angkana noloumoko pe woiꞌ konipoꞌanaꞌangkiku, inoꞌo ipampaliꞌki haduo anaꞌntowowalo ka iliꞌna tinongku to hingkiꞌ nopohantambi anaꞌku hi Isaki.”

⁵Meꞌitano hawiꞌne pe io, “Uweꞌku, hohumbo ane towoweꞌe tiꞌo hawaꞌi hiniꞌ mampolihi tambina, hei hawaꞌi hiniꞌ metuntu aku humei iseꞌe? Ba kukomi anaꞌma nolou pe woiꞌ konipoꞌanaꞌakimu?”

⁶Angkana nohoniꞌ hi Burahima, “Inioꞌ! Inioꞌ mpuꞌu ikomiꞌi anaꞌka nolou!

⁷PUEꞋ tumpuna laniꞌ, Iomo to mangkomiꞌa ka tambina umoꞌku hei ka woiꞌna halalingkuhi, hei modandi pe aku Io hingkiꞌ mampaꞌaniꞌi woiꞌ hieꞌe, Io woꞌo hingkiꞌ morumbaꞌ malaꞌekaNa mampodulukiko hingkeꞌna ihuaꞌi haduo towoweꞌe to hintotoꞌ nopohantambi anaꞌku.

⁸Angkana ane anaꞌntowowalo tiꞌo hawaꞌi hiniꞌ metuntu humei iseꞌe, hamboaꞌmoko tehiluꞌ hante sumpamu. Kehapoꞌi hohumbomo, anaꞌku hawaꞌi wadi ikomi nolou.”

⁹Katoꞌo, hawiꞌna molule korawena i kohelaꞌna paꞌana hi Burahima, hei mosumpa mampetuntui hapo to notiꞌikiꞌi hi Burahima.

¹⁰Uko tiꞌo, noroamo hawiꞌna hi Burahima hampuluꞌ mbaꞌa unta nopopatekeꞌi parewana hi Burahima to masuliꞌ hei luma-lumana to masuliꞌ katoꞌo liu-liu molai nolou pe bolaꞌna hi Nahor to moꞌela i woiꞌ Aram-Mesopotamia.

¹¹Haꞌumbora ando matengkaꞌ hupaꞌmo mpuꞌu i bolaꞌna hi Nahor. Kohupaꞌna itoꞌo kononewamo tempona towoweꞌe ako mehangkuꞌ i bubu. Katoꞌo nopopeꞌohaꞌmo untane i botana bolaꞌ dodungku bubu.

¹²Uko tiꞌo mekokaemo hawiꞌne Burahima notiꞌi, PUEꞋ to nopenombai uweꞌku hi Burahima. Isulungiꞌa kaiaꞌ hingkeꞌna ando hieꞌe tebuhoꞌi hapo tungkaihangka. Ipotongawamo rimaMa pe uweꞌku hi Burahima.

¹³Metotiꞌiꞌa dodungku bubu, hei hamboaꞌmo morue anaꞌntowowalo to ka bolaꞌ humei mehangkuꞌ iseꞌe.

¹⁴Tandaꞌna hingkeꞌna kubahaꞌi: ane hupaꞌi haduo anaꞌntowowalo hingkiꞌ kutiꞌiki, “Isulungiꞌa ipopengkohou humei pehangkuꞌa to ipantembuꞌi uwai hingkeꞌna kupaꞌinu.” Ane nohoniꞌa waheꞌe, “Maꞌinumoko, hei lekiꞌ-lekiꞌna untamu kupopaꞌinu woꞌo” Hingkeꞌna kubahaꞌi koꞌiona to Iꞌiwiꞌo hingkiꞌ nopohantambiꞌi hi Isaki to mengkoruꞌ pe Ingko, hei kubahaꞌi woꞌo komarimaMu pe uweꞌku hi Burahima.

¹⁵Kolentuꞌana mekokae, mehupaꞌ haduo anaꞌntowowalo to manobaꞌ, to handoaꞌi kahampiha noruntui tomaꞌani. Konaꞌna hi Ribeka. Hi Ribeka tiꞌo oꞌuweꞌna hi Burahima anaꞌna hi Betuel, hei toduluna hi Betuel iomo hi Milika hante hi Nahor, kokaꞌna hi Burahima. I tempo tiꞌo hi Ribeka mangkomi pehangkuꞌa uwai nopeꞌitoꞌo i hindaꞌna monontohi bubu. Kowutenalu i bubu, noꞌohiimo pehongkuꞌane honiꞌi mahuliꞌ.

