Read Rampi Pewaliana 39 Bible Online

Pewaliana 39 - Rampi bible

Pewaliana 39

¹Hi Yusuf nokomimo toaꞌ toSumaila nolou pe woiꞌ Masiri, honiꞌi ropobaluꞌ pe Potipar haduo toMasiri, tadulako to mampoꞌodaꞌ tambi kodatuana Pirao.

²Angkana PUEꞋ Ala mosulungi hi Yusuf, horiana io poko morasiꞌ i lali lekiꞌ-lekiꞌna pajamana. Io meꞌohaꞌ i tambina toaꞌ toMasiri tiꞌo

³Ikonoꞌokiꞌnalu tuana, koPUEꞋ Alanalu mpuꞌu to mosulungiꞌi hi Yusuf, horiana hi Yusuf morasiꞌ i lekiꞌ-lekiꞌna to nojama.

⁴Horiana motanaꞌ loleke laline Potipar pe hi Yusuf, iomo horiana nopohinaru mewali to moꞌatoroꞌ hei morewahi tambina, hei lekiꞌ-lekiꞌna lumana.

⁵Mepongka katoꞌo, alaꞌ hi Yusuf, PUEꞋ mobarakati tambina toMasiri tiꞌo hei lekiꞌna hapo to roꞌompui, moromiꞌ to i lali tambi hei to i kineteꞌ.

⁶Lekiꞌna lumana Potipar, nopepohinarukimo pe hi Yusuf, iomo horiana Potipar hamboaꞌi mampekiri urusia i lali ntambina, sangadina urusiara ntoliꞌ hamoko. Hi Yusuf haduo anaꞌntomaꞌani to maroho hei manobaꞌ mpololeke.

⁷Iomo horiana nokohoka hantambina Potipar hei nowowoi hingkeꞌna roturu moꞌawa.

⁸Angkana hi Yusuf hawaꞌi hiniꞌ notiꞌi, “Inioꞌko watoꞌo, aku to nopoꞌohiꞌa tuaku Potipar morewahi mampopiha lumana, io horiana hamboaꞌi mampekiri hapo-hapo i lali ntambi hieꞌe.

⁹Kuasaꞌku hibali hante kuasaꞌna i lali tambi hieꞌe. Hampopihana nopakuasaꞌikimoꞌa, hampalenalu hawaꞌa makuasaꞌ i ingko tua. Hawaꞌa hiniꞌ mowali to kodake hante mowali dosa i hinarona Pueꞌ Ala.”

¹⁰Kehapoꞌi watoꞌomo, ando-andona hantambina Potipar mokokeloi nturusi hi Yusuf. Angkana anaꞌntomaꞌani tiꞌo hawaꞌi hiniꞌ motuntuni peleihana towoweꞌe tiꞌo turu moꞌawa.

¹¹Hampiha tempo hi Yusuf mekahi pe lali ntambi hingkiꞌ majama. I tambi tiꞌo hawaꞌi uwaꞌ toaꞌ ntaniꞌ itoꞌo.

¹²Hantambina Potipar liu mobiniꞌ baduꞌna hi Yusuf hei notiꞌi, “Humeiko turuki moꞌawa.” Angkana hi Yusuf mehilai horiana baduꞌna holampi i korawena towoweꞌe tiꞌo.

¹³Konoꞌelenalu towoweꞌe tiꞌo hi Yusuf mehilaimo mampolihimo baduꞌna,

¹⁴towoweꞌe tiꞌo mewowoi pe toaꞌhi hei notiꞌi, “Elekei, toaꞌ toIbarani to nopoꞌawa maꞌaningku i tambi hieꞌe, humeilu mowali walia to mepokohili. Io mekahi pe lali koturua hei noparukuꞌa turu hante io, angkana mekaraꞌ-karaꞌa kupokobue.

¹⁵Alaꞌ meꞌoꞌando-andoꞌa io mehilai pe huwali hei baduꞌna nopolihi romo ntooꞌ.”

¹⁶Katoꞌo baduꞌ tiꞌo noporia, mampekokau pahuliꞌana maꞌanina.

¹⁷Ipahuliꞌna maꞌanine, nololitaki womo mahuliꞌ hibali to nololita hingkonia notiꞌi, “Toaꞌ toIbarani to ikomi humei, mekahi pe lali koturua hei noparukuꞌa turu hante io.

¹⁸Angkana peꞌoꞌandongkulu, katoꞌo io mehilai pe huwali, hituluꞌe baduꞌne to nopolihi.”

¹⁹Konohorinalu Potipar lolitane hantambina, io bukota mpololeke.

²⁰Katoꞌo hi Yusuf noperumbaꞌkimo nihokiꞌ nipopekahi pe lali petarungkuꞌa, iomo konitahana toaꞌ to masalaꞌ pe datu.

²¹Angkana PUEꞋ mampoꞌowoniꞌi hei mampokarima hi Yusuf, iomo horiana motanaꞌ lalina tadulako petarungkuꞌa pe Yusuf.

²²Mewaliꞌ io nopoꞌohi tadulako petarungkuꞌa tiꞌo moꞌatoroꞌ to nitarungkuꞌ hei hinangkana jama itoꞌo.

²³Tadulako petarungkuꞌa hamboaꞌi mampekiri hapo-hapo alaꞌ nipepoꞌohikimoꞌi pe hi Yusuf, alaꞌ hi Yusuf nopoꞌowoni PUEꞋ, iomo horiana mampopihana to nojama mewali morasiꞌ.