Read Rampi Pewaliana 38 Bible Online

Pewaliana 38 - Rampi bible

Pewaliana 38

¹I tempo tiꞌo hi Yehuda mampolihi halali-halalinahi hei meꞌohaꞌ pe haduo toaꞌ to nikokeneꞌi hi Hira to ka Adulam.

²Itoꞌo hi Yehuda pangkiꞌ haduo towoweꞌe toKanaꞌa, to nikokeneꞌi hi Sua. Katoꞌo hi Yehuda hamoko hante towoweꞌe tiꞌo.

³Mohinonaꞌimo towoweꞌe tiꞌo, katoꞌo mampoꞌanaꞌki haduo tomaꞌani, hei nikokeneꞌi hi Er.

⁴Uko tiꞌo towoweꞌe tiꞌo mohinonaꞌi womo, katoꞌo mampoꞌanaꞌki haduo tomaꞌani hei nikokeneꞌi hi Onan.

⁵Katoꞌo towoweꞌe tiꞌo mampoꞌanaꞌki womo haduo tomaꞌani, hei nikokeneꞌi anaꞌ tiꞌo hi Sela. Hi Yehuda kolentuꞌana uwaꞌ i Kesip ikonipoꞌanaꞌakina anaꞌ tiꞌo.

⁶Hi Er kodeꞌmo katoꞌo nipohamokomo hante hi Tamar.

⁷Angkana hi Er, kodake waliane i hinarona PUEꞋ, horiana PUEꞋ morokoꞌi.

⁸Katoꞌo notiꞌi hi Yehuda pe hi Onan, “Ikododungkuhimo hantambine kokaꞌmu tiꞌo, hamokomo hante io mampohawa kokaꞌmu, hingkeꞌna hawaꞌi moholi muleꞌne kokaꞌmu.”

⁹Angkana hi Onan nobahaꞌ, kotane io to moꞌompui muleꞌne intu, iomo horiana piha-pihana io mangkododungkui hantambina kokaꞌna tiꞌo, io mampotedehilu uwai lahuꞌna pe huwali, hantaro romoꞌi uwaꞌ muleꞌne to pe kokaꞌna.

¹⁰Angkana to nowali tiꞌo kodake i hinarona PUEꞋ, horiana PUEꞋ morokoꞌi woꞌo.

¹¹Katoꞌo notiꞌi hi Yehuda pe hi Tamar, moniana tiꞌo, “Mahuliꞌmoko pe tambina todulumu, meꞌohaꞌ itoꞌo mewali tobembaꞌ, wute anaꞌku hi Sela tiꞌo kodeꞌ,” alaꞌ nopekiri, “Inioꞌ-nioꞌna intu io mahi hibali roduo kokaꞌna tiꞌo.” Katoꞌo noloumo hi Tamar hei meꞌohaꞌ i tambina toduluna.

¹²Hawaꞌi morue katoꞌo mahimo hantambine hi Yehuda iomo anaꞌne hi Sua. Uko merorima, molaimo hi Yehuda pe Timina, pe toaꞌ-toaꞌ to mogundi wilolu gimba, moꞌawa hante hi Hira, bolena, toAdulam tiꞌo.

¹³Hi Tamar pahori kareba, ponianana hi Yehuda kolentuꞌana i lala pe Timina ako mogundi wilolu gimba-gimbana.

¹⁴Katoꞌo nopohintemo parewa kobembaꞌne hei mopakeꞌ parewa ntaniꞌna hei metangkoniꞌ ako mahura i wambaꞌ pekahia pe kota Enaim i lala pe Timna. Nobahaꞌmo hi Tamar hi Sela kodeꞌmo, angkana handoaꞌhi nopohamoko hi Yehuda.

¹⁵Ikonoꞌokiꞌnalu hi Yehuda, notiꞌiae io haduo towoweꞌe to bantomaꞌania, alaꞌ io motutuꞌi liona.

¹⁶Katoꞌo hi Yehuda mampomehuaki towoweꞌe to i hiri lala tiꞌo hei mantiꞌi, “Humeimoko, aku hingkiꞌ dokoꞌa mampogauꞌko.” Hawaꞌi nobahaꞌ hi Yehuda, towoweꞌe tiꞌo moniana. Meꞌitano towoweꞌe tiꞌo, “Hapo to hingkiꞌ ipaꞌanikiꞌa, ane ipogauꞌa?”