¹⁶

¹⁷Hawiꞌna hi Burahima mehilaimo ako mangkododungkui anaꞌntowowalo tiꞌo, notiꞌi, “Wadiluꞌa hinaꞌ merapiꞌ uwai to i pehangkuꞌamu kuꞌinu?”

¹⁸Mehoniꞌ hi Ribeka, “wadilu,” Liu-liu nopopengkohou pehongkuꞌane ka hindaꞌna hei nopoꞌinuikiꞌi.

¹⁹Ukomo nopopaꞌinu notiꞌi anaꞌntowowalo tiꞌo, “Kupopaꞌinu woꞌo untama wute totoha.”

²⁰Katoꞌo nohohiꞌi notula uwai pe kolambaꞌ, nopopaꞌinuki unta, uko tiꞌo mesilai womo pe bubu ako mantembuꞌ nopopaꞌinuki untana wute kototoha-tohana.

²¹Hawiꞌna hi Burahima mampoꞌilali hapo to nowali anaꞌntowowalo tiꞌo, alaꞌ dokoꞌi nobahaꞌ PUEꞋ hingkiꞌ mampobuhoꞌi tungkaihana ba hawaꞌi.

²²Ukomohi maꞌinu lekiꞌ-lekiꞌne untana, hawiꞌna hi Burahima moroa dodaliꞌ bulawa to masuliꞌ nopotaꞌuki i onuna, hante hampasa kokala bulawa to masuliꞌ nokahi i korawena towowalo tiꞌo.

²³Honiꞌi notiꞌi, “Himo umoꞌma? Ba wadiꞌi hamini i tambimu hante awangkuhi?”

²⁴Mehoniꞌ hi Rubeka, “Umoꞌku hi Betuel anaꞌna hi Nahor hante hi Milika.

²⁵Uweꞌ, i tambingki uwaꞌlu koturua hante uwaꞌlu woꞌo pangkane pinatuwuꞌ.”

²⁶Uko tiꞌo melingkotuꞌmo hawiꞌ tiꞌo hei menomba pe PUEꞋ notiꞌi,

²⁷“KupokodeꞌKo PUEꞋ to nopenombai uweꞌku hi Burahima. Alaꞌ tongawa komarimaMa Ipetidoꞌki i uweꞌku: Ingko morandaꞌa wute i halalina to iseꞌe.”

²⁸Angkana mehilaimo hi Ribeka pe tambira hei nololitamo hapo to mewalio.

²⁹Kokaꞌna hi Ribeka konaꞌna hi Laba. Konohorinalu hi Laba konololitane hineeꞌna hei konoꞌokiꞌna woꞌo dodaliꞌ hante kokala bulawa i korawena, liu-liu mesuwu mohohiꞌi mampohidupaꞌki hawiꞌna hi Burahima to kolentuꞌana metotiꞌi hante untana dodungku bubu.

³⁰

³¹Notiꞌi hi Laba, “Toaꞌ to nobarakati PUEꞋ, hako iseꞌe i howali, moko nolouki pe tambingki. Kipatimomo kamaraꞌ to ipeꞌohaꞌi hei kipatimomo woꞌo peꞌohaꞌane untami.”

³²Katoꞌo metuntumo hawiꞌne hi Burahima pe hi Laba. Kohupaꞌnalu i tambina, notauꞌmo hi Laba komiane untara, hei moroamo woꞌo wonde nopaꞌaniki untara. Uko tiꞌo noroamo uwai hingkeꞌna ropowaheꞌi kapuꞌra hawiꞌ tiꞌo hante awanahi.

³³Katoꞌo nipopopangkamohi, angkana hawiꞌna hi Burahima mololita notiꞌi, “Handoaꞌa mangka ane handoaꞌi tene kulolita pepaha to kukomi.” Notiꞌi hi Laba, “Moromiꞌ ane ilolitamoꞌi hinewoꞌena.”

³⁴Katoꞌo mepongkamo hawiꞌ tiꞌo mololita, notiꞌi, “Aku hieꞌe hawiꞌnaꞌa hi Burahima.”

