Read Rampi Pewaliana 40 Bible Online

Pewaliana 40 - Rampi bible

Pewaliana 40

¹Hawaꞌi morue uko tiꞌo, katoꞌo meroduo hawiꞌna datu Masiri, iomo topoꞌatoroꞌ inuana hei topodepana, mowalihi salaꞌ pe datu.

²Katoꞌo bukota datu pe iohi, iomo pe topoꞌatoroꞌ inuana hei topodepana.

³Katoꞌo nipopekahihi pe petarungkuꞌa i tambina tadulako to mampoꞌoda tambina kodatua, i peꞌohaꞌana hi Yusuf nitarungkuꞌ.

⁴Moruehi nitarungkuꞌ, tadulako to mampoꞌoda tambi kodatua morumbaꞌ hi Yusuf morewahihi.

⁵I hampiha tempo, halumbu wini topoꞌatoroꞌ inua hante topodepa tiꞌo hori-horihi mepototuru. Pepototurura tiꞌo hawaꞌi hibobali hei palaihana woꞌo hawaꞌi hibobali.

⁶Kopoꞌoninalu mehoꞌolu mehupaꞌmo hi Yusuf pe iohi katoꞌo noꞌele masusa lalire.

⁷Katoꞌo io meꞌitano, “Mahamporeꞌito hinaꞌ masusa lalimi ando hieꞌe?”

⁸Mehoniꞌhi, “Hiwowini mepototuruka, angkana hawaꞌi uwaꞌ to pobahaꞌ palaihane.” Notiꞌi hi Yusuf, “Pueꞌ Alalu to pobahaꞌo mampokononto palaihana pepototurumi. Amotu lolitaꞌi pepototurumi tiꞌo.”

⁹Notiꞌi topoꞌatoroꞌ inua tiꞌo, “I lali pepototurungku tiꞌo, kuꞌokiꞌ uwaꞌ hapongko anggoroꞌ i hinarongku.

¹⁰Hangkaru anggoroꞌ modaꞌa, tolu daꞌana tieꞌ hongkoꞌ mepongka motaweꞌ hei mohihi makokutu wute mangke wuaꞌne.

¹¹I tempo tiꞌo, kolentuꞌangku motiko paꞌinuana datu, katoꞌo kuroa wuaꞌne anggoroꞌ tiꞌo hei kupiꞌi i paꞌinuana datu, honiꞌi kutandokiꞌi.”

¹²Notiꞌi hi Yusuf, “Hieꞌemo palaihane: tolu daꞌana tieꞌ palaihana, tolu ando.

¹³I lalina tolu ando hieꞌe, datu hingkiꞌ mampopesuwuko, io hingkiꞌ moꞌampuniko hante mampopahuliꞌko pe jamamu hampiha. Ingko hingkiꞌ morewahiko mahuliꞌ paꞌinuana datu hibali hampiha.

¹⁴Angkana ikolowoiꞌa, ane moromiꞌmoꞌi kotuwuꞌma, itidoꞌkiꞌa poꞌawerasiꞌma pe aku hante ilolitaki datu hohumbo noniuꞌ kotuwuꞌku hingkeꞌna nopopesuwuꞌa ka petarungkuꞌa hieꞌe.

¹⁵Alaꞌ kotuꞌuana aku hampiha to nipehilaikiꞌa humei ka woiꞌna toIbarani hante lingkaꞌku iseꞌe i Masiri, hawaꞌa kahampiha mowali walia to kodake, to masipatoꞌ hingkiꞌ nipotarungkuꞌiꞌa.”

¹⁶Konobahaꞌnalu topoꞌurusi depa, palaihane pototuruna to moꞌatoroꞌ inuana datu, moromiꞌ palaihane io mololita pe hi Yusuf, “Aku woꞌo mepototuruꞌa mehoꞌuꞌa tolu onu bingkaꞌ moꞌohi depa.

¹⁷I lali bingkaꞌ to i womboꞌ moꞌohi molangkaꞌ-langkaꞌ depa kukomiki datu, angkana tinti mehupaꞌ mobingku depa tiꞌo.”

¹⁸Mehoniꞌ hi Yusuf, “Hieꞌemo palaihana pototuru tiꞌo, tolu onu bingkaꞌ tiꞌo palaihana tolu ando.

¹⁹I lali tolu ando hieꞌe, Pirao hingkiꞌ morumbaꞌ toaꞌ mohoi tutuꞌmu hante wotalokaꞌmu hingkiꞌ nihoi i loti hante nobingku-bingku tinti ohima.”

²⁰Tolu ando katoꞌo, datu mamposusaꞌi ando konipoꞌanaꞌakina, io mowali susaꞌ to kodeꞌ, hante mowowoi lekiꞌ-lekiꞌna topajamana. Io mohowoꞌi hingkeꞌna topoꞌatoroꞌ inua, hante topodepana nipasuwu ka petarungkuꞌa hante nikomi pe hinarona lekiꞌna topajamana kodatua.

²¹Topoꞌatoroꞌ inuana datu nipopahuliꞌmo pe jamana hampiha, horiana io wadi mampopaꞌinu datu.

²²Angkana topoꞌurusi depa nihoi wute mahi hintotoꞌ hante to notiꞌi hi Yusuf.

²³Angkana topoꞌurusi paꞌinuana tiꞌo mangkolembuliki mpololeke hi Yusuf.