Read Rampi Pewaliana 30 Bible Online

Pewaliana 30 - Rampi bible

Pewaliana 30

¹Nobahaꞌ hi Raheli, kotane moꞌanaꞌ ka hi Akoꞌ, horiana io mohiriꞌ pe kokaꞌna tiꞌo, katoꞌo notiꞌi pe hi Akoꞌ, “Ipaꞌaniꞌa moꞌanaꞌ, ane hawaꞌi, agingku mahimoluꞌa!”

²Katoꞌo mehupaꞌ kobukotane hi Akoꞌ pe hi Raheli hei io mantiꞌi, “Akureꞌi pampohawane Pueꞌ Ala, to mohida bolaꞌ anaꞌma?”

³Notiꞌi hi Raheli, “Hintuꞌe hi Bilha, hawiꞌku towoweꞌe, ipoloꞌorimo, hingkeꞌna ka io aku pahua oꞌanaꞌ.”

⁴Horiana nopepaꞌanikimo hi Bilha, hawiꞌne tiꞌo, pe hi Akoꞌ mewali hantambina katoꞌo hi Akoꞌ mampoloꞌori hawiꞌ tiꞌo.

⁵Hi Bilha mehinonaꞌi, katoꞌo mampoꞌanaꞌki haduo oꞌanaꞌ tomaꞌani ka hi Akoꞌ.

⁶Mololitamo hi Raheli, “Pueꞌ Ala mepaꞌanimo pampomombaha kotangku masalaꞌna, hei Nopehoromuamo perapiꞌka hei Nopaꞌanikimoꞌa haduo oꞌanaꞌ tomaꞌani.” Iomo horiana nokokeneꞌi anaꞌ tiꞌo hi Dan.

⁷Uko tiꞌo hi Bilha mehinonaꞌi womo, hei moꞌanaꞌ haduo tomaꞌani.

⁸Notiꞌi hi Raheli, “Tuꞌu-tuꞌu mosilumbaꞌa hante kokaꞌku hei penaniꞌa,” iomo horiana anaꞌ tiꞌo nikokeneꞌi hi Natali.

⁹Hi Lea nopekokiri hamboaꞌmo intu moꞌanaꞌ, io horiana nopaꞌaniki hi Akoꞌ hawiꞌne hi Silipa nopohantambi.

¹⁰Hei hi Silipa hawiꞌna hi Lea, moꞌanaꞌ haduo oꞌana tomaꞌani.

¹¹Notiꞌi hi Lea, “Morasiꞌa” katoꞌo io mangkokeneꞌi anaꞌ tiꞌo hi Gati.

¹²Katoꞌo hi Silipa hawiꞌna hi Lea moꞌanaꞌ womo tomaꞌani,

¹³honiꞌi notiꞌi hi Lea, “Motanaꞌa, hinewowoꞌena lekiꞌ-lekiꞌna towoweꞌe hingkiꞌ mantiꞌi koꞌakuna to motanaꞌ.” Io horiana anaꞌ tiꞌo nokokeneꞌi hi Aser.

¹⁴I tempo pekina, hi Rube nolou matotengkaꞌ i popada hei pahua halangkaꞌ wuaꞌ dudaim, katoꞌo nokomi pe hi Lea, inoꞌna. Notiꞌi hi Raheli pe hi Lea, “Ipaꞌaniꞌa kaiaꞌ hangkiuꞌ wuaꞌ dudaim to nohua anaꞌmu.”

¹⁵Mehoniꞌ hi Lea, “Hawaꞌi tene ipohampaꞌ moroako maꞌaningku, hinewoꞌena hingkiꞌ iroa womo wuaꞌ loti to nohua anaꞌku?” Notiꞌi hi Raheli, “Ane ipaꞌanikiꞌa wuaꞌ loti tiꞌo, i wini hieꞌe wadiluko moloꞌori hante hi Akoꞌ.”

¹⁶Ikohupaꞌnalu hi Akoꞌ kononewa ka popada, toloumo hi Lea mampohidupaꞌkiꞌi, hei notiꞌi, “Ingko hangangaa turuko moꞌawa aku wini hieꞌe, alaꞌ ukomo kupehoroiki hante wuaꞌ loti to nohua anaꞌku pe hi Raheli.” Katoꞌo wini tiꞌo hi Akoꞌ moloꞌori hante hi Lea.

¹⁷Mehinonaꞌi womo hi Lea, alaꞌ PUEꞋ Ala mampehoromua pekokaena, katoꞌo moꞌanaꞌ womo haduo tomaꞌani kolimona.

¹⁸Notiꞌi hi Lea, “Nopaꞌanimoꞌa PUEꞋ Ala huliꞌna, alaꞌ hi Silipa kupaꞌaniki maꞌaningku.” Iomo horiana nokokeneꞌi anaꞌ tiꞌo hi Isakari.

¹⁹Katoꞌo hi Lea mehinonaꞌi womo, hei moꞌanaꞌ tomaꞌani to ka onina.

²⁰Notiꞌi hi Lea, “Nopaꞌaniꞌa Pueꞌ Ala parase to manobaꞌ. Hinewowoꞌena maꞌaningku hingkiꞌ moꞌadaꞌiꞌa, alaꞌ onimo anaꞌka hamoloꞌ tomaꞌani.” Iomo horiana anaꞌ tiꞌo nokokeneꞌi hi Sebulo.

²¹Uko tiꞌo moꞌanaꞌ womo hi Lea towoweꞌe, hei anaꞌ tiꞌo nokokeneꞌi hi Dina.

²²Uko katoꞌo Pueꞌ Ala mangkolowoimo hi Raheli, hei nopehoromuamo pekokaene. Io horiana nowuraꞌmo bolaꞌ anaꞌne hingkeꞌna nopoꞌanaꞌmo.

²³Katoꞌo mehinonaꞌimo hi Raheli hei moꞌanaꞌmo haduo tomaꞌani. Notiꞌi hi Raheli, “Nopahimo Pueꞌ Ala komohilingka.

²⁴Kuperapiꞌ hingkeꞌna norononihi tene PUEꞋ Ala anaꞌka tomaꞌani.” Io horiana anaꞌ tiꞌo nokokeneꞌi hi Yusuf.

²⁵Ikonipoꞌanaꞌakinalu hi Yusuf, notiꞌi hi Akoꞌ pe hi Laba, “Ipoliumoꞌa molai, hingkeꞌna kupahuliꞌmo pe bolaꞌ konipoꞌanaꞌangkiku.

²⁶Ipoliumo hantambingka hante anaꞌkuhi to mewali harongku, kukomi molai. Umoꞌ ibahaꞌlu komadorine jamangku i ingko.”

²⁷Angkana notiꞌi hi Laba pe hi Akoꞌ, “Tontoluko meꞌohaꞌ iseꞌe, ipokonontokimoꞌa ba haꞌumboꞌi haroma to hangangaa kubaiarikiko, alaꞌ tongawamo PUEꞋ Ala mobarakatiꞌa alaꞌ ingko.”

²⁹Mehoniꞌ hi Akoꞌ, “Umoꞌ, ibahaꞌ hadoduomu kopadorine jamangku i ingko wute tetambai pinatuwuꞌma, alaꞌ aku to morewahi.

³⁰Ikohandoaꞌangku tene mehupaꞌ i hieꞌe, pinatuwuꞌmu handoaꞌi tene woriꞌ, angkana nokomi koꞌakuna horiana PUEꞋ mobarakatiko, wutemoko mewali toaꞌ tosugiꞌ angkana ingka hohumbomoka, alaꞌ hinewowoꞌena hangangaa mampajamakiꞌa hantambingku hante anaꞌkuhi.”

³¹Notiꞌi hi Laba, “Hade hapomo to kupaꞌanikiko?” Hi Akoꞌ mehoniꞌ, “Hampoliꞌmoꞌa ipaꞌani hapo-hapo. Ane majamaꞌa tene i ingko morewahi pinatuwuꞌmu, halangkaꞌlu to kuperapiꞌo,

³²ando hieꞌe ipoliuꞌa moroa lekiꞌ-lekiꞌna gimba hante bekeꞌ to moꞌiti hei to lolobaꞌ iolu harongka to kuperapiꞌ.

³³I kamuri intu mombaha kohawaꞌka masalaꞌ. Ane iparesaꞌi pinatuwuꞌka, hei ane rapaꞌna ihua hambaꞌa gimba tota moꞌiti ba hambaꞌa bekeꞌ to hawaꞌi lolobaꞌ, palaihana tiꞌo to kunako.”

³⁴Mehoniꞌ hi Laba, “Kuponiuꞌ mpololeke lolitama tiꞌo.”

³⁵Katoꞌo nopotaniꞌmo mpuꞌu hi Laba i ando tiꞌo, lekiꞌ-lekiꞌna bekeꞌ laki to lolobaꞌ, hante lekiꞌ-lekiꞌna bekeꞌ lunaro to lolobaꞌ hante boburiꞌ hei bororikoꞌ, hante nopotaniꞌ woꞌo lekiꞌna gimba to moꞌiti. Uko tiꞌo nopohawaꞌkimohi anaꞌne molambaꞌ pinatuwuꞌ tiꞌo.

³⁶Uko katoꞌo molaimohi hi Laba hante anaꞌna, ako mampontaniꞌ lekiꞌ-lekiꞌna pinatuwuꞌ to noperapiꞌ hi Akoꞌ, honiꞌi rokaꞌa moꞌela ka hi Akoꞌ, komoꞌelana tolu ando nipatengkaꞌi. Hei pelobiana bekeꞌ hante gimba io romo to norewahi hi Akoꞌ.

³⁷Kotoꞌo hi Akoꞌ moroa tolu langkaꞌ daꞌa loti hawar, badam hante berangan honiꞌi nolepaꞌ koliꞌne hingkeꞌna noborikoꞌ.

³⁸Loti tiꞌo noporia i paꞌinuana gimba hante bekeꞌ hingkeꞌna roꞌokiꞌi ane akohi maꞌinu, alaꞌ i tempora maꞌinu rolei mohantambi.

³⁹Alaꞌ ane bekeꞌ ba gimba mohantambi mohinoroi loti to nolelaꞌ tiꞌo anaꞌra intu hingkiꞌ bororikoꞌ, boburiꞌ hei lolobaꞌ,

⁴⁰honiꞌi pinatuwuꞌ tiꞌo, noroa hi Akoꞌ nopotaniꞌ, mewaliꞌ pinatuwuꞌna, i iliꞌna gimbana hi Laba uwaꞌ tene to mororondoꞌ hante to moꞌiti. Katoꞌo ane hingkiꞌ momepohantambihi, gimbana hi Laba nopemehinoroihi hante pinatuwuꞌ to nopotaniꞌ. Hatoꞌo konojamane hi Akoꞌ hingkeꞌna notetambai gimbane, hei gimba tiꞌo nokaꞌa ka gimbana hi Laba.

⁴¹Ane pinatuwuꞌ to maroho hingkiꞌ mohatambi, noroa womo hi Akoꞌ daꞌane loti to nolepaꞌ noporia i paꞌinuara.

⁴²Angkana ane pinatuwuꞌ to molau hingkiꞌ mohantambi, hawaꞌi nowali hatoꞌo. Katoꞌo pinatuwuꞌ to moreko tiꞌo mewaliꞌ dolaꞌna hi Laba hei pinatuwuꞌ to maroho mewaliꞌ dolaꞌna hi Akoꞌ.

⁴³Hatoꞌo pepongkane hi Akoꞌ horiana sugiꞌ woriꞌmo bekeꞌne, gimbana, unta, kalide hante woriꞌ hawiꞌne.