Read Rampi Pewaliana 41 Bible Online

Pewaliana 41 - Rampi bible

Pewaliana 41

¹Merontoꞌamo liu datu Masiri mepototuru waheꞌe: Io kolentuꞌana metotiꞌi i botana uwai Nili.

²Hampale mehupaꞌ pitu mbaꞌana gapiꞌ to molompoꞌ hante koliꞌna mangkololoni, mesuwu ka uwai tiꞌo. Katoꞌo mepongkamo mangka kora to i botana uwai tiꞌo.

³Katoꞌo pitu mbaꞌa gapiꞌ ntaniꞌna mesuwu woꞌo. Pinatuwuꞌ-pinatuwuꞌ tiꞌo moreko hei koliꞌ romo moputuꞌ wuku. Gapiꞌ-gapiꞌ to moreko tiꞌo metotiꞌi i hirina gapiꞌ-gapiꞌ to molompoꞌ, i botana uwai tiꞌo.

⁴Katoꞌo gapiꞌ-gapiꞌ to moreko mangka gapiꞌ to molompoꞌ. Uko tiꞌo datu meꞌaro ka koturuana.

⁵Katoꞌo datu tiꞌo mepototuru womo i korompihana, i lali pototuruna pangkiꞌ hangkaru kina mowuaꞌ pitu mbuli to moꞌohi.

⁶Katoꞌo tuwuꞌ woꞌo, pitu mbuli kina to langkoꞌ alaꞌ noparowohiꞌi parowo to molaho ka popada woꞌoni.

⁷Kina to langkoꞌ tiꞌo maliomi kina to moꞌohi. Uko tiꞌo pohorimo datu hei nobahaꞌ komepototurune.

⁸Nokohiꞌolui handondoiha laline, iomo horiana nopopewowoi hinangkana topobahaꞌ hante to mapande mampelao pototuru i Masiri. Katoꞌo nololitakimohi pepototurune pe iohi, angkana hawaꞌi uwaꞌ to pobahaꞌ palaihana.

⁹Katoꞌo to moꞌurusi inua mantiꞌi pe datu, mosangadiaꞌa datu, ando hieꞌe hingkiꞌ kulolita duluna komasalaꞌka hampiha.

¹⁰Hampiha datu bukota pe topoꞌurusi depa hante pe aku, iomo horiana nikahika i lali pe petarungkuꞌa, i tambina tadulako to mampoꞌodaꞌ tambi kodatua.

¹¹I hamini, ingka roduo mepototuruka hei pepototurungki tiꞌo hawaꞌi hibobali palaihane.

¹²Haduo anaꞌntomaꞌani toIbarani uwaꞌ inoꞌo moꞌawa hante ingka. Io hawiꞌna to mampoꞌoda tambina datu, kitiꞌiki pepototurungkio pe io, katoꞌo notiꞌikika palaihane.

¹³Tongawa lekiꞌna, mononto mewali hibali to notiꞌikika, iomo datu mampopahuliꞌmoꞌa i jamangku hampiha, angkana to moꞌurusi depa tiꞌo nihoi wute mahi.

¹⁴Katoꞌo datu merumbaꞌ ako moroa hi Yusuf hei nipasuwumo ka petarungkuꞌa. Katoꞌo nibangkurori uko tiꞌo io mempohawa ako mehinaro pe datu.

¹⁵Notiꞌi datu pe io, “Aku mepototuruꞌa, angkana hawaꞌi uwaꞌ haduo toaꞌ to pobahaꞌ mampatiꞌikiꞌa palaihane. Uwaꞌ mampatiꞌikiꞌa, ingko pobahaꞌko mampelao pepototuru.”

¹⁶Hi Yusuf mehoniꞌ, “Haꞌiokaiaꞌ aku datungku, angkana Pueꞌ Ala to mampokononto palaihane pepototurumu.”

¹⁷Katoꞌo mololitamo datu, “Mepototuruꞌa kolentuꞌaku metotiꞌi i botana uwai Nili.

¹⁸Katoꞌo mehupaꞌ ka uwai tiꞌo pitu mbaꞌa gapiꞌ to molompoꞌ hei koliꞌna mangkololoni, katoꞌo mangkahi kora to i botana uwai tiꞌo.

¹⁹Katoꞌo mehupaꞌ womo pitu mbaꞌa gapiꞌ ntaniꞌna, to moreko hante koliꞌ romo moputuꞌ wuku. Handoaꞌa hampiha pangkiꞌ gapiꞌ to moreko mpore i woiꞌ Masiri.

²⁰Gapiꞌ-gapiꞌ to moreko tiꞌo maliomi pitu mbaꞌa gapiꞌ to molompoꞌ.

