Read Rampi Pewaliana 32 Bible Online

Pewaliana 32 - Rampi bible

Pewaliana 32

¹Hi Akoꞌ mampololiu patengkaꞌna, katoꞌo mehupaꞌ malaꞌeka-malaꞌekana Pueꞌ Ala mampohidupaꞌkiꞌi.

²Ikonoꞌokiꞌnalu hi Akoꞌ katoꞌo notiꞌi, “Hieꞌe tantaraNa Pueꞌ Ala,” horiana nokokeneꞌi peꞌohaꞌa tiꞌo Mahanaim.

³Uko katoꞌo hi Akoꞌ morumbaꞌ surona matengkaꞌ medodulu mampohidupaꞌki hi Esau kokaꞌna, i woiꞌ Seir roboꞌ Edom.

⁴Noparentaimohi, itiꞌikikei uweꞌku hi Esau waheꞌe, “Aku hawiꞌmu hi Akoꞌ, meꞌohaꞌa i hi Laba mewali toaꞌ tolori hei hinewoꞌena mahuliꞌmoꞌa.

⁵Aku motumpuiꞌa gapiꞌ, kalide, bekeꞌ hante gimba, hawiꞌ tomaꞌani hante towoweꞌe, hei aku morumbaꞌa mampetiꞌiki hieꞌe pe uweꞌku hingkeꞌna notorimoꞌa.” Katoꞌo noloumohi to nirumbaꞌ tiꞌo.

⁶Hei mahuliꞌmohi to nirumbaꞌo pe hi Akoꞌ hei rotiꞌi, “Ingka wutemoka pe kokaꞌmu hi Esau, hei io kolentuꞌana matengkaꞌ mampohidupaꞌkiko, noꞌohiaki iba natu duo toaꞌ.”

⁷Katoꞌo hi Akoꞌ mewali motehuꞌ hei mororeaꞌ laline, katoꞌo nodolaꞌmo toaꞌ-toaꞌnehio to moꞌawa hante io, bekeꞌ, gimba, gapiꞌ hei untana mewali merodolaꞌa.

⁸Alaꞌ pekirina, ane hupaꞌi hi Esau moꞌewa toaꞌku to hadolaꞌ wute nonia, katoꞌo toaꞌ to hadolaꞌna salamaꞌhi mesilai.

⁹Katoꞌo notiꞌimo hi Akoꞌ, “O Pueꞌ, Pueꞌna uweꞌku hi Burahima hei Pueꞌ Alana umoꞌku hi Isaki, PUEꞋ to mantiꞌimo pe aku,” pahuliꞌmo pe bolaꞌmu hei pe halalimu hante Aku hingkiꞌ mowali to moromiꞌ pe ingko.

¹⁰To tuꞌu-tuꞌuna aku hawaꞌa masipatoꞌ hingkiꞌ mantorimo lekiꞌna komarimaMu to Ipetidoꞌkimo pe hawiꞌmu hieꞌe. Alaꞌ aku hampiha mangkomiluꞌa laiꞌku i tempoku mewute uwai Yarade. Angkana hinewowoꞌena mewali merodolaꞌ toaꞌka.

¹¹Iposalamaꞌa ka korawena kokaꞌku iomo hi Esau, alaꞌ aku motehuꞌa pe io, inioꞌna intu womo norokoꞌa hante towoweꞌe hei oꞌanaꞌhi.

¹²Hareꞌi Itiꞌimo, “Monontomo Aku hingkiꞌ mowaliaꞌA moromiꞌ pe ingko, hei mampoworiꞌ muleꞌmu hibali woꞌoni i tahiꞌ to hawaꞌi mokoꞌihaꞌa.”

¹³Katoꞌo haminimo io inoꞌo, hei noroa hadolaꞌ ka pinatuwuꞌna mewali pepaꞌanina pe hi Esau kokaꞌna.

¹⁴Iomo 200 bekeꞌ lunaro hante 20 bekeꞌ laki, hei 200 gimba lunaro hei 20 gimba laki.

¹⁵Hei 30 unta to kolentuꞌana mepoꞌomiꞌ moꞌawa hante anaꞌna, 40 mbaꞌa gapiꞌ lunaro hante 10 mbaꞌa gapiꞌ laki, 20 mbaꞌa kalide lunaro hante 10 mbaꞌa kalide laki.

