Read Rampi Pewaliana 26 Bible Online

Pewaliana 26 - Rampi bible

Pewaliana 26

¹I woiꞌ tiꞌo mehupaꞌ womo kobiloraha hibali to mewalimo i tempona hi Burahima. Hi Isaki mehinaro pe hi Abimeleꞌ datuna toFilistin i Gera, hei merapiꞌ koholangkoa meꞌohaꞌ inoꞌo.

²Tiꞌo nowali alaꞌ PUEꞋ mampemombahamo pe io hei mantiꞌi, “Hampoliꞌmoko nolou pe Masiri, meꞌohaꞌmoko i woiꞌ to hingkiꞌ Kutiꞌikiko pe ingko.

³Aku hingkiꞌ mampoꞌodaꞌko hei mobarakatiko. Lekiꞌna woiꞌ hieꞌe hingkiꞌ Kupaꞌanikiko hante pe muleꞌmu. Aku hingkiꞌ mampobuhoꞌi dandi to ka Kutiꞌimo pe hi Burahima umoꞌmu.

⁴Aku hingkiꞌ mowali woriꞌ muleꞌmu hibali betueꞌ i laniꞌ. Muleꞌmu hingkiꞌ Kupaꞌani lekiꞌna woiꞌ hieꞌe. Hei alaꞌ muleꞌmu lekiꞌna toaꞌ i duniaꞌ hieꞌe hingkiꞌ pahua pebarakati.

⁵Kubarakatiko, alaꞌ hi Burahima motuntuni pohawaꞌKu, hei nowali hapo to Kuhowoꞌikiꞌi.”

⁶Katoꞌo lebaꞌmo hi Isaki i Gera.

⁷Katoꞌo toaꞌ to itoꞌo meꞌitanohi noniuꞌ hantambina, angkana notiꞌi, “Io halalingku,” Io motehuꞌ mantiꞌi kohantambina, alaꞌ nopekiri, “Nioꞌ-nioꞌna intu rorokoꞌa toaꞌ to uwaꞌ iseꞌe alaꞌ hi Ribeka tiꞌo manobaꞌ rahi.”

⁸Moruemohi inoꞌo, i hampiha tempo mehahiro hi Abimeleꞌ, datuna toFilistin tiꞌo ka salewaꞌ, katoꞌo noꞌoki hi Isaki kolentuꞌana momeꞌumaꞌ hante hi Ribeka, hantambina.

⁹Katoꞌo hi Abimeleꞌ mowowoi hi Isaki hei mantiꞌi, “Kotuꞌuana io hantambimu, haporeꞌi hinaꞌ itiꞌi, io halalimu?” Mehoniꞌ hi Isaki pe io, “Alaꞌ kupekiri, nioꞌ-nioꞌna intu nirokoꞌa alaꞌ io.”

¹⁰Angkana hi Abimeleꞌ mantiꞌi, “Hapo womo to iwali pe ingka? Nioꞌna intu mewali, haduo ka bolaꞌ hieꞌe toturu hante hantambimu, horiana ane mewaliꞌi hatoꞌo ingko mampopehupaꞌko komasalaꞌki.”

¹¹Katoꞌo hi Abimeleꞌ mololita pe lekiꞌna toaꞌ tiꞌo, “Hihimo to mogaru toaꞌ hieꞌe hante hantambina, bateꞌna io hingkiꞌ nihuku mahi.”

¹²Katoꞌo hi Isaki mehuꞌamo i woiꞌ tiꞌo hei i lalina hantoꞌa io pahua rasiꞌ hanatu mpiha lipaꞌ alaꞌ io nobarakati PUEꞋ.

¹³Komorue-rueha terononihi kosugiꞌane, horiana io mewali sugiꞌ mpololeke.

¹⁴ToFilistin mowahiꞌ alaꞌ woriꞌi pinatuwuꞌne hibali: bekeꞌ, gimba, hante gapiꞌ, hei hawiꞌ-hawiꞌna.

¹⁵Tempona tene tuwuꞌ hi Burahima hawiꞌ-hawiꞌna mangkoweꞌ bubu, angkana uko tiꞌo topilisiti momongkohi mahuliꞌ.

¹⁶Katoꞌo notiꞌi hi Abimeleꞌ pe hi Isaki, “Molaimoko ka peꞌohaꞌangki alaꞌ ingko makuasaꞌko ka ingka.”

¹⁷Molaimo hi Isaki katoꞌo, hei mobambaruꞌmohi i lokeꞌna Gera hei lebaꞌmohi itoꞌo.

