Read Rampi Pewaliana 29 Bible Online

Pewaliana 29 - Rampi bible

Pewaliana 29

¹Katoꞌo nopololiu womo patengkaꞌane hi Akoꞌ nolou pe woiꞌ tinaꞌ i motoꞌando.

²I patengkaꞌana, noꞌokiꞌmo haꞌanu bubu i popada to nitutuꞌi hante watu to kodeꞌ, uwaꞌ woꞌo tolu ntibura gimba to molukuꞌ dodungku i bubu tiꞌo, alaꞌ itoꞌo paꞌinuare,

³ane hirampumohi lekiꞌ-lekiꞌna gimba itoꞌo, topolambaꞌ mololiaki watu to nipopotutuꞌi honiꞌi ropopaꞌinumo gimbare. Uko tiꞌo rotutuꞌi mahuliꞌ.

⁴Katoꞌo meꞌitano hi Akoꞌ pe topolambaꞌ tiꞌo notiꞌi, “Halali-halali, tohapokei hieꞌe?” Mehoniꞌhi, “Ingka hieꞌe to ka Hara.”

⁵Notenei womohi, “Ibahaꞌlukeito hi Laba, oꞌuweꞌne hi Nahor?” Mehoniꞌhi “Kibahaꞌlu.”

⁶Katoꞌo nopeꞌitanoki womo, “Moromiꞌ-romiꞌlu?” Mehoniꞌhi rotiꞌi “Moromiꞌ-romiꞌlu. Eleꞌi tiꞌolu humei anaꞌne towoweꞌe mangkomi gimbana, konaꞌna hi Raheli.”

⁷Notiꞌi womo hi Akoꞌ, “Hinewoꞌena pohoꞌando tene handoaꞌi tempona gimba nirampu hei nipopekahi i gimpura. Aginamo ipopaꞌinuhi duluna, honiꞌi ilambaꞌmohi i popada.”

⁸Angkana mehoniꞌhi, “Handoaꞌhi kipopaꞌinu gimba ane handoaꞌhi hupaꞌ lekiꞌ, ane hupaꞌmohi lekiꞌ honiꞌi kilolihakimo watu potutuꞌine bubu hei kipopaꞌinuhi.”

⁹Kolentuꞌana tene hi Akoꞌ mololita hante iohi, hupaꞌmo hi Raheli mangkomi gimbana hi Laba umoꞌna, alaꞌ io to molambaꞌno.

¹⁰Konoꞌokiꞌnalu hi Akoꞌ hi Raheli, anaꞌna hi Laba, halalina inoꞌna, mangkomi gimbana umoꞌna, toloumo pe bubu mololihaki watu potutuꞌina, hei nopopaꞌinuhi gimba tiꞌo.

¹¹Hi Akoꞌ moꞌumaꞌ hi Raheli hei meꞌola nopokobue alaꞌ komotanaꞌna.

¹²Katoꞌo hi Akoꞌ mololita pe hi Raheli notiꞌi, “Aku hieꞌe anaꞌna hi Rubeka hineeꞌna umoꞌmu.” Katoꞌo hi Raheli mehilai mahuliꞌ pe tambira ako mampololitaki umoꞌna.

¹³Konohorinalu hi Laba kohupaꞌne hi Akoꞌ pinoꞌanaꞌna mehilaimo ako mampohidupaꞌkiꞌi. Liu nokopui hei noꞌumaꞌ honiꞌi nokomi pe tambina. Katoꞌo hi Akoꞌ mololita mampopengaa to mewali i io. Koꞌukonalu hi Akoꞌ mololita,

¹⁴notiꞌi hi Laba, “Tuꞌu-tuꞌu ingkiꞌ hieꞌe haroraꞌaki.” Katoꞌo meꞌohaꞌmo hi Akoꞌ i io hambula komoruene.

¹⁵Notiꞌi hi Laba pe hi Akoꞌ, “Hawaꞌi moromiꞌ ane majamako ntooꞌ-ntooꞌ i aku, kehapoꞌi mohalaliki. Itiꞌikiꞌa hapo to hintotoꞌ kupopoharoiko?”

¹⁶Hi Laba uwaꞌ anaꞌne meroduo anaꞌntowowalo. Tokokokaꞌ konaꞌne hi Lea hei tohinoneeꞌ konaꞌne hi Raheli.

¹⁷Hi Lea maranga matane, angkana hi Raheli manobaꞌ mpololeke lenteane.

¹⁸Hi Akoꞌ dokoꞌ pe hi Raheli, iomo horiana notiꞌi, “Umoꞌ hiniꞌa majama i ingko pitu ntoꞌa hingkeꞌna anaꞌmu hi Raheli mewali hantambingku.”