¹⁷Hi Yuda mehoniꞌ, “Hingkiꞌ kupakatukiko hambaꞌa anaꞌna bekeꞌku.” Notiꞌi towoweꞌe tiꞌo. “Wadilu angkana uwaꞌ tikoangka wute koꞌuwaꞌana bekeꞌ tiꞌo.”

¹⁸Hi Yuda meꞌitano “Hapo tikoa to ikodokoꞌio?” Mehoniꞌ towoweꞌe tiꞌo, “Ipaꞌanikiꞌa tandaꞌ konaꞌmu to ipolewulu hante laiꞌ to uwaꞌ i korawemu tiꞌo.” Katoꞌo nopepaꞌanikimo lekiꞌna tiꞌo pe io, hei nopogauꞌimo mpuꞌu. Katoꞌo towoweꞌe tiꞌo mohinonaꞌimo ka io.

¹⁹Towoweꞌe tiꞌo molaimo pe tambina, hei sangkoniꞌna nopohawamo, hei mopakeꞌmo huliꞌ baduꞌ kobembaꞌna.

²⁰Haꞌumbora tempo katoꞌo hi Yehuda mampakatu anaꞌ bekeꞌ tiꞌo moliu hi Hira ako moroa mahuliꞌ tikoa to nopaꞌanikiꞌi pe towoweꞌe tiꞌo, angkana towoweꞌe tiꞌo hawaꞌi nohua hi Hira.

²¹Io meꞌitano-tano i peꞌohaꞌana towoweꞌe tiꞌo, “I imboreꞌi towoweꞌe to biasa mahura i hiri lala hieꞌe?” Mehoniꞌhi, “Hawaꞌi kahampiha uwaꞌ towoweꞌe to bantomaꞌania mahura iseꞌe.”

²²Mahuliꞌmo hi Hira pe hi Yehuda hei mantiꞌi, “Hawaꞌi uwaꞌ kupomehuaki towoweꞌe tiꞌo, hei toaꞌ-toaꞌ to itoꞌohi mantiꞌi, ‘Hawaꞌi uwaꞌ towoweꞌe to bantomaꞌania iseꞌe.’”

²³Katoꞌo hi Yehuda mantiꞌi, “Dehikimoꞌiae luma tiꞌo noroa, hintaro romoki mewali pononaꞌana toaꞌ, tuꞌumoꞌiae anaꞌ bekeꞌ tiꞌo kupakatukimo, angkana hawaꞌi ipomehuaki towoweꞌe tiꞌo.”

²⁴Ikotolu mbulana nipekarebaikimo pe hi Yehuda, “Hi Tamar moniamu, mewalimo to bantomaꞌania hei mohinonaꞌimo,” katoꞌo notiꞌi hi Yehuda, “Komimoꞌi towoweꞌe tiꞌo hingkeꞌna nihunuꞌi.”

²⁵I tempona nikomi, towoweꞌe tiꞌo morumbaꞌ toaꞌ pe ponianana mantiꞌi, “Ka tomaꞌani tumpuna luma hieꞌela to mampopohinonaꞌiꞌa. Paresaꞌmoꞌi, himo tumpune tandaꞌ konaꞌ to i lewulu hante laiꞌ hieꞌe”

²⁶Hi Yehuda mamparesaꞌ luma tiꞌo hei nobahaꞌ kolumana, katoꞌo io mantiꞌi, “Haꞌio towoweꞌe tiꞌo to masalaꞌno, angkana aku to masalaꞌno, alaꞌ io hawaꞌi kupahamoko hante hi Sela, anaꞌku,” hi Yehuda himaꞌmo kahampiha moruntui towoweꞌe tiꞌo.

²⁷I tempona hi Tamar hingkiꞌ moꞌanaꞌ, mombahamo anaꞌ to nopohinonaꞌiki tiꞌo mororopaꞌ.

²⁸Hei ikopoꞌanaꞌnamo, haduo ka anaꞌ tiꞌo mampasuwu korawena, katoꞌo liu notiko sando hei nototandaꞌi hante lori Kirimisi katoꞌo io mantiꞌi, “Himidoꞌ hieꞌe to hampododulu memolo.”

²⁹Ikonoꞌorunalu mahuliꞌ korawene himidoꞌ tiꞌo, memolomo hampororopaꞌane, hei sando mantiꞌi, “Marohoko loleke lintaꞌ pe huwali,” Horiana anaꞌ tiꞌo nikokeneꞌi hi Pere.

³⁰Uko tiꞌo memolomo halaline tomaꞌani to nototandaꞌi i korawena hante lori Kirimisi, katoꞌo io nikokeneꞌi hi Sera.