Read Rampi Pewaliana 33 Bible Online

Pewaliana 33 - Rampi bible

Pewaliana 33

¹Kopeꞌelenalu hi Akoꞌ pe moꞌela noꞌokiꞌmo hi Esau humei hante toaꞌna iba natu duo. Iomo hinaꞌ anaꞌna nopepaꞌaniki pe hori-hori inoꞌra iomo hi Lea hante hi Raheli hei hawiꞌra roduo.

²Nopopeduluhi hawiꞌne to roduo hiꞌoꞌalu hante anaꞌra honiꞌi mehuntu hi Lea hante anaꞌna hei hi Raheli hante hi Yusuf nopokamurihi.

³Medulumo hi Akoꞌ, kolentuꞌana mokododungkui kokaꞌna, io melingkotuꞌ pitu mpiha.

⁴Angkana hi Esau mesilai mampedongkoꞌi hi Akoꞌ, nokopui hante noꞌumaꞌ, hei momepeꞌolonimohi.

⁵Konoꞌokiꞌnalu hi Esau towoweꞌe hante anaꞌ tiꞌo, nopeꞌitanoki, “Himoto to ihirima hieꞌe?” Mehoniꞌ hi Akoꞌno, “Hieꞌemola anaꞌku to noweikiꞌa Pueꞌ Ala nokomi kokodeꞌna rimaNa pe Aku.”

⁶Uko tiꞌo, noloumohi hawiꞌne towoweꞌe hante anaꞌ-anaꞌnahi ako melingkotuꞌ i hinarona hi Esau.

⁷Katoꞌo tolou woꞌo hi Lea hante anaꞌra melingkotuꞌ pe io. Hei koꞌukoana hi Yusuf hante hi Raheli.

⁸Nopeꞌitanoki hi Esau, “Hapo tungkaihama mampokatu harombonga pinatuwuꞌ to kupohidupaꞌki hingkonia?” Mehoniꞌ hi Akoꞌno, “Kokaꞌku to kuꞌadaꞌi, lekiꞌna pinatuwuꞌ tiꞌo, ingkomo tumpune hante kuperapiꞌ hingkeꞌna itorimoꞌa.”

⁹Angkana notiꞌi hi Esauno, “Woriꞌlu parewangka, hampoliꞌmoꞌa ipaꞌani hapo-hapo.”

¹⁰Notiꞌi hi Akoꞌno, “Hako hatoꞌo, alaꞌ ane marimako i aku, iroamo hapo to kupakatu pe ingko, alaꞌ motanaꞌa mpololeke mampohidupaꞌkiko. Ikokuꞌokiꞌna lioma hingkonia, hibaliꞌa pangkiꞌ liona PUEꞋ Ala, alaꞌ itorimomoꞌa moromiꞌ.

¹¹Kuperapiꞌ hingkeꞌna itorimomoꞌi hapo to kupaꞌanikiko, alaꞌ pekarimana PUEꞋ Ala i aku hinaꞌ nopaꞌaniꞌa langkaꞌ-langkaꞌna to kuparaluꞌi i kotuwuꞌku.” Hi Akoꞌ mampenonohoꞌi hi Esau hingkeꞌna notorimomoꞌi hapo to nopaꞌaniki tiꞌo, wute notorimo.

¹²Uko tiꞌo, notiꞌi hi Esauno, “Mantimomokei hingkiꞌ noloumoki. Aku to hingkiꞌ mampoꞌowonikei.”

¹³Mehoniꞌ hi Akoꞌno, “Ibahaꞌlu komaꞌeleꞌki alaꞌ mangkomika oꞌanaꞌ to handoaꞌi pobiaꞌ matengkaꞌ, hante uwaꞌ woꞌo pinatuwuꞌ to hongkoꞌ moꞌanaꞌ. Ane kipasimukuꞌi matengkaꞌ mahihi intu.

¹⁴Agina medulumoko, metuntu romoka kamuri motuntuni patengkaꞌna pinatuwuꞌ hante anaꞌkihi. Hidupaꞌluki intu i woiꞌ Sei.”

¹⁵Notiꞌi hi Esauno, “Ane hatoꞌoꞌi, kupaꞌanikei bahaꞌumbo duo hawiꞌku mampoꞌowonikei matengkaꞌ.” Angkana hi Akoꞌ mantiꞌi, “Hampoliꞌmo alaꞌ ipokarimamoꞌa.”

¹⁶Katoꞌo uko tiꞌo, molaimo hi Esau mahuliꞌ pe woiꞌ Sei iomo Edom.

¹⁷Angkana hi Akoꞌ noloumo pe bolaꞌ Suko, itoꞌo moꞌaro tambi hante bambaruꞌ pekoluloana pinatuwuꞌ. Io horiana bolaꞌ tiꞌo nikokeneꞌi, “Suko”.

¹⁸Katoꞌo hi Akoꞌ mewotumo ka Pada-Aram pe kota Sike woiꞌ Kanaꞌa. Katoꞌo mobambaruꞌhi i tinaꞌ motoꞌando kota tiꞌo.

¹⁹Popada to nopebolaꞌi tiꞌo nohili ka anaꞌ-anaꞌna hi Hemor, umoꞌna hi Sike, hilina hanatu doiꞌ peraꞌ.

²⁰Itoꞌo hi Akoꞌ moꞌaro haꞌanu bambaruꞌ potutua popenomba, honiꞌi nokokeneꞌi, “Pueꞌ Ala, Pueꞌra toSaraeli.”