Read Rampi Pewaliana 34 Bible Online

Pewaliana 34 - Rampi bible

Pewaliana 34

¹Morue katoꞌo, hi Dina anaꞌna hi Akoꞌ hante hi Lea, ako mampomehuaki haꞌumbora towoweꞌe toKanaꞌa.

²Hi Sike anaꞌna hi Hemor toHewi to mewali datu itoꞌo. Ikonoꞌokiꞌnalu hi Sike hi Dina, nopehilaiki towoweꞌe tiꞌo hei nopogauꞌ mparuku.

³Angkana dokoꞌ rahi laline pe hi Dina, hei lalina medokiꞌmo pe hi Dina. Hei io mampaliꞌ lala hingkeꞌna noleiꞌi hi Dina.

⁴Alaꞌ tiꞌo hi Sike mantiꞌi pe hi Hemo, umoꞌna, “Roakiꞌa towoweꞌe tiꞌo mewali hantambingku.”

⁵Nohori hi Akoꞌ, hi Sike mampogauꞌ ngkodake hi Dina. Angkana anaꞌnahi tomaꞌani uwaꞌ i popada mampoꞌodaꞌ lambaꞌara, hawaꞌi notiꞌi-tiꞌi hi Akoꞌ pe iohi alaꞌ handoaꞌhi mahuliꞌ.

⁶Katoꞌo hi Hemo umoꞌna hi Sike, nolouhi pe hi Akoꞌ mampowiharokiꞌi.

⁷Kolentuꞌara mowiharo anaꞌnahi hi Akoꞌ mahuliꞌmohi ka popada, ikorohorinalu to mewali tiꞌo molalo pekirire hei koiꞌhi alaꞌ hi Sike mowalia ngkodake i lumbu-lumbuna toSaraeli hante mampogauꞌ ngkodake anaꞌna hi Akoꞌ towoweꞌe, alaꞌ walia to hatoꞌo hawaꞌi wadi nipoꞌintuꞌa.

⁸Mowiharomo hi Hemo pe iohi, “Hi Sike anaꞌku dokoꞌ pe anaꞌmu, ane ipeweiluꞌi, io mewali hantambina anaꞌku,

⁹hinamoiae anaꞌte momeroa-roahi, anaꞌmu towoweꞌe ipaꞌanikika hei anaꞌki towoweꞌe kipaꞌanikikei.

¹⁰Meꞌohaꞌmokei iseꞌe pelei-leihami, mobaluꞌ-baluꞌ wute uwaꞌ lumami iseꞌe.”

¹¹Katoꞌo hi Sike mantiꞌi pe umoꞌna anaꞌ tiꞌo hante pe kokaꞌ-kokaꞌnahi, “Ane ipoꞌioꞌkei perapiꞌka, kupepaꞌaniki pe ingkei hapo to iperapiꞌ,

¹²kehapoꞌi iponolentuiꞌa woriꞌ doiꞌ hante doiꞌ pamoneꞌ, kupepaꞌaniki hapo to iperapiꞌ, hingkeꞌna ipaꞌanikiꞌa towoweꞌe tiꞌo mewali hantambingku.”

¹³Katoꞌo anaꞌnahi hi Akoꞌ mehoniꞌ hi Sike hante hi Hemo umoꞌna hante wuti, alaꞌ hi Sike mampogauꞌ ngkodake hi Dina, hineeꞌra tiꞌo,

¹⁴iohi mantiꞌi pe roduo toaꞌ tiꞌo, “Ingka hawaꞌka wadi mampohamoko hineeꞌki hante toaꞌ to hawaꞌi nibulabaꞌ, alaꞌ tiꞌo kodake i ingka.

¹⁵Hingkiꞌ kitorimo perapiꞌma ane ingko hibali ingka, iomo lekiꞌna tomaꞌani i iliꞌmi nibulabaꞌ,

¹⁶honiꞌi ingka mampewei towowalongki pe ingkei hei ingka moroa towowalomi, hei ingka meꞌohaꞌ i ingkei, hei ingkiꞌ mewaliki haꞌanu roboꞌ.

¹⁷Angkana ane ingkei hawaꞌi mampehoromua pantiꞌiki hei hawaꞌkei nibulabaꞌ, kiroa mahuliꞌ anaꞌ tiꞌo, hei molaika.”

