Read Rampi Pewaliana 27 Bible Online

Pewaliana 27 - Rampi bible

Pewaliana 27

¹I komotodiana hi Isaki matana woweroꞌmo, iomo horiana hamboaꞌmo pangkiꞌ, katoꞌo nowowoimo hi Esau anaꞌna tokokaꞌ hei notiꞌi pe io, “O anaꞌku.” Mehoniꞌ hi Esau, “Hieꞌeluꞌa umoꞌ.”

²Notiꞌi hi Isaki, “Iꞌokiꞌlu aku hieꞌe motodimoꞌa, tinuwuꞌku hamboaꞌmo morue.

³Iroamo laiꞌma akomoꞌa ipoꞌahuki hambaꞌa pinatuwuꞌ i popada.

⁴Iꞌundamo ipomotomiꞌ motuntuni peleihangku. Uko tiꞌo ikomikiꞌa humei hingkeꞌna kuꞌokaꞌi, hingkeꞌna kubarakatiko kolentuꞌangku tene handoaꞌa mahi.”

⁵Angkana hi Ribeka pahori lolitana hi Isaki pe hi Esau. Kopolainalu hi Esau nolou mampoꞌahuki umoꞌna pe popada,

⁶notiꞌi hi Ribeka pe hi Akoꞌ anaꞌna, “Kuhorimo lolitane umoꞌmu pe hi Esau kokaꞌmu notiꞌi,

⁷‘Ikomimo humei pe aku hambaꞌa pinatuwuꞌ to iꞌahu, irewahi, iꞌundamo ipomotomiꞌ hingkeꞌna kuꞌokaꞌi honiꞌi kubarakatiko i hinarona PUEꞋ, kolentuꞌaku handoaꞌa mahi.’

⁸Hinewowoꞌena onaꞌ ipehoromua moromiꞌ hapo to kutiꞌi hingkeꞌna iwaliꞌi.

⁹Noloumoko pe koꞌuwaꞌana porewuanta, irodiꞌmo merombaꞌa anaꞌna bekeꞌ to loluheꞌ, hingkeꞌna kurewahiꞌi, kuꞌunda, kupomotomiꞌ hibali peleihana umoꞌmu.

¹⁰Honiꞌi ikomi pe umoꞌmu hingkeꞌna noꞌokaꞌi hei nobarakatiko, kolentuꞌana io handoaꞌi mahi.”

¹¹Notiꞌi hi Akoꞌ pe hi Rubeka inoꞌna, “Hi Esau kokaꞌku, io haduo to mowulari wotana, angkana aku hieꞌe koliꞌku mangkolehi.

¹²Ane noperorariꞌi umoꞌku wotangka, hingkiꞌ nobahaꞌ koniꞌakalanine. Aku mampopehupaꞌ kobuntoꞌangku handoꞌio pebarakati.”

¹³Angkana notiꞌi inoꞌne pe io, “Akumo to mampohorunga kobuntoꞌ tiꞌo onaꞌ. Ipehoromua hapo to kutiꞌi, noloumoko morodiꞌ bekeꞌ tiꞌohiꞌo.”

¹⁴Katoꞌo io noloumo mpuꞌu, moroa bekeꞌ tiꞌo nokomiki inoꞌna, uko tiꞌo inoꞌna moꞌundamo nopomotomiꞌ, motuntuni hibali peleihana umoꞌna.

¹⁵Uko tiꞌo hi Ribeka moroa parewa to manobaꞌ, iomo parewana hi Esau, uluꞌ anaꞌna, parewa to nikolodohi, katoꞌo nirumbaꞌkimo nopake hi Akoꞌ, anaꞌ koꞌukoana.

¹⁶Koliꞌna bekeꞌ tiꞌo nipodokiꞌki i rombali korawena hi Akoꞌ hante i dokoꞌna to mangkolehi.

¹⁷Katoꞌo io mampaꞌani pangka to motomiꞌ hante depa to nowalimo, pe hi Akoꞌ anaꞌna.

¹⁸Honiꞌi hi Akoꞌ mekahi pe peꞌohaꞌana umoꞌna hei notiꞌi, “Umoꞌ.” Mehoniꞌ umoꞌne, notiꞌi “Hieꞌeluꞌa anaꞌ, hihimokoreꞌito?”