²¹Angkana uko tiꞌo gapiꞌ-gapiꞌ to moreko tontonalu moreko. Hampale meꞌaroꞌa ka koturuangku.

²²Katoꞌo toturu womoꞌa mahuliꞌ, katoꞌo mepototuruꞌa womo, pangkiꞌ pitu mbuli kina to moꞌohi hante mangke, tuwuꞌ i haꞌanu karuna.

²³Katoꞌo tuwuꞌ woꞌo pitu mbuli kina to langkoꞌ alaꞌ poko noparowohi parowo to molaho ka popada woꞌoni.

²⁴Kina to langkoꞌ tiꞌo maliomi kina to moꞌohi wute uko. Kulolitakimohi rolangkaꞌna pepototurungka pe to mapandehi, angkana hawaꞌi robahaꞌ palaihane.”

²⁵Katoꞌo mololita hi Yusuf pe datu, “Korolangkaꞌna pepototurumu tiꞌo hibobali palaihane, Pueꞌ Ala mampetiꞌiki pe datu hapo to hingkiꞌ Nopopewali.

²⁶Pitu mbaꞌa gapiꞌ to molompoꞌ tiꞌo iomo pitu ntoꞌa hei pitu mbulina kina to moꞌohi iomo pitu ntoꞌa woꞌo. Rolangkaꞌna hibobali palaihane.

²⁷Pitu mbaꞌa gapiꞌ to moreko to hingkiꞌ mehupaꞌ intu hante pitu mbuli kina to langkoꞌ alaꞌ parowo to molaho. Iomo tempo kobiloraha pitu ntoꞌa komoruene.

²⁸Hibali to kutiꞌimo hingkonia pe datu, Pueꞌ Ala mampetidoꞌkimo pe datu hapo to hingkiꞌ Nopopewali.

²⁹I lali pitu ntoꞌa hingkiꞌ nopeluoniki kopongkona alaꞌ mewaliꞌi lekiꞌna hinangkana paꞌintuꞌ i woiꞌ Masiri.

³⁰Katoꞌo hingkiꞌ mehupaꞌ woꞌo pitu ntoꞌa kobiloraha, katoꞌo hingkiꞌ nikomulihaki hinangkana komasagenaa tiꞌo i woiꞌ Masiri alaꞌ tempo kobiloraha mampomaporiꞌ lekiꞌna kotuwuꞌ.

³¹

³²Wute merompiha pototuru tiꞌo nohuliꞌ i datungku Pirao, palaihana, Pueꞌ Ala mampokononto peleihaNa to hingkiꞌ Nopopewalimo.

³³Iomo hinaꞌ datungku, moromiꞌ ane moꞌuwiꞌko toaꞌ to mapande hei mononto laline hei ipaꞌani kuasaꞌ moꞌatoroꞌ woiꞌ hieꞌe.

³⁴Moromiꞌ woꞌo ane itidoꞌhi woꞌo topajama ntaniꞌna hei ipaꞌanihi kuasaꞌ hingkeꞌna i lali pitu ntoꞌa tempo komasagena tiꞌo, moruruꞌhi hadolaꞌa ka to limo dolaꞌa ka lekiꞌna rasiꞌ woiꞌ to rojama. Hingkeꞌna rorampu-rampuꞌi i kota-kota hante ropoꞌodaꞌ.

³⁵

³⁶Kina tiꞌo hingkiꞌ mewaliꞌ pantimomo kopongkonana toaꞌ i lali pitu ntoꞌa, i kobiloraha to hingkiꞌ mehupaꞌ i woiꞌ Masiri. Ane watoꞌoꞌi koꞌiꞌatoroꞌne toaꞌmu hawaꞌi hingkiꞌ mahi bilora.”

³⁷Datu hante surodaduna hei lekiꞌna topajamana mampetotuꞌu pahuana hi Yusuf.

³⁸Katoꞌo notiꞌi datu pe iohi, “Hawaꞌi uwaꞌ ntaniꞌ toaꞌ to tohua ukonalu hi Yusuf, alaꞌ io nopatente Inohaꞌ Mangkolehina Pueꞌ Ala.”

³⁹Katoꞌo datu mantiꞌi pe hi Yusuf, “Pueꞌ Ala mampetiꞌiki lekiꞌna hieꞌe pe ingko, mewaliꞌ tongawamo ingko to mapande hante mononto ka toaꞌ ntaniꞌna.

⁴⁰Ingko hingkiꞌ mewaliko tadulako, hei lekiꞌna toaꞌ i Masiri hingkiꞌ motuntuni pohawaꞌmu. Angkana to i wowomboꞌ kuasaꞌna ka ingko akulu.”

