Read Rampi Pewaliana 35 Bible Online

Pewaliana 35 - Rampi bible

Pewaliana 35

¹Uko katoꞌo notiꞌi Pueꞌ Ala pe hi Akoꞌ, “Mahuliꞌmoko pe Beteli, i pampemombahangKu pe ingko i tempomu mehilai ka kokaꞌmu hi Esau, meꞌohaꞌmoko itoꞌo hei mowalimoko haꞌanu potutua popenomba pe Aku.”

²Katoꞌo mololitamo hi Akoꞌ pe halali-halalinahi hei pe lekiꞌna toaꞌ to uwaꞌ itoꞌo notiꞌi, “Itubemokei lekiꞌ-lekiꞌne totoaꞌ to niwali ka watu ba ka loti, hei ipohawamokei parewami hante to wolaꞌ.

³Hangangaa iwalikei hatoꞌo alaꞌ hingkiꞌ nolouki pe Beteli, itoꞌo hingkiꞌ moꞌaroꞌa haꞌanu potutua popenomba pe Pueꞌ Ala to mosulungiꞌa i lali komaporiꞌku hei moꞌowoniꞌa i umbo-umbo koꞌakoangku.”

⁴Korohorinalu lolitane, ropepaꞌanikimo pe hi Akoꞌ lekiꞌ-lekiꞌna lente to rowali ka watu ba ka loti hei hatoꞌo woꞌo dodaliꞌra. Lekiꞌ-lekiꞌna tiꞌo notawumo hi Akoꞌ i luaꞌna hapongko nunuꞌ dodungku i bolaꞌ Sike.

⁵Ikopolaira hi Akoꞌ hante tinonahi, PUEꞋ Ala mampoꞌuwaꞌmo komorokaꞌra lekiꞌ-lekiꞌna toaꞌ to meꞌohaꞌhi i bolaꞌ to dodungku tiꞌo, hingkeꞌna hawaꞌhi modapaꞌ anaꞌna hi Akoꞌ.

⁶Koꞌukoana mehupaꞌmohi hi Akoꞌ hei lekiꞌ-lekiꞌna toaꞌ to nokohiꞌoꞌaluki i woiꞌ kanaꞌa i kota Beteli to nitiꞌi woꞌo Lus.

⁷Itoꞌo hi Akoꞌ moꞌaromo haꞌanu potutua popenomba hei nokokeneꞌi El-Beteli, alaꞌ itoꞌomo PUEꞋ Ala mampemombaha pe hi Akoꞌ i kopehilaina ka kokaꞌna.

⁸Tempora itoꞌo, hi Debora toperoroa hi Ribeka mahimo, honiꞌi rotawu i luaꞌna nunuꞌ dodungku i bolaꞌ tiꞌo, io horiana loti tiꞌo nikokeneꞌi “Loti Peꞌolaha”.

⁹Ikohupaꞌnalu hi Akoꞌ i Beteli ka woiꞌ Pada-Aram, Pueꞌ Ala mampopemombahamo pe io, honiꞌi Nobarakati,

¹⁰Notiꞌi, “Konaꞌmu handoꞌiomo hi Akoꞌ, angkana nikokeneꞌimoko hi Saraeli,” palaihana, “Motudaꞌ hante Pueꞌ Ala.” Hatoꞌomo Pueꞌ Ala mowolihi konaꞌna hi Akoꞌ mewaliꞌ hi Saraeli.

¹¹Uko tiꞌo notiꞌi womo Pueꞌ Ala, “Akumo Pueꞌ Ala to makuasaꞌ, memuleꞌmoko wute woriꞌ pemuleꞌama. Ka pemuleꞌamu hingkiꞌ Kupopewali haꞌanu roboꞌ ngkodeꞌ hei woriꞌ kodatua ntaniꞌna, hei pemuleꞌamu woriꞌ woꞌo hingkiꞌ mewali datu.

¹²Woiꞌ hieꞌe to kupaꞌaniki hi Burahima hei hi Isaki, hingkiꞌ Kupaꞌanikiko woꞌo wute-wute i muleꞌmuhi.”