¹⁹Mehoniꞌ hi Akoꞌ pe umoꞌna, “Akumola hi Esau, uluꞌ anaꞌmu. Kuwalimo hibali hapo to itiꞌikiꞌa pe aku. Peꞌaromo hingkeꞌna ipangkamo bauꞌ poꞌundangku to kuꞌahu, hei ibarakatimoꞌa, umoꞌ.”

²⁰Katoꞌo notiꞌi hi Isaki pe anaꞌna, “Hantouꞌko woꞌo pahua onaꞌ.” Mehoniꞌ anaꞌne, “Alaꞌ PUEꞋ Ala, PUEꞋmu to mosulungiꞌa”

²¹Katoꞌo notiꞌi hi Isaki pe hi Akoꞌ, “Humeimoko mekododungku anaꞌ, hingkeꞌna kuperorariko ba anaꞌkukoreꞌi hi Esau ba handoꞌio.”

²²Mekododungkumo mpuꞌu hi Akoꞌno pe umoꞌna, hei umoꞌna tiꞌo mamperorarimo hei notiꞌi, “Ane loaꞌ, loaꞌna hi Akoꞌ ane korawe korawena hi Esau.”

²³Hi Isaki hawaꞌi nohalaꞌ koꞌiona, alaꞌ korawena hibali korawena hi Esau, angkana handoaꞌi tene nobarakati hi Akoꞌ,

²⁴katoꞌo meꞌitano tene, “Tuꞌureꞌi ingko hieꞌe anaꞌku hi Esau?” Mehoniꞌ hi Akoꞌ, “Ioꞌ umoꞌ!”

²⁵Katoꞌo mololitamo hi Isaki, “Ipododungkumo pangka tiꞌo pe aku, hingkeꞌna kuꞌokamoꞌi bauꞌ to iꞌahu to iꞌundamo anaꞌ, hingkeꞌna aku mobarakatiko.” Katoꞌo nopododungkumo pangka tiꞌo pe umoꞌna hante angoroꞌ, katoꞌo mangkamo umoꞌne.

²⁶Mololitamo hi Isaki pe io, notiꞌi, “Humeimoko dodungku hei iꞌumaꞌmoꞌa anaꞌku.”

²⁷Katoꞌo mekododungkumo mpuꞌu hi Akoꞌ hei noꞌumaꞌmo mpuꞌu umoꞌne. Konorokinalu waune baduꞌna hi Esau, nobarakatimo mpuꞌu notiꞌi, “Tuꞌu mpuꞌu wauna anaꞌku hibali wauna popada to nobarakati PUEꞋ.

²⁸Pueꞌ Ala hingkiꞌ mampaꞌaniko kini to ka laniꞌ hei woiꞌ to molompoꞌ hante kina hei angoroꞌ to melobi-lobi.

²⁹Roboꞌ-roboꞌ ngkodeꞌ hingkiꞌ mengkoruꞌ pe ingko, hei lekiꞌna kodatua melingkotuꞌ pe ingko. Mewalimoko pengkoruꞌara halalimuhi, hante anaꞌ-anaꞌna inoꞌmu hingkiꞌ melingkotuꞌ pe ingko. Hihimo to motundaꞌko io hingkiꞌ nobuntoꞌi huliꞌ, hihimolu to mobarakatiko, io nibarakati.”

³⁰Koꞌukona hi Isaki mobarakati hi Akoꞌ, handoaꞌi morue hi Akoꞌ mampolihi umoꞌna, mehupaꞌmo woꞌo hi Esau kokaꞌne ka poꞌahuana.

³¹Io woꞌo mampatimomo pangka to motomiꞌ, hei nokomiki umoꞌna. Notiꞌi pe umoꞌna, “Umoꞌ, peꞌaromo mangka bauꞌ to kuꞌahu to kuꞌunda, hingkeꞌna ibarakatiꞌa.”

³²Angkana notiꞌi hi Isaki pe io, “Himokoreꞌi?” Mehoniꞌ, “Akumola uluꞌ anaꞌmu, hi Esau.”