⁴¹Uko tiꞌo datu motahu hangkokoliꞌna tandaꞌ kodatuana ka kororapuꞌna nopaꞌanikiꞌi, honiꞌi nokahi pe kororapuꞌna hi Yusuf hei notiꞌi, “Mepongka ando hieꞌe ingko kuparilangkaꞌmoko mewali sulewotangku i humalekiꞌna woiꞌ Masiri.” Katoꞌo nobaduꞌi hampepaꞌ baduꞌ to malolunu widana, hante nolewului hangkaleꞌ lewulu bulawa.

⁴²

⁴³Katoꞌo nipaꞌanikimo kereta kodatua, kereta koroꞌonuna nopehendeꞌi hei topampodaꞌ datu matengkaꞌhi medodulu ka kereta to nopehendeꞌi hi Yusuf, hei meꞌoꞌando-andohi rotiꞌi, “Mengkoruꞌkei! Mengkoruꞌkei pe toaꞌ hieꞌe!” Hatoꞌomola hi Yusuf niparilangkaꞌ mewaliꞌ tadulako i woiꞌ Masiri.

⁴⁴Notiꞌi datu pe io, “Akumola datu to mampetiꞌiki pe ingko, ane hawaꞌhi mesabiꞌ ka ingko hawaꞌhi wadi mowali hapo-hapo i woiꞌ Masiri.”

⁴⁵Katoꞌo datu mampaꞌaniꞌi halangkaꞌ konaꞌ i Masiri pe hi Yusuf, iomo hi Safna-Panea. Nipaꞌani woꞌo haduo hantambina to mampokonaꞌ hi Asna, anaꞌna hi Potipar to motadulakoi i tambi penombaha agama toMasiri i kota Heliopoli. Umuruꞌna hi Yusuf tolu mpuluꞌ ntoꞌa io mepongkamo majama i woiꞌ Masiri i kodatuana Pirao. Katoꞌo molaimo hi Yusuf ka tambina Pirao nolou motuleliꞌi lekiꞌna woiꞌ Masiri.

⁴⁶

⁴⁷Woiꞌ tiꞌo to mampopelua rasiꞌ moꞌodoꞌ-odoꞌ i lali pitu ntoꞌa.

⁴⁸I lali pitu ntoꞌa komasagena tiꞌo hi Yusuf morampu hinangkana kopongkona to uwaꞌ i woiꞌ Masiri, katoꞌo noporia i lali buhoꞌ to rowali i bolaꞌ-bolaꞌ tiꞌo.

⁴⁹Kina to norampu tiꞌo hawaꞌi to mohukaꞌna koworiꞌne. Katoꞌo hi Yusuf meꞌohaꞌ mohukaꞌ alaꞌ koworiꞌna hibali woꞌoni to i bota ntahiꞌ, hawaꞌi nopokohukaꞌa.

⁵⁰Handoaꞌi tene tempona kobiloraha hi Asna hantambina hi Yusuf mampoꞌanaꞌkimo meroduo anaꞌ tomaꞌani.

⁵¹Hi Yusuf mantiꞌi, “Pueꞌ Ala to mowaliꞌa mangkombulihaki hinangkana komaporiꞌku hante hinangkana potinoana umoꞌku.” Iomo horiana hinaꞌ nokokeneꞌi anaꞌne tokokaꞌ hi Manase.

⁵²Notiꞌi womo hi Yusuf, “Pueꞌ Ala to mampaꞌanimoꞌa oꞌanaꞌ i tempoku masusa.” Katoꞌo nokokeneꞌi anaꞌne koroduona hi Eparai.

⁵³Liumo pitu ntoꞌa tempona komasagenaa to uwaꞌ i woiꞌ Masiri tiꞌo,

⁵⁴mepongkamo mehupaꞌ kobiloraha pitu ntoꞌa, hibali to notiꞌi hi Yusuf. I humanele duniaꞌ mewali kobiloraha, angkana i woiꞌ Masiri uwaꞌ popatimomo kopongkona.

⁵⁵I tempona toaꞌ toMasiri mepongka nokoꞌukoi kopongkonara, akomohi merapiꞌ pangkara pe datu. Katoꞌo datu norumbaꞌhi nolou pe hi Yusuf hei motuntunihi hinangkana to nohowoꞌikihi.

⁵⁶Kobiloraha tiꞌo monono i humalele duniaꞌ, katoꞌo hi Yusuf mobungkahi hinangkana buhoꞌ hante mobaluꞌ kina pe toaꞌ toMasiri, alaꞌ monono kobiloraha i woiꞌ Masiri.

⁵⁷Ka humaduniaꞌ toaꞌ mehupaꞌhi pe Masiri mehili kina pe hi Yusuf alaꞌ kobiloraha monono i umbo-umbo.