Read Rampi Pewaliana 25 Bible Online

Pewaliana 25 - Rampi bible

Pewaliana 25

¹Hi Burahima mohantambi womo korompihana, konaꞌna hi Ketura.

²Towoweꞌe tiꞌo mampoꞌanaꞌki hi Simira, hi Yoksa, hi Medaꞌ, hi Midia, hi Isibaꞌ hante hi Sua.

³Hi Yoksa mampemuleꞌki hi Seba hante hi Dedaꞌ. Muleꞌna hi Dedaꞌ iomo toAsuru, toLetusi hante toLeume.

⁴Anaꞌ-anaꞌna hi Midia iomo hi Epaꞌ, hi Epeꞌ, hi Henoꞌ, hi Abida hante hi Elda. Iomohila lekiꞌna muleꞌna hi Ketura.

⁵Hi Burahima mampepaꞌaniki lekiꞌna lumana pe hi Isaki.

⁶Angkana pe anaꞌ-anaꞌnahi to nohua ka hawiꞌ-hawiꞌna io mampewei pepaꞌani, katoꞌo io morumbaꞌhi i tempo kotuwuꞌana tene mampolihi hi Isaki. Anaꞌna hieꞌe, nolouhi pe motoꞌando.

⁷Hi Burahima moꞌumuruꞌ 170 ntoꞌa,

⁸honiꞌi io mahi. Io mahi i tempona motodimo hei oꞌuamo.

⁹Hei anaꞌ-anaꞌna, hi Isaki hante hi Sumaeli motawuꞌi i lali woloꞌ watu petawua i Makapela, i popada to uwaꞌ i motoꞌando Mambere iomo popada Eporoꞌ, to ka anaꞌna hi Sohar, toaꞌ toHet tiꞌo,

¹⁰to nohilimo hi Burahima ka toHet. Inoꞌomola nitawuꞌi hi Burahima hante hi Sara hantambina.

¹¹Ikomahinalu hi Burahima, Pueꞌ Ala mobarakati hi Isaki, anaꞌna, hei hi Isaki meꞌohaꞌ dodungku bubu Lahai-Roi.

¹²Hieꞌemola muleꞌne hi Sumaeli, anaꞌna hi Burahima, to nopoꞌanaꞌkiꞌi hi Hagar, towoweꞌe toMasiri, hawiꞌna hi Sara tiꞌo.

¹³Hieꞌemola konaꞌne anaꞌ-anaꞌna hi Sumaeli, nitiꞌi motuntuni huntuna konipoꞌanaꞌakina, hi Nebaio, hi Kedaꞌ, hi Adebele, hi Mibsa,

¹⁴hi Misima, hi Dumaꞌ, hi Masaꞌ,

¹⁵hi Hadaꞌ, hi Teman, hi Yeturiꞌ, hi Napisi hante hi Kedamaꞌ.

¹⁶Iomola anaꞌ-anaꞌne hi Sumaeli, hei iomola konaꞌ-konaꞌre to mewali woꞌo konaꞌra bolaꞌra hei konaꞌ bambaruꞌra hori-hori. Hampuluꞌ meroduo datu, hante tinona hori-hori.

¹⁷Tinuwuꞌna hi Sumaeli iomo 137 ntoꞌa, honiꞌi io mahi.

¹⁸Iohi meꞌohaꞌhi i lumbuna woiꞌ Hawila hante Suru, to uwaꞌ i motoꞌando Masiri to momenonto hante Asur. Iohi meꞌohaꞌ momehanupe hante lekiꞌna halalira.

¹⁹Hieꞌemola lolitonane muleꞌna hi Isaki, anaꞌna hi Burahima. Hi Burahima mampemuleꞌki hi Isaki.

²⁰Hei hi Isaki motinuwuꞌmo iba mpuluꞌ ntoꞌa i tempona hi Ribeka noroa mewali hantambina. Hi Ribeka iomo anaꞌna hi Betuel, toaꞌ toAra ka Pada-Aram, halalina hi Laban towoweꞌe, toaꞌ toAram.

²¹Mekokaemo hi Isaki pe PUEꞋ Ala noniuꞌ hantambina, alaꞌ hantambina tiꞌo lalo. PUEꞋ Ala mampehoromua pekokaena, horiana hi Ribeka, hantambina tiꞌo mehinonaꞌi.

²²Angkana anaꞌna mometinuni i lali hinaꞌina horiana notiꞌi hi Ribeka, “Mahamporeꞌi hinaꞌ mewali hatoꞌo?” Io horiana noperapiꞌ lala pe PUEꞋ Ala.

²³Pohawaꞌna PUEꞋ Ala pe hi Ribeka: “Hi mido to i lali hinaꞌimu moropaꞌ, hei roduora hingkiꞌ mewalihi meroꞌonu roboꞌ to momeꞌewa. Haꞌanu roboꞌ maroho ka roboꞌ ntaniꞌna. Muleꞌna tohinoneeꞌ hingkiꞌ mokuasaꞌi muleꞌna tokokaꞌ.”

²⁴I temponamo andona hingkiꞌ moꞌanaꞌ, anaꞌ to uwaꞌ i lali hinaꞌina umbiꞌ moropaꞌ.

²⁵Memolomo to uluꞌana, lentena momeaꞌ, lekiꞌna wotana hibali baduꞌ mowilolu, iomo horiana io nikokeneꞌi hi Esau.

²⁶Uko tiꞌo memolomo womo tohinoneeꞌ, korawena motiko pakoꞌna hi Esau, io horiana nikokeneꞌi hi Akoꞌ. Hi Isaki motinuwuꞌmo oni mpuluꞌ ntoꞌa i tempona nipoꞌanaꞌkihi.

²⁷Katoꞌo kokodeꞌ-kodeꞌamohi oꞌanaꞌ meroduo tiꞌo, hi Esau mewali haduo to jago moꞌahu, hei nolei meꞌohaꞌ i popada, angkana hi Akoꞌ, iomo haduo toꞌa to monondiiꞌ hawaꞌi pe imbo-imbo i bambaruꞌlu.

²⁸Hi Isaki mampotundeꞌ hi Esau, alaꞌ io palei mangka bauꞌ to noꞌahu, angkana hi Ribeka mampotundeꞌ hi Akoꞌ.

²⁹Hampiha tempo, hi Akoꞌ kolentuꞌana moꞌunda, katoꞌo mehupaꞌmo hi Esau ka popada liaꞌ biloramo hante luleꞌ.

³⁰Notiꞌi hi Esau pe hi Akoꞌ, “Paꞌaniꞌakae mangka hangkiuꞌ ka to momeaꞌ tiꞌo, alaꞌ biloraꞌa.” Iomo horiana nikokeneꞌi hi Edom.

³¹Angkana notiꞌi hi Akoꞌ “Ipobaluꞌmo duluna kotokokaꞌama pe aku.”

³²Mehoniꞌ hi Esau, “Hingkiꞌ mahimoꞌa bilora, haporeꞌi podumbuꞌane kotokokaꞌangku tiꞌo?”

³³Notiꞌi hi Akoꞌ, “Mosumpamoko doduluna pe aku.” Katoꞌo mosumpamo io pe hi Akoꞌ, hei hi Esau mampobaluꞌ mpuꞌu kotokokaꞌane pe hi Akoꞌ.

³⁴Uko tiꞌo hi Akoꞌ mampaꞌani depa hei to momeaꞌ tiꞌo pe hi Esau, io mangkamo hei maꞌinu, katoꞌo metotiꞌi hei molai. Watoꞌomola hi Esau mampariwoiꞌ kotokokaꞌana.