³³Katoꞌo nopohoko mpololeke hi Isaki hei notiꞌi, “Hihimoreꞌito topoꞌahu pinatuwuꞌ to nokomi pe aku? Kuꞌokamo lekiꞌna kohandoaꞌamu mehupaꞌ, hei kubarakatimo. Hei io tontolu mewalimo toaꞌ to nibarakati.”

³⁴Koꞌukona nohori hi Esau lolitane umoꞌna, nokomi kohanondoihana, meꞌola mangkureu-reu, hei notiꞌi, “Ibarakatiꞌa woꞌo umoꞌ.”

³⁵Mehoniꞌ umoꞌne, “Hineꞌmu mehupaꞌmo meꞌakokalai hei mamperompoꞌi pebarakati to pe ingko.”

³⁶Notiꞌi hi Esau, “Hintotoꞌ mpuꞌu konaꞌne hi Akoꞌ, alaꞌ io merompihamo moꞌakalaiꞌa. Tokokaꞌangku niperompoꞌimo, hinewowoꞌena noperompoꞌi womo pebarakati to pe aku.” Katoꞌo notiꞌi woꞌo, “Haꞌireꞌi uwaꞌ umoꞌ pebarakati to ntaniꞌna ipaꞌanikiꞌa?”

³⁷Katoꞌo hi Isaki mohoniꞌ hi Esau notiꞌi, “Io kuhinimo mewali uweꞌmu, hei lekiꞌna tinona mewali hawiꞌna, hei kubakuimo hante kina hante anggoroꞌ. Hamboaꞌmo uwaꞌ to wadi kuwalikiko, anaꞌku.”

³⁸Notiꞌi hi Esau pe umoꞌna, “Halangkaꞌ tiꞌolureꞌi pebarakati to uwaꞌ i ingko umoꞌ? Ibarakatimoꞌa woꞌo umoꞌ!” Hante loaꞌ to kodeꞌ meꞌolamo hi Esau.

³⁹Katoꞌo umoꞌna mohoniꞌi, “Kotuꞌuana peꞌohaꞌamu hingkiꞌ moꞌela ka woiꞌ to molompoꞌ hei moꞌela ka kini ka laniꞌ to i tanti.

⁴⁰Ingko hingkiꞌ tuwuꞌko ka poponiꞌamu hante hingkiꞌ mewaliko hawiꞌna hineeꞌmu. Angkana ane ingko moꞌewa komakuasaꞌna, hingkiꞌ himpolohoꞌko ka kuasaꞌna.”

⁴¹Hi Esau mohakiꞌ laline pe hi Akoꞌ alaꞌ pebarakati to noweiki umoꞌna pe io, katoꞌo notiꞌi i lalina, “Ando-ando hanondoihaꞌa alaꞌ komahina umoꞌku intu hawaꞌi hingkiꞌ morue. Koꞌukona intu merorima, hineeꞌku hi Akoꞌ hingkiꞌ kurokoꞌ.”

⁴²Ikonohorinalu hi Ribeka pangkoliwone hi Esau io morumbaꞌ toaꞌ mowowoi hi Akoꞌ, katoꞌo notiꞌi pe io, “Hi Esau, kokaꞌmu, mohakiꞌ laline hei hingkiꞌ norokoꞌko.

⁴³Hinewoꞌena anaꞌku, ipehoromuamo hapo to kutiꞌi. Mehilaimoko pe hi Laba pinoꞌumoꞌmu, to uwaꞌ i Hara,

⁴⁴hei meꞌohaꞌko itoꞌo haꞌumbora ando komoruene, wute moholi kobukotane.

⁴⁵Ane nokomolihakimoꞌi hapo to iwali pe io, honiꞌi aku hingkiꞌ morumbaꞌ toaꞌ ako modupaꞌko. Aku hawaꞌa hiniꞌ nokomoholii ingkei meroduo hampihalao i haꞌandolu.”

⁴⁶Katoꞌo hi Ribeka mantiꞌi pe hi Isaki, “Aku nobosaꞌa mampeꞌele towoweꞌe-towoweꞌe toHet, hantambina hi Esau. Ane hi Akoꞌ woꞌo moroa haduo hantambina ka toHet i roboꞌ hieꞌe, agina mahimoluꞌa!”