¹⁸Katoꞌo hi Isaki mangkoweꞌ huliꞌ bubu-bubu to nikoweꞌ i tempona hi Burahima, umoꞌna tuwuꞌ, hei to romongkohimo toFilistin. Nikokeneꞌimo bubu-bubu tiꞌo motuntuni konaꞌ-konaꞌ to nopaꞌanikimo umoꞌna.

¹⁹Kolentuꞌara hawiꞌ-hawiꞌna hi Isaki mangkoweꞌ bubu tiꞌo pahuahi itoꞌo uwai to timi.

²⁰Katoꞌo topolambaꞌna i Gera hante topolambaꞌna hi Isaki mampoheꞌeroihi uwai tiꞌo hei rotiꞌi, “Uwai hieꞌe ingka tumpune.” Hei hi Isaki mangkokoneꞌi bubu tiꞌo Eseꞌ, alaꞌ ropoheꞌeroiꞌi.

²¹Katoꞌo mangkoweꞌ womohi bubu to ntaniꞌna, hei moheꞌeroluhi woꞌo alaꞌ bubu tiꞌo. Horiana hi Isaki mangkokoneꞌi bubu tiꞌo “Sitna, palaihana pohiho”.

²²Io melimba katoꞌo hei mangkoweꞌ bubu to ntaniꞌna. Angkana bubu hieꞌe hawaꞌi ropoheꞌeroi. Bubu hieꞌe nokokeneꞌi Rehobo, hei io mantiꞌi, “Hinewowoꞌena PUEꞋ mampaꞌaniki koholangkoa pe ingkiꞌ, horiana memuleꞌki i woiꞌ hieꞌe.”

²³Katoꞌo io nolou pe Baraseba.

²⁴I wini tiꞌo, PUEꞋ mampemombaha pe io hei mohawaꞌ, “Akumola Pueꞌ Alana umoꞌmu hi Burahima hawaꞌko morokaꞌ, alaꞌ Aku mampoꞌodaꞌko, Aku hingkiꞌ mobarakatiko hei mowali woriꞌ muleꞌmu, alaꞌ hi Burahima hawiꞌKu tiꞌo.”

²⁵Uko tiꞌo hi Isaki mampopetotiꞌi potutua popenomba itoꞌo hei mododoeꞌ konaꞌna PUEꞋ Ala. Nowalimo bambaruꞌre itoꞌo katoꞌo hawiꞌ-hawiꞌnahi mangkoweꞌ bubu itoꞌo.

²⁶Hupaꞌmo hi Abimeleꞌ ka Gera moꞌawa hante hi Ahusa bolena hante hi Piko tadulako tantarana ako mampomehuaki hi Isaki.

²⁷Angkana notiꞌi hi Isaki pe iohi, “Mahamporeꞌi hinaꞌ mehupaꞌkei humei pe aku? Hawaꞌireꞌi ikabiriꞌmoꞌakei, hei irumbaꞌmoꞌakei molai ka woiꞌmi?”

²⁸Mehoniꞌhi, “Kiꞌokimo hadoduongki, PUEꞋ Ala mampoꞌodaꞌko, io horiana kitiꞌi moromiꞌ ane topoꞌuwaꞌi podandi i lumbunta, hei ingka motiko podandi hante ingko,

²⁹hingkeꞌna hawaꞌko hingkiꞌ mowali walia to kodake pe ingka, hibali hampiha ingka hawaꞌka mowali to kodake hei tontonaluka mowali walia to moromiꞌ pe ingko hei mampotedehiko molai hante kodame, haꞌioreꞌi ingko hinewoꞌena nobarakatiko PUEꞋ?”

³⁰Horiana hi Isaki mamposusaꞌihi, katoꞌo mangkamohi hante maꞌinu.

³¹I kopoꞌoninalu hampihoꞌolu modandi-dandimohi. Katoꞌo hi Isaki mampopewotumohi hei iohi mampolihiꞌi hante kodame.

³²I ando tiꞌo hupaꞌhi hawiꞌ-hawiꞌne hi Isaki mampetiꞌiki pe io noniuꞌ bubu to rokoweꞌmo hei rotiꞌi, “Ingka pahuamoka uwai.”

³³Katoꞌo nokokeneꞌimo bubu tiꞌo Seba. Io horiana bolaꞌ tiꞌo nikokeneꞌi Baraseba wute hinewowoꞌena.

³⁴I tempona hi Esau moꞌumuruꞌmo 40 toꞌa, io moroa hi Yudi anaꞌna hi Beri toaꞌ toHet, hante hi Basmat anaꞌna hi Elon, mewali hantambina.

³⁵Meroduora towoweꞌe tiꞌo mampopehupaꞌ komasusa pekirina hi Isaki hante hi Ribeka.