³⁵PUEꞋ Ala mobarakati uweꞌku hi Burahima horiana mewali tosugiꞌ. Nopaꞌani PUEꞋ woriꞌ pinatuwuꞌ iomo, gimbana, bekeꞌ, gapiꞌ, unta hei kalide, bulawa hante peraꞌ hei hawiꞌ-hawiꞌ tomaꞌani hante towoweꞌe.

³⁶I komotodianamo hantambina to nikokeneꞌi hi Sara, moꞌanaꞌ haduo tomaꞌani. Lekiꞌ-lekiꞌna lumana uweꞌku mewalimo manaꞌna anaꞌna tiꞌo.

³⁷Noperapiꞌ hingkeꞌna mosumpaꞌa mampetuntuiꞌi hibali pantiꞌina, “Inioꞌko mampaliꞌ to mewali hantambina anaꞌku iseꞌe i woiꞌ Kanaꞌa.

³⁸Agina nolouko pe tambina umoꞌku hante halalingkuhi hei iroa haduo anaꞌntowowalo to hingkiꞌ nopohantambi anaꞌku.”

³⁹Honiꞌi kupeꞌitanoki pe io, “Hohumbo ane towoweꞌe tiꞌo hawaꞌi hiniꞌ metuntu aku?”

⁴⁰Mehoniꞌ hi Burahima, “PUEꞋ to kupengkoruꞌi hingkiꞌ morumbaꞌ malaꞌekaNa mampoꞌowoniko hingkeꞌna nomewali tungkaihama, hingkeꞌna pahuako hantambina anaꞌku ka iliꞌna tinongkuhi, iomo halalinahi umoꞌku.

⁴¹Ane hupaꞌmoko inoꞌo, hei hawaꞌi hiniꞌ mampepaꞌaniki anaꞌra, hawaꞌko tehiluꞌ i sumpamu.”

⁴²Kohupaꞌku i bubu hingkonia, mekokaeꞌa i lalingku, “PUEꞋ to nopenombai uweꞌku hi Burahima, kuperapiꞌ i Ingko hingkeꞌna Ipopewali hapo tungkaihangka.

⁴³Metotiꞌiꞌa dodungku bubu hieꞌe. Ane hupaꞌ haduo anaꞌntowowalo to humei mantembuꞌ, hingkiꞌ kuperapiꞌ pe io hingkeꞌna nopaꞌaniꞌa uwai kuꞌinu.

⁴⁴Ane nohoniꞌa ‘Paꞌinumo, hei untamu woꞌo kupopaꞌinu,’ kubahaꞌmo koꞌiona to Iꞌiwiꞌo mewaliꞌ hantambina anaꞌna uweꞌku hi Burahima.”

⁴⁵Handoaꞌi tutu pekokaengka, hupaꞌmo hi Ribeka mangkomi pehongkuꞌana i hindaꞌna, hei mehangkuꞌ i bubu katoꞌo kutiꞌi pe io, ipaꞌaniꞌakae uwaimu kuꞌinu.

⁴⁶Liu-liu nopopengkohou pehongkuꞌane ka hindaꞌna hante mantiꞌi, “Uweꞌ, maꞌinuko, untamu woꞌo kupopaꞌinu.” Uko tiꞌo maꞌinumoꞌa, hante lekiꞌna untaku nopopaꞌinu woꞌo.

⁴⁷Io hinaꞌ kupeꞌitanoki, “Himoreꞌi umoꞌma? Io mehoniꞌ, ‘Umoꞌku hi Betuel anaꞌna hi Nahor hante hi Milika.’ Katoꞌo kupotaꞌuki dodaliꞌ bulawa i onuna hante kukahiki kokala bulawa i korawena.

⁴⁸Uko tiꞌo melingkotuꞌa menomba hante mampokodeꞌ PUEꞋ to nopenombai uweꞌku hi Burahima, alaꞌ io to morandaꞌa hinaꞌ hupaꞌa iseꞌe i halalina uweꞌku hante Io mosulungiꞌa mampohidupaꞌki anaꞌntowowalo hieꞌe, hingkeꞌna nopohantambiꞌi anaꞌna uweꞌku.

⁴⁹Angkana hinewowoꞌena, ane ikarimakei hante popuhiꞌ lalimio pe uweꞌku, itiꞌikiꞌakei ba hohumbo hingkeꞌna kubahaꞌi hapo to hangangaa kuwali.”

⁵⁰Mehoniꞌ hi Laba hante hi Betuel, “To mewali hieꞌe pampokonontona PUEꞋ, hapo woꞌo tene to kitiꞌio!