¹³Uko mololita hatoꞌo Pueꞌ Ala mampolihimo hi Akoꞌ

¹⁴Uko tiꞌo hi Akoꞌ moꞌaromo haꞌanu watu to mewaliꞌ tanda popangkolowoi koꞌitoꞌonamo Pueꞌ Ala mololita pe io. Watu tiꞌo nobobohi uwai anggoroꞌ hante bokaꞌ Saitu iomo popenombane pe Pueꞌ Ala.

¹⁵Pebolaꞌa tiꞌo nokokeneꞌi Beteli, alaꞌ itoꞌomo Pueꞌ Ala mololita pe hi Akoꞌ.

¹⁶Uko tiꞌo hi Akoꞌ hante tinonahi molai womohi ka Beteli. Himboaꞌmo moꞌela ka bolaꞌ Eparata, mehupaꞌmo tempone hi Raheli moꞌanaꞌ, poꞌanaꞌna tiꞌo masusa mpololeke.

¹⁷Horiana notiꞌi sando pe io, “Hawaꞌko morokaꞌ hinewowoꞌena moꞌanaꞌ womoko tomaꞌani.”

¹⁸Hingkiꞌ ukomo inohaꞌne, nokokeneꞌi hi Raheli anaꞌne tiꞌo Ben-Oni, palaihana “anaꞌku i lali komasusangku”, angkana nokokeneꞌi hi Akoꞌ hi Benami, palaihana “Anaꞌ to morasiꞌ”.

¹⁹Mahimo hi Rahelino, katoꞌo rotawu i hiri lala pe bolaꞌ Eparata, to hinewowoꞌena nitiꞌi Beteleme.

²⁰Itoꞌo hi Akoꞌ motindiꞌ haꞌanu watu to mewaliꞌ tandaꞌ popangkolowoi, hei potawuana hi Raheli rotandaꞌi hante watu tiꞌo wute hinewowoꞌena.

²¹Uko tiꞌo nopololiumo hi Akoꞌ patengkaꞌne moliu i Migal-Eder honiꞌhi moꞌaro bambaruꞌra i hambeiꞌ bolaꞌ tiꞌo.

²²Kolentuꞌara itoꞌo, hi Rube mampoloꞌorimo hi Bilha to nokoroduo umoꞌna. Waliana tiꞌo nobahaꞌ umoꞌna. Hieꞌemohi anaꞌne hi Akoꞌ tomaꞌani to hampuluꞌ meroduo.

²³Anaꞌna ka hi Lea, to kokokaꞌ hi Rube, honiꞌi hi Simeo, hi Lewi, hi Yehuda, hi Isakar, hei tohinoneꞌ hi Sebulo.

²⁴Anaꞌna ka hi Raheli iomo tokokaꞌ hi Yusuf hei tohinoneꞌ hi Benami.

²⁵Anaꞌna ka hi Bilaꞌ hawiꞌna hi Raheli iomo hi Dan tokokaꞌ hei tohinoneeꞌ hi Natali,

²⁶Anaꞌna ka hi Silipaꞌ hawiꞌna hi Lea iomo to kokokaꞌ hi Gati hei tohinoneeꞌ hi Aser. Iomohi anaꞌne hi Akoꞌ tomaꞌani to nipoꞌanaꞌki i Pada-Aram.

²⁷Ka bolaꞌ Migdal-Eder, noloumo hi Akoꞌ pe hi Isaki umoꞌna i Mamre dodungku i Kiriat-Arba to nitiꞌi woꞌo Hebron. Hampiha hi Burahima meꞌohaꞌ woꞌo itoꞌo mewali to mehupaꞌ.

²⁸Hi Isaki motodimo hei tinuwuꞌna 180 ntoꞌa katoꞌo mahimo.

²⁹Ikomahina tiꞌo to motawuꞌi iomohi anaꞌna to roduo, hi Esau hante hi Akoꞌ.