Read Rampi Pewaliana 4 Bible Online

Pewaliana 4 - Rampi bible

Pewaliana 4

¹Manusiaꞌ tiꞌo mohantambi hante hi Hewa, hei mohinonaꞌimo towoweꞌe tiꞌo, hei mampoꞌanaꞌki hi Kai. Notiꞌi towoweꞌe tiꞌo, “Aku pahuaꞌa anaꞌntomaꞌani alaꞌ pesulungina PUEꞋ Ala.”

²Uko tiꞌo, nipoꞌanaꞌki womo hi Abeli, hineeꞌna hi Kai. Hi Abeli mewali topolambaꞌ bekeꞌ hei hi Kai mewali topokineteꞌ.

³Hawaꞌi morue uko tiꞌo, hi Kai mampopenombamo hadolaꞌa rasiꞌna ka woiꞌ mewali pampeweina pe PUEꞋ Ala.

⁴Noroamo woꞌo hi Abeli hambaꞌa uluꞌ anaꞌna gimbana norereꞌ hei lompoꞌ-lompoꞌna nopepenomba pe PUEꞋ Ala. Katoꞌo PUEꞋ Ala mampomotanaꞌ hei mantorimo popenombana hi Abeli,

⁵angkana hi Kai hante popenombana hawaꞌi nitorimo. Katoꞌo molaho laline hi Kai hei moꞌuro lione.

⁶PohawaꞌNa PUEꞋ Ala pe hi Kai, “Mahamporeꞌi hinaꞌ molaho lalima hante moꞌuro lioma?

⁷Bateꞌna Kutorimoko ane mowaliko to moromiꞌ, angkana ane hawaꞌko mowali to moromiꞌ, dosa hingkiꞌ mokeloiko, hei hingkiꞌ mokuasaꞌiko, angkana ingko hangangaa makuasaꞌko ka io.”

⁸Notiꞌi hi Kai pe hi Abeli hineeꞌna, “Hoki nolouki pe popada.” Kolentuꞌaramo i popada, hampale hi Kai mokondo hi Abeli hineeꞌna tiꞌo, honiꞌi norokoꞌ.

⁹Pohawaꞌna PUEꞋ Ala pe hi Kai, notiꞌi, “Imbomoꞌi hi Abeli, hineeꞌma tiꞌo?” Mehoniꞌ hi Kai, “Hawaꞌi kubahaꞌ! Akureꞌi to mampoꞌodaꞌ hineeꞌka?”

¹⁰Pohawaꞌna PUEꞋ Ala, “Haporeꞌi to iwalio hieꞌe? Raꞌana hineeꞌmu tiꞌo meꞌoꞌando pe Aku ka woiꞌ.

¹¹Ingko morokoꞌmoko hineeꞌmu hei raꞌana moꞌili pe woiꞌ. Iomo horiana Kutundaꞌko horiana woi hamboaꞌmo hingkiꞌ mampomowuaꞌ kopongkonamu.

¹²Ane maꞌintuꞌko woiꞌ tiꞌo, woiꞌ tiꞌo hawaꞌi hingkiꞌ mepaꞌani rasiꞌ kobuhaꞌana pe ingko. Ingko mewali haduo toaꞌ topolilo i duniaꞌ.”

¹³Notiꞌi hi Kai pe PUEꞋ Ala, “Hukuangku tiꞌo meliu ka pebiaꞌangku.

¹⁴Alaꞌ Ibueꞌa ka woiꞌ hieꞌe, aku hingkiꞌ tewowuniꞌa ka hinaroMu, haduo toaꞌ to mehilai hei to molausala i duniaꞌ, hei hihimo to hingkiꞌ mohidupaꞌ hante aku, monontomo hingkiꞌ morokoꞌa.”

¹⁵Pohawaꞌna PUEꞋ Ala pe io, “Hawaꞌi! Hihimo to morokoꞌ hi Kai hingkiꞌ nihowoni pe io pitu mpiha lipaꞌ.” Katoꞌo PUEꞋ mampodokiꞌi tandaꞌ pe hi Kai, hingkeꞌna hihimo to mangkohidupaꞌkiꞌi hawaꞌi hingkiꞌ morokoꞌi.

¹⁶Katoꞌo hi Kai molai ka hinarona PUEꞋ, hei io lebaꞌ i woiꞌ Nod i motoꞌando Eden.

¹⁷Hi Kai mohantambi hante hantambina hei mehinonaꞌimo towoweꞌe tiꞌo. Katoꞌo mampoꞌanaꞌki hi Henoꞌ. Katoꞌo io moꞌaro bolaꞌ ngkodeꞌ hei nokokeneꞌi kota tiꞌo Henoꞌ, motuntuni konaꞌna anaꞌna.

¹⁸Hi Henoꞌ mampemuleꞌki hi Irat, hei hi Irat mampemuleꞌki hi Mehuyael. Hi Mehuyael mampemuleꞌki hi Metusael, hei hi Metusael mampemuleꞌki hi Lamek.

¹⁹Hi Lamek hantambina meroduo, haduo konaꞌne hi Ada, to haduona hi Sila.

²⁰Hi Ada tiꞌo mampoꞌanaꞌki hi Abalaꞌ, iomo to mewali umoꞌ to meꞌohaꞌ i lali bambaruꞌ hei morewu pinatuwuꞌ.

²¹Konaꞌna hineeꞌna iomo hi Yubala, iomo to mewali umoꞌ malekiꞌna toaꞌ to mangkadoꞌ katapi hante toaꞌ to motulali.

²²Hi Sila mampoꞌanaꞌki woꞌo hi Tubal-Kain, umoꞌna lekiꞌna topobahaꞌ molebu kala hei topokorohi. Hineeꞌ towoweꞌena hi Tubal-Kain iomo hi Naama.

²³Mololitamo hi Lamek pe roduo hantambina tiꞌo, “Ada hante Sila, pehoromuakei lolitangka. O, hantambi-hantambingku, ipehoromuakei lolitangka hieꞌe. Aku morokoꞌmoꞌa haduo anaꞌntomaꞌani alaꞌ io mokondoꞌa wute mebangkaꞌ kuwali hatoꞌo alaꞌ nobeloiꞌa.

²⁴Alaꞌ ane hi Kai pitu mpiha lipaꞌna nihowonikiꞌi, hi Lamek pitu mpuluꞌ pitu mpiha lipaꞌ nihowonikiꞌi.”

²⁵Hi Adama mangkododungkuimo hantambina, horiana towoweꞌe tiꞌo mampoꞌanaꞌki tomaꞌani, hei nokokeneꞌi hi Set, alaꞌ notiꞌi, “Pueꞌ Ala mampaꞌanimoꞌa anaꞌ to ntaniꞌna pampohawana hi Abeli, alaꞌ norokoꞌi hi Kai.”

²⁶Nipoꞌanaꞌkimo haduo anaꞌntomaꞌani pe hi Set, hei anaꞌ tiꞌo nokokeneꞌi hi Eno. I tempo tiꞌomola toaꞌ mepongkamo mantiꞌi konaꞌ PUEꞋ hei menomba.