¹⁸Katoꞌo hi Hemo hante hi Sike, mampoꞌioꞌ pantiꞌira.

¹⁹Hei anaꞌntomaꞌani tiꞌo hawaꞌi bata-bata mampoꞌintuꞌa, alaꞌ io dokoꞌ pe anaꞌna hi Akoꞌ, hei liaꞌ io haduo toaꞌ to niꞌadaꞌi mpololeke i lekiꞌna potinora.

²⁰Katoꞌo molaimohi hi Hemo hante hi Sike, anaꞌna tiꞌo, pe wambaꞌ bente kotara hei iohi mowiharo pe tumpu kota tiꞌo,

²¹“Toaꞌ toSaraeli tiꞌo awantahi, tedehiluiae iohi meꞌohaꞌ i roboꞌ hieꞌe hante pelei-leira, hawaꞌireꞌi roboꞌ hieꞌe ganaꞌ roꞌpeꞌohaꞌi? Katoꞌo ingkiꞌ moroa anaꞌ ntowowalora to topohantambi, hei towowalonta topepaꞌaniki pe iohi.

²²Hante lala hieꞌe toaꞌ tiꞌohi mampoꞌioꞌ moꞌawa-awa hante ingkiꞌ, honiꞌi ingkiꞌ mewaliki haꞌanu roboꞌ, iomo lekiꞌna tomaꞌani i lumbunta nibulabaꞌ hibali iohi.

²³Rewuara, lumara hei lekiꞌna pinatuwuꞌra, hareꞌi intu lekiꞌna tiꞌo toꞌompui woꞌo? Aginamo topoꞌioꞌ perapiꞌre, hingkeꞌna iohi tontohi moꞌawa hante ingkiꞌ.”

²⁴Hatoꞌo pahuane hi Hemo hante hi Sike anaꞌna tiꞌo, nopehoromua lekiꞌna toaꞌ to morampu i wambaꞌ bente kota tiꞌo, katoꞌo nibulabaꞌmo lekiꞌna tomaꞌani to uwaꞌ i kota tiꞌo.

²⁵I ando katolu, ikolentuꞌara iohi maporiꞌ nokomolaloi, mehupaꞌ roduo anaꞌne hi Akoꞌ, iomo hi Simeo hante hi Lewi, kokaꞌna hi Dina, katoꞌo haduo-haduohi moroa pihora hei menonongkoꞌhi mekahi i kota hante hawaꞌhi motehuꞌ, morokoꞌ lekiꞌna tomaꞌani, hei hawaꞌi uwaꞌ to moꞌewahi.

²⁶Hi Hemo hante hi Sike woꞌo rorokoꞌ hante piho, hei iohi moroa hi Dina ka tambina hi Sike, honiꞌi ropolaiki.

²⁷Katoꞌo mehupaꞌhi anaꞌne hi Akoꞌ to ntaniꞌna morompoꞌi toaꞌ-toaꞌ to nirokoꞌ hei morompoꞌi woꞌo lekiꞌna to uwaꞌ i kota tiꞌo, alaꞌ hineeꞌra nipogauꞌ ngkodake.

²⁸Bekeꞌ, gimba, gapiꞌ, kalidena hante lekiꞌna to i lali hei to i howali kota tiꞌo roroa rokomi.

²⁹Hinangkana kosugiꞌara, lekiꞌna anaꞌra hei towoweꞌera nitawaniꞌ hei lekiꞌna woꞌo to uwaꞌ i tambira rorompoꞌi.

³⁰Hi Akoꞌ mantiꞌi pe hi Simeo hante pe hi Lewi, “Ingkei mokodekeiꞌa hei mampokodakekei konaꞌku pe lekiꞌna toaꞌ to uwaꞌ i roboꞌ hieꞌe, pe toKanaꞌa hante toFeris, hantaro ingkiꞌ hangkokiuꞌluki, ane mohintuwuꞌhi moꞌewaki, monontomo hingkiꞌ ronaniki, hei hingkiꞌ roporopuꞌki, aku hante lekiꞌna ohina tambingku.”

³¹Angkana mehoniꞌhi, “Hawaꞌi kipotedehi hineeꞌki nipohibali towoweꞌe to bantomaꞌania!”