¹⁹Notiꞌi hi Laba, “Moromiꞌ ane kupaꞌanikiko hintina toaꞌ ntaniꞌ. Lebaꞌmoko iseꞌe i aku.”

²⁰Katoꞌo majamamo mpuꞌu hi Akoꞌ pitu ntoꞌa angkana to pitu ntoꞌa tiꞌo hibalilu to haꞌumbora ando nohori, alaꞌ nokomi kodokoꞌna pe hi Raheli.

²¹Uko tiꞌo, mololitamo hi Akoꞌ pe hi Laba notiꞌi, “Ipaꞌanikimoꞌa wulia hantambingka alaꞌ tutumo tempoka majama hingkeꞌna kupoloꞌorimoꞌi.”

²²Honiꞌi nowowoimo hi Laba lekiꞌ-lekiꞌne toaꞌ topeꞌohaꞌ itoꞌo dodungku i io hingkeꞌna mampoꞌuwaꞌmohi susaꞌ ngkodeꞌ.

²³Angkana wini tiꞌo, hi Laba moroa hi Lea, honiꞌi nokomiki hi Akoꞌ, katoꞌo hi Akoꞌ mampohantambiꞌi.

²⁴Hei hi Silipa hawiꞌna hi Laba nopaꞌaniki hi Lea mewaliꞌ hawiꞌna.

²⁵Angkana ikompihoꞌoluna, noꞌele hi Akoꞌ hi Lea. Io horiana notiꞌi hi Akoꞌ pe hi Laba, “Mahamporeꞌi hinaꞌ hatoꞌo waliama pe aku? Majamaꞌa hingkeꞌna ipaꞌaniꞌa hi Raheli, haporeꞌi hinaꞌ ipampowowutikiꞌa?”

²⁶Mehoniꞌ hi Laba, “Hibali adaꞌki iseꞌe hawaꞌi wadi tohinoneeꞌ mpoꞌdulu momaꞌani ka to kokokaꞌ.

²⁷Topoꞌuko duluna pitu ando kohamokomio hieꞌe, honiꞌi kupaꞌanikiko hi Raheli, asala majama womoko iseꞌe i aku pitu ntoꞌa.”

²⁸Lolita tiꞌo noponiuꞌ hi Akoꞌ, hei ganaꞌmo pitu ando uko nipohamoko, katoꞌo hi Laba mampewei womo hi Raheli nopohantambi hi Akoꞌ.

²⁹Hei hi Bilha, hawiꞌna hi Laba, nopaꞌaniki hi Raheli mewaliꞌ hawiꞌna.

³⁰I tempo tiꞌo, hi Akoꞌ mampohantambimo hi Raheli hei nopotundeꞌ tene ka hi Lea, uko tiꞌo majama womo hi Akoꞌ pitu ntoꞌa komoruene i hi Laba.

³¹PUEꞋ Ala pangkiꞌ hi Lea hawaꞌi rahi nopotundeꞌ maꞌanina horiana Pueꞌ mampaꞌaniꞌi moꞌanaꞌ angkana hi Raheli lalo.

³²Katoꞌo hi Lea mehinonaꞌi hei moꞌanaꞌ haduo tomaꞌani, notiꞌi, “Noꞌokiꞌmo PUEꞋ komaporiꞌka. Hinewowoꞌena hingkiꞌ nopotundeꞌa maꞌaningku.” Anaꞌna tiꞌo nokokeneꞌi hi Rube.

³³Mehinonaꞌi womo hi Lea, hei mampoꞌanaꞌki haduo tomaꞌani notiꞌi, “Tuꞌu-tuꞌu mpuꞌu PUEꞋ mampehoromua, hei Nopaꞌani womoꞌa oꞌana alaꞌ hawaꞌa nopotundeꞌ maꞌaningku,” Iomo horiana anaꞌ tiꞌo nokokeneꞌi hi Simeo.

³⁴Mehinonaꞌi womo hi Lea, hei moꞌanaꞌ haduo tomaꞌani, notiꞌi, “Hinewowoꞌena hingkiꞌ medokiꞌ laline maꞌaningku i aku alaꞌ mampoꞌanaꞌkimoꞌa tomaꞌani tolu duo. Io horiana anaꞌ tiꞌo nokokeneꞌi hi Lewi.”

³⁵Uko tiꞌo mehinonaꞌi womo hi Lea hei mampoꞌanaꞌki haduo tomaꞌani notiꞌi, “Hinewowoꞌena mampokodeꞌa PUEꞋ”, io horiana anaꞌ tiꞌo nokokeneꞌi hi Yehuda. Uko tiꞌo hi Lea hamboaꞌmo moꞌanaꞌ.