Read Rampi Pewaliana 37 Bible Online

Pewaliana 37 - Rampi bible

Pewaliana 37

¹Hi Akoꞌ meꞌohaꞌ lebaꞌ i woiꞌ Kanaꞌa, i peꞌohaꞌana umoꞌna.

²Hieꞌemo lolita muleꞌna hi Akoꞌ. I tempona hi Yusuf, anaꞌna hi Akoꞌ, moꞌumuruꞌ hampuluꞌ pitu ntoꞌa, io molambaꞌ bekeꞌ hante gimba, moꞌawa-awa hante kokaꞌnahi, iomo anaꞌna hi Bilaꞌ hante hi Silipaꞌ to noropaꞌhi hi Akoꞌ. Hi Yusuf morapoꞌ waliana kokaꞌnahi to kodake pe umoꞌra.

³Hi Akoꞌ mampotundeꞌ hi Yusuf ka halalinahi, alaꞌ io to nipoꞌanaꞌki i komotodiana umoꞌna hei iomo horiana nipowaliki baduꞌ to maranga mpololeke.

⁴Roꞌele hi Yusuf nipototundeꞌ ntaniꞌ ka iohi, katoꞌo mowahiꞌhi pe hi Yusuf, iomo horiana mololitahi kahohurua pe io.

⁵I tempo wini hi Yusuf mepototuru, hei pototuruna tiꞌo nololitaki halalinahi, katoꞌo pedeꞌ liuka womo korokabiriꞌne hi Yusuf.

⁶Notiꞌi, “Ipehoromuakei hingkeꞌna kulolitaꞌi pepototurungka.

⁷Waheꞌe pepototurungka ingkiꞌ lekiꞌta kolentuꞌanta i kineteꞌ mohiluꞌ kina, katoꞌo kinangku metotiꞌi mononto, katoꞌo kinami metotiꞌi motuleliꞌi kinangku hei menomba pe kinangku.”

⁸Notiꞌi halalinehi pe hi Yusuf, “Kodokoꞌmuluto mewali datu to makuasaꞌ pe ingka!” Mepongka katoꞌo halalina pedeꞌ mowahiꞌ lekemohi pe io alaꞌ pepototuruna to nololita.

⁹Katoꞌo hi Yusuf mepototuru womo, hei nololitaki womo pe halalinahi notiꞌi, “Mepototuru womoꞌa. Kuꞌokiꞌ ando, hante wula hei hampuluꞌ isaꞌ betueꞌ menomba pe aku.”

¹⁰Pepototuruna tiꞌo nololitaki woꞌo umoꞌna, katoꞌo umoꞌna mokamoroki hante notiꞌi, “Pepototuru hapohi woꞌoto? Pekirimu, aku hante inoꞌmu hei halalimuhi hingkiꞌ melingkotuꞌ hei menomba pe ingko?”

¹¹Mowahiꞌhi mpololeke halalinehi pe hi Yusuf, angkana umoꞌra mampoꞌilali pototuruna hi Yusuf tiꞌo.

¹²I hampiha tempo kokaꞌnehi hi Yusuf nolouhi molambaꞌ bekeꞌ hante gimbana umoꞌra dodungku bolaꞌ Sike.

¹³Notiꞌi hi Akoꞌ pe hi Yusuf, “Noloumoko pe kokaꞌmuhi to molambaꞌhi bekeꞌ hante gimba dodungku i Sike.” Hi Yusuf mehoniꞌ, “Ioꞌ, umoꞌ.”

¹⁴Notiꞌi umoꞌne, “Nolouko mampeꞌele kokaꞌmuhi, bekeꞌ hante gimbara, honiꞌi mahuliꞌko humei, mampetiꞌiki koꞌuwaꞌara.” Noloumo mpuꞌu hi Yusuf mampolihi ngamba Herebo. Matengkaꞌmo hi Yusuf wute i bolaꞌ Sike.

¹⁵Kolentuꞌana matengkaꞌ nolou humei i popada, mampohidupaꞌki haduo toaꞌ tomaꞌani to meꞌitano pe io, “Ehapo to ipaliꞌo?”

¹⁶Mehoniꞌ hi Yusuf, “Aku mampaliꞌa halalingkuhi to molambaꞌ bekeꞌ hante gimba iseꞌe, ibahaꞌ ba i imbohi?”

¹⁷Notiꞌi toaꞌ tiꞌo, “Iohi molai ka seꞌe. Kuhori rotiꞌi hingkiꞌ nolouhi pe Dota.” Katoꞌo noloumo hi Yusuf motuntuni kokaꞌnahi hei nohuamohi mpuꞌu i Dota.

¹⁸Ka moꞌela roꞌokiꞌmo hi Yusuf, handoaꞌi tene hupaꞌ pe iohi, hampekokirimohi halalinehio hingkiꞌ morokoꞌi.

