Read Rampi Pewaliana 3 Bible Online

Pewaliana 3 - Rampi bible

Pewaliana 3

¹Ule iomo to mapande moꞌakala ka hinangkana pinatuwuꞌ i lerina to nowali PUEꞋ Ala. Ule tiꞌo mantiꞌi pe towoweꞌe tiꞌo, “Monontomo Pueꞌ Ala mohawaꞌ, lekiꞌna loti to i kineteꞌ hieꞌe hawaꞌi wadi iꞌokakei wuaꞌne, hinape?”

²Katoꞌo mehoniꞌ towoweꞌe tiꞌo pe ule, “Wuaꞌ-wuaꞌ loti to uwaꞌ i lali kineteꞌ hieꞌe wadilu kiꞌoka,

³angkana noniuꞌ wuaꞌ loti to uwaꞌ i lumbu-lumbuna kineteꞌ, PUEꞋ Ala mohawaꞌ, inioꞌkei iꞌoka ba iramakei wuaꞌ tiꞌo, mahikei intu.”

⁴Angkana ule tiꞌo mantiꞌi pe towoweꞌe tiꞌo, “Hawaꞌiwae watoꞌo, hawaꞌkeiwae hingkiꞌ mahi.

⁵Kotuꞌuana nobahaꞌlu Pueꞌ Ala, ane iꞌokakei hingkiꞌ tebungkahi pekirimi, hei hingkiꞌ mewalikei hibali Pueꞌ Ala, pobahaꞌ noniuꞌ to moromiꞌ hei to kodake.”

⁶Towoweꞌe tiꞌo mampeꞌele wuaꞌ loti tiꞌo marasa eleane niꞌoka, hapo lekemo loti tiꞌo mekohohokai alaꞌ mepaꞌani pebahaꞌ. Katoꞌo noroa wuaꞌne hei noꞌoka hante nopepaꞌaniki pe maꞌanina to moꞌawa-awa hante io, hei noꞌokamo mpuꞌu maꞌanina.

⁷Katoꞌo tebungkahimo pekirire meroduora hei robahaꞌ kopewula mpahira, katoꞌo iohi mampohiroa-hiroa taweꞌ loti ara hei rowali piwi.

⁸Ikorohorinalu popaserene PUEꞋ Ala matengkaꞌ-tengkaꞌ i lali kineteꞌ tiꞌo i tempona mototaheꞌ, mewunimo manusiaꞌ hante hantambina tiꞌo ka hinarona PUEꞋ Ala i kohelaꞌna loti-loti i lali kineteꞌ.

⁹Angkana PUEꞋ Ala mododoeꞌ manusiaꞌ tiꞌo hei mantiꞌi, “I imboko?”

¹⁰Io mehoniꞌ, “Ikokubahaꞌnamo koꞌuwaꞌMa i kineteꞌ hieꞌe, aku mewaliꞌa motehuꞌ, alaꞌ mewula mpahiꞌa, iomo horiana mewuniꞌa.”

¹¹PUEꞋ Ala meꞌitano, “Hihimoreꞌi to mampatiꞌikiko, kopewula mpahimu? Ba iꞌokamoreꞌi wuaꞌ loti to Kupeꞌopiki inioꞌ iꞌokaꞌi?”

¹²Manusiaꞌ tiꞌo mehoniꞌ, “Towoweꞌe to Ipaꞌanikiꞌa mewali awangku, iomola to mampaꞌaniꞌa wuaꞌ loti tiꞌo pe aku, horiana kuꞌoka.”

¹³Uko tiꞌo notiꞌi PUEꞋ Ala pe towoweꞌe tiꞌo, “Haporeꞌi to iwalio hieꞌe?” Mehoniꞌ towoweꞌe tiꞌo, “Ule tiꞌo to moꞌakalaiꞌa, io hinaꞌ kuꞌoka.”

¹⁴Katoꞌo notiꞌi PUEꞋ Ala pe ule tiꞌo, “Alaꞌ mowaliako watoꞌo, buntoꞌko ka hinangkana pinatuwuꞌ to manondoꞌ hei ka hinangkana pinatuwuꞌ to i lopoꞌ. Ingko hingkiꞌ mendaeko hante hinaꞌimu hei awuna woiꞌ to mewali pangkamu i tempomu tuwuꞌ.

¹⁵Ingko hante towoweꞌe hieꞌe hingkiꞌ momekabiriꞌ; muleꞌmu hante muleꞌna hingkiꞌ momeponiꞌhi. Ingko hingkiꞌ mobingku pakoꞌra angkana Haduo muleꞌna hingkiꞌ mopakoꞌ tutuꞌmu.”

¹⁶PUEꞋ Ala mohawaꞌ pe towoweꞌe tiꞌo, “I tempomu mehinonaꞌi hingkiꞌ pedeꞌ maporiꞌ ihori, hei i tempomu moꞌanaꞌ hingkiꞌ pedeꞌ molalo ihori, angkana ingko tontomu mangkodokoꞌi maꞌanimu hei io hingkiꞌ makuasaꞌ pe ingko.”

¹⁷Katoꞌo Notiꞌi womo pe manusiaꞌ tiꞌo, “Alaꞌ ituntuniꞌi to notiꞌi hantambimu, hei mangkako wuaꞌ loti to Kupetiꞌiki pe ingko inioꞌ iꞌokaꞌi, iomo hinaꞌ buntoꞌmo woiꞌ alaꞌ ingko, mepongka ka hinewowoꞌena hingkiꞌ maporiꞌ ihori majama mampaliꞌ pangkamu i tempomu tuwuꞌ.

¹⁸Woiꞌ to i intuꞌ hingkiꞌ mampotuwuꞌ kora to metotaiꞌ hei kora to morui, hante huꞌa-huꞌa to tuwuꞌ i popada hingkiꞌ mewali kopongkonamu.

¹⁹Hante moholemuꞌko hingkiꞌ mampaliꞌ kopongkonamu, wuteko mahuliꞌ mewali woiꞌ, alaꞌ katoꞌo niroako, alaꞌ ingko awu hei ingko hingkiꞌ mahuliꞌko mewali awu.”

²⁰Katoꞌo manusiaꞌ tiꞌo mangkokeneꞌi hi Hewa pe hantambina, alaꞌ io to mewali inoꞌ lekiꞌna to tuwuꞌ.

²¹Hei PUEꞋ Ala mowali parewa ka koliꞌ pinatuwuꞌ to Nopaꞌanikiꞌi pe manusiaꞌ hei hantambina tiꞌo, katoꞌo Noponopakeꞌikihi.

²²Mohawaꞌmo PUEꞋ Ala, “Kotuꞌuana manusiaꞌ tiꞌo mewalimo hibali Ingkiꞌ, pobahaꞌ noniuꞌ to moromiꞌ hei to kodake, horiana hinewowoꞌena inioꞌna intu io morupuꞌ womo wuaꞌ loti to hangkaruna iomo loti to mepaꞌani kotuwuꞌ hei noꞌoka, horiana io tuwuꞌ wute nantolou-louna.”

²³Katoꞌo nobuehi PUEꞋ Ala ka kineteꞌ Paradesi hingkeꞌna io maꞌintuꞌ woiꞌ koniroahana.

²⁴Io mobue manusiaꞌ tiꞌo pe tinaꞌ moto andona kineteꞌ Paradesi. Nopopeꞌohaꞌhi itoꞌo hei haꞌumbo malaꞌeka kerubi hante piho to makiꞌ-makiꞌ hei mewembo-wembo to nipopampodaꞌ lala pe loti to mepaꞌani kotuwuꞌ.