Read Rampi Pewaliana 28 Bible Online

Pewaliana 28 - Rampi bible

Pewaliana 28

¹Uko tiꞌo, hi Isaki mowowoi hi Akoꞌ, katoꞌo mobarakatiꞌi hei mepaha pe io notiꞌi, “Inioꞌko moroa hantambimu ka towoweꞌe toKanaꞌa.

²Mantimomoko, nolou pe Pada-Aram, pe tambina hi Betuel uweꞌmu, hei iroamo katoꞌo haduo ipohantambi ka anaꞌna pinoꞌumoꞌmu hi Laba.

³Woi-woina Pueꞌ Ala to Makuasaꞌ mobarakatiko wute woriꞌ anaꞌmu hei oꞌuweꞌmu hingkeꞌna muleꞌmu tiꞌo mewali topeduluna woriꞌ roboꞌ ngkodeꞌ.

⁴Woi-woina PUEꞋ Ala to Makuasaꞌ mobarakatiko hante muleꞌmu, hibali hante pebarakati to niweikiꞌi pe hi Burahima, hei woi-woina ingko moꞌompui woiꞌ to ipeꞌohaꞌi hieꞌe hibali to nopaꞌaniki Pueꞌ Ala pe hi Burahima.”

⁵Uko katoꞌo, hi Akoꞌ nopopewotumo umoꞌna nolou pe hi Laba i woiꞌ Pada-Aram, hi Laba iomo anaꞌna hi Betuel toAram, kokaꞌna hi Ribeka, inoꞌna hi Akoꞌ hante hi Esau.

⁶Nohori hi Esau hapo to notiꞌi umoꞌne i tempona mobarakati hi Akoꞌ. Hei nobahaꞌmo hi Esau, hi Akoꞌ norumbaꞌ umoꞌna nolou pe woiꞌ Pada-Aram, hingkeꞌna nopampaliꞌ hantambina inoꞌo hei mepaha umoꞌne hingkeꞌna hawaꞌi moroa toKanaꞌa nopohantambi.

⁷Nobahaꞌmo woꞌo hi Esau pengkoruꞌne hi Akoꞌ i hawaꞌna tomotodina hei kopolaina pe woiꞌ Pada-Aram.

⁸Koꞌukoana nobahaꞌmo hi Esau kohawaꞌne nolei umoꞌna towoweꞌe toKanaꞌa tiꞌo.

⁹Iomo horiana hi Esau noloumo pe hi Sumaeli anaꞌna hi Burahima, hingkeꞌna nopohantambiꞌi anaꞌne to nikokeneꞌi hi Mahala, hineeꞌna hi Nebaio.

¹⁰Katoꞌo hi Akoꞌ molai ka bolaꞌ Baraseba nolou pe bolaꞌ Hara.

¹¹Mentoriꞌ ando, hupaꞌmo i haꞌanu peꞌohaꞌa hei hamini itoꞌo. Noroa haꞌanu watu to uwaꞌ itoꞌo nopoꞌoluna honiꞌi toturu.

¹²Hawaꞌi morue katoꞌo mepototurumo. I lali pepototuruna, noꞌoki haꞌanu tukaꞌ ka woiꞌ wute i laniꞌ. Noꞌokiꞌ malaꞌekane PUEꞋ Ala moneꞌ munaꞌu i tukaꞌ tiꞌo.

¹³Metotiꞌimo PUEꞋ i hirina hi Akoꞌ hei mantiꞌi, “Akumo hieꞌe PUEꞋ Ala to nopenombai hi Burahima uweꞌmu hei to nopenombai hi Isaki umoꞌmu. Woiꞌ koturuamu hieꞌe hingkiꞌ Kupaꞌanikiko wute i pemuleꞌamu.

¹⁴Pemuleꞌamu hingkiꞌ Kupoworiꞌ hibali koworiꞌna awu i duniaꞌ hei iohi hingkiꞌ memuleꞌhi i tinaꞌ motoꞌando hei tinaꞌ i kotompuha ando, hei i imbo-imbo koꞌuwaꞌara. Nokomi koꞌingkona hei pemuleꞌamu, lekiꞌ-lekiꞌna tino i duniaꞌ hingkiꞌ nibarakati.

¹⁵Aku hingkiꞌ moꞌowoniko hei mampoꞌodaꞌko pe imbo koꞌakoamu hei hingkiꞌ Kukomiko mahuliꞌ pe woiꞌ hieꞌe alaꞌ hawaꞌko hingkiꞌ Kupolihi wute Kupobuhoꞌi lekiꞌ-lekiꞌna to Kudandikimoko.”

¹⁶Meꞌaromo hi Akoꞌ, notiꞌi i lalina, “Tuꞌu-tuꞌu mpuꞌu PUEꞋ uwaꞌ i peꞌohaꞌa hieꞌe angkana hongkoꞌ hieꞌe kokubahaꞌne.”

¹⁷Nokomi komorokaꞌna hi Akoꞌ, notiꞌi, “Makaja mpuꞌu peꞌohaꞌa hieꞌe, mombaha hieꞌe tambina Pueꞌ Ala. Hieꞌe hibali wambaꞌ suruga.”

¹⁸Ikopoꞌonina hampihoꞌolu-olu hi Akoꞌ moroa watu to nopoꞌoluna honiꞌi nopopetotiꞌi hei nobobohi hante bokaꞌ saitu hingkeꞌna mewaliꞌi watu tandaꞌ pangkolowoina pampemombahana Pueꞌ Ala pe io.

¹⁹Pebolaꞌa tiꞌo nokokeneꞌi Beteli palaihana, “Tambina Pueꞌ Ala” hampiha kota tiꞌo nikokeneꞌi Lus.

²⁰Itoꞌo mokamboaꞌmo hi Akoꞌ pe Pueꞌ Ala, notiꞌi, “Ane Ipoꞌawaꞌa hei Ipodaꞌa i patengkaꞌangku hieꞌe hei Ipaꞌaniꞌa pangkaku hante parewangku,

²¹hei ane Ikomiꞌa mahuliꞌ pe tambina umoꞌku, Ingko PUEꞋ to hingkiꞌ mewali Pueꞌ Alaku.

²²Hei hingkiꞌ kudolaꞌkiKo hadolaꞌ ka hampuluꞌ ka lekiꞌ-lekiꞌna to Ipaꞌanikiꞌa. Hei watu popangkolowoi to kupopetotiꞌi hieꞌe hingkiꞌ mewaliꞌ peꞌohaꞌa menomba pe Ingko.”