¹⁹Rotiꞌi haduo hei haduo, “Elekei to poko mepototuru mehupaꞌmo.

²⁰Hohumbo ane torokoꞌmoꞌi? Honiꞌi toꞌonoꞌaki wotalokaꞌne pe lali woloꞌ bubu to mobanimo. Hei totiꞌi intu nojangku pinatuwuꞌ to meꞌoꞌoka. Hei toꞌele pewaliane intu pototuruna.”

²¹Hi Rube pahori pangkoliwora tiꞌo, honiꞌi io magega hingkiꞌ mamperorui hi Yusuf hante notiꞌi, “Inioꞌiae torokoꞌi!

²²Tonowuꞌaki wae pe woloꞌ bubu to uwaꞌ i popada hieꞌe. Angkana anioꞌ tokondo ba tobeloi wotane.” I tempo tiꞌo, notiꞌi hi Rube alaꞌ pekirina hingkiꞌ mamposalamaꞌ hi Yusuf honiꞌi nokomi mahuliꞌ pe umoꞌra.

²³Ikohupaꞌnalu hi Yusuf i halalinahi, liu rohokiꞌ hante rowula baduꞌne to manobaꞌ.

²⁴Honiꞌi roruiꞌ ako ronowuꞌaki pe woloꞌ bubu to mobanimo.

²⁵Uko tiꞌo mahuramohi mangka, ikolentuꞌara mangka roꞌokiꞌ toaꞌ toSumaeli to mobaluꞌ-baluꞌ, to ka Media kolentuꞌara matengkaꞌ ka Gilea pe Masiri. Untara ropopatekeꞌi dupaꞌ hante rampa-rampa to masuliꞌ.

²⁶Notiꞌi hi Yehuda pe halalinahi, “Ehapo dumbuꞌne mokondoki hineeꞌta honiꞌi hawaꞌi totiꞌi-tiꞌi koꞌingkiꞌne morokoꞌi?

²⁷Aginamo topobaluꞌ pe toSumaeli. Anioꞌi topokolalo alaꞌ io hineeꞌta.” Halalinahi mampoꞌioꞌ lolita tiꞌo.

²⁸I kolentuꞌana moliu topobaluꞌ-baluꞌ tiꞌo, hi Yusuf roꞌoreꞌ ka bubu, honiꞌi ropobaluꞌ pe topobaluꞌ-baluꞌ tiꞌo hante hilina rompuluꞌ doiꞌ peraꞌ, katoꞌo hi Yusuf nokomi topobaluꞌ-baluꞌ tiꞌo pe Masiri.

²⁹Hi Rube hawaꞌi nobahaꞌ korobaluꞌne hineeꞌra. Ipahuliꞌna hi Rube, liu ako mampepanto woloꞌ bubu, noꞌele hi Yusuf himboaꞌmo uwaꞌ itoꞌo. Katoꞌo nohepaꞌ-hepaꞌ baduꞌne alaꞌ hanondoihaꞌi.

³⁰Io mahuliꞌ pe halalinahi hei mantiꞌi, “Hi Yusuf hamboaꞌmo uwaꞌ i lali bubu! Hapo to hingkiꞌ kupoꞌintuꞌa hinewowoꞌena?”

³¹Katoꞌo morokoꞌhi hambaꞌa bekeꞌ hei raꞌana ropolomiꞌi baduꞌna hi Yusuf.

³²Uko tiꞌo baduꞌna to mokoraꞌa rokomi pe umoꞌra hante rotiꞌi, “Baduꞌ hieꞌe kihua. Iparesaꞌ ba baduꞌnaꞌi hi Yusuf anaꞌmu?”

³³Ikonoparesaꞌnalu hi Akoꞌ baduꞌ tiꞌo io mantiꞌi, “Tuꞌu baduꞌ hieꞌe baduꞌna anaꞌku. Matantumo anaꞌku nojangku pinatuwuꞌ to meꞌoꞌoka hei noꞌoka.”

³⁴Hi Akoꞌ mohepaꞌ-hepaꞌ baduꞌna alaꞌ hanondoihaꞌi, hante mopakeꞌ baduꞌ mperorima, haꞌumbora ando komoruene io handondoiha mamponindi anaꞌna.

³⁵Lekiꞌna anaꞌna tomaꞌani hante towoweꞌe mehupaꞌ mampododoli lalina umoꞌra, angkana io hawaꞌi hiniꞌ nipododoli hei notiꞌi, “Wuteꞌa mahi tontona kupohanondoiha alaꞌ anaꞌku hi Yusuf.” Watoꞌomo hi Yusuf nopeꞌoloni umoꞌna.

³⁶Kolentuꞌana tiꞌo, hupaꞌmohi toMedia i woiꞌ Masiri, hi Yusuf liu ropobaluꞌ pe Potipar tadulako to mampoꞌodaꞌ tambi kodatuana Pirao.