⁵¹Hieꞌemo hi Ribeka ipoꞌawamokei hingkeꞌna nopohantambiꞌi anaꞌna uweꞌmu hintotoꞌ hante hapo to notidoꞌkiko PUEꞋ.”

⁵²Konohorinalu hawiꞌna hi Burahima lolitare, io melingkotuꞌ i woiꞌ menomba pe PUEꞋ.

⁵³Katoꞌo noroamo hawiꞌna hi Burahima, kowoi, bulawa hante peraꞌ lekiꞌ-lekiꞌna nopaꞌaniki hi Ribeka. Parewa to maranga nopaꞌaniki woꞌo kokaꞌna hante inoꞌna.

⁵⁴Uko tiꞌo hawiꞌna hi Burahima hante awanahi, mangkamohi hante maꞌinu hei haminimohi woꞌo itoꞌo. Meꞌaromohi mihoꞌolu notiꞌi hawiꞌne hi Burahima, “Mesabiꞌmoka hingkiꞌ mahuliꞌmoka pe uweꞌki.”

⁵⁵Angkana kokaꞌna hante inoꞌna hi Ribeka mantiꞌi, “Ipotedehimo dulu hi Ribeka iseꞌe i ingka podo haminggu ba hampuluꞌ ando, honiꞌi nolou.”

⁵⁶Angkana hawiꞌ tiꞌo mantiꞌi, “Hampoliꞌmoꞌakei itaha alaꞌ PUEꞋ mosulungiꞌa wute mewali tungkaihane uweꞌku. Ipoliumoꞌakei mahuliꞌ pe io.”

⁵⁷Mehoniꞌhi, “Ane watoꞌoꞌi towowoi dulu hi Ribeka humei hingkeꞌna tobahaꞌi ba hohumboꞌi pekirine.”

⁵⁸Rowowoimo mpuꞌu hi Ribeka ropeꞌitanoi, “Hiniꞌluko metuntu i toaꞌ hieꞌe?” Io mehoniꞌ, “Ioꞌ, hiniꞌluꞌa.”

⁵⁹Katoꞌo hi Ribeka hante haduo to mororoaꞌi ka kokokiuꞌana, nipoliumohi nolou hante hawiꞌna hi Burahima moꞌawa awanahi.

⁶⁰Honiꞌi hi Ribeka ropekokaeki hante rotiꞌi, “Ribeka, toperapiꞌ pe PUEꞋ Ala nobarakatiko, hingkeꞌna mewaliko inoꞌra i sabuna toaꞌ hei muleꞌmu monanihi lekiꞌ-lekiꞌna poniꞌra.”

⁶¹Katoꞌo mangkolodohimo hi Ribeka hante haꞌumbora duo anaꞌntowowalo to mewali hawiꞌna, honiꞌi melambaꞌ i unta metuntu pe hawiꞌna hi Burahima.

⁶²I tempora dodungkumohi, kolentuꞌanamo woꞌo mahuliꞌ hi Isaki ka bubu Lahai-Roi. Hi Isaki meꞌohaꞌ i woiꞌ Negeꞌ.

⁶³Kononewa, io nolou mokadoroꞌ pe kineteꞌna, hampale noꞌokiꞌ unta mehupaꞌ.

⁶⁴Katoꞌo hi Ribeka meꞌoꞌele hampale noꞌokiꞌ hi Isakino, io kaliuꞌ mengkohou ka untana.

⁶⁵Honiꞌi nopeꞌitanoki pe hawiꞌna hi Burahima notiꞌi, “Himo tomaꞌani tiꞌo to humei monontohiki?” Mehoniꞌ hawiꞌ tiꞌo, “Iomo hi Isaki, anaꞌna uweꞌku.” Io hinaꞌ noroa hi Ribeka sangkoniꞌne nopopowuni liona.

⁶⁶Katoꞌo hawiꞌ tiꞌo mampololita pe hi Isaki lekiꞌ-lekiꞌna to mewali.

⁶⁷Uko tiꞌo hi Isaki mangkomimo hi Ribeka mekahi pe bambaruꞌna hi Sara inoꞌna, katoꞌo nipohamokomohi hei hi Isaki mampotundeꞌ hi Ribeka. Iomola to mampododoli lalina hi Isaki uko nokomahii inoꞌna.