¹⁶Nodolaꞌ-dolaꞌmo pinatuwuꞌ tiꞌo haꞌumbora ntibura honiꞌi nipaꞌanikimo lekiꞌne tiꞌo pe hawiꞌ-hawiꞌna hingkeꞌna ropoꞌodaꞌi hori-hori pinatuwuꞌ tiꞌo hei notiꞌi pe iohi, “Matengkaꞌmokei medulu hei nipomoꞌoꞌele hingkeꞌna uwaꞌ kohelaꞌne ka pinatuwuꞌ ntaniꞌna.”

¹⁷Noparentaimo to medulu, “Ane hi Esau kokaꞌku, mohidupaꞌ hante ingko, hei meꞌitano pe ingko, himo uweꞌma? Hei pe imboko i ako? Hei hihimo tumpune pinatuwuꞌ to i hinaromu tiꞌo?”

¹⁸Ihoniꞌ, “Tumpuna iomo hawiꞌmu hi Akoꞌ, hieꞌemola popenombane to nopakatu pe uweꞌ, hei hi Akoꞌ uwaꞌlu i kamuringki.”

¹⁹Watoꞌomo nopeparentaiki pe hawiꞌna to kadua wute i to katolu hei pe lekiꞌna toaꞌ to morewahi pinatuwuꞌ tiꞌo, notiꞌi, “Hibali to kutiꞌikikei watoꞌo woꞌo ipowutekei pe hi Esau ane ikohidupaꞌkikei.

²⁰Hei itiꞌiki woꞌo, hawiꞌmu hi Akoꞌ uwaꞌlu metuntu ingka kamuri.” Alaꞌ pekirina hi Akoꞌ, “Ane kupaꞌaniꞌi hi Esau pinatuwuꞌ hamboaꞌmoꞌa hingkiꞌ nopokoiꞌ, hingkeꞌna ane kukohidupaꞌkiꞌi, notoriꞌmoꞌa moromiꞌ.”

²¹Katoꞌo popenombane tiꞌo niwonamo medulu, angkana io hamini tene i bambaruꞌna.

²²I wini tiꞌo hi Akoꞌ meꞌaro mampoꞌawa meroduo hantambina, meroduo hawiꞌna towoweꞌe hante hampuluꞌ isaꞌ anaꞌna tomaꞌani, mewutehi i uwai Yaboꞌ.

²³Koꞌukonalu io mowutehaki lekiꞌna to noꞌompui,

²⁴katoꞌo io holampi hadoduona. Hei haduo toaꞌ tomaꞌani mepotudaꞌ pe io wute dungku ando.

²⁵Katoꞌo noꞌele toaꞌ tiꞌo hawaꞌi hingkiꞌ penani, horiana mokondo puhuꞌ paꞌana hi Akoꞌ, katoꞌo kolengkeꞌana paꞌana hi Akoꞌ momekoheꞌo.

²⁶Katoꞌo notiꞌi toaꞌ tiꞌo, “Potedehimoꞌa molai alaꞌ hingkiꞌ mihoꞌolumoꞌi,” mehoniꞌ hi Akoꞌ, “Hawaꞌko kupohente uweꞌ ane hawaꞌa ibarakati.”

²⁷Meꞌitano toaꞌ tiꞌo pe io, “Himo konaꞌma?” Mehoniꞌ, “Hi Akoꞌ,”

²⁸katoꞌo notiꞌi toaꞌ tiꞌo, “Konaꞌmu haꞌiomo hi Akoꞌ angkana hi Saraili. Alaꞌ ingko motudaꞌko hante Pueꞌ Ala hei manusiaꞌ hei ingko penaniko.”

²⁹Hi Akoꞌ meꞌitano, “Itiꞌikiꞌa konaꞌma.” Angkana io mehoniꞌ, “Haporeꞌi hinaꞌ ipetanoki konaꞌka?” Katoꞌo io mobarakati hi Akoꞌ itoꞌo.

³⁰Hi Akoꞌ mangkokeneꞌi peꞌohaꞌa tiꞌo Pniel, alaꞌ notiꞌi, “Aku pangkiꞌa Pueꞌ Ala i hinarongku angkana hawaꞌa mahi.”

³¹Katoꞌo mewanta ando io moliu i Pniel, hei hi Akoꞌ kokuha patengkaꞌne alaꞌ kololengkeꞌana paꞌana momekoheꞌo.

³²Iomo horiana wute hinewowoꞌena toaꞌ toSaraelihi hawaꞌhi mangka ohi bauꞌ to motutuꞌi kololengkeꞌana paꞌa, alaꞌ paꞌana hi Akoꞌ to nokondo